Obadia 1:1-21
1 Ye ke pono ya Obadia:*
Se ke seo Mmuši Morena Jehofa a se boletšego mabapi le Edomo:
“Go na le taba yeo re e kwelego go Jehofa,Go na le moromiwa yo a romilwego ditšhabeng gore a re:
‘A re itokišetšeng go yo lwa le Edomo.’”
2 “Tseba gore ke go dirile yo monyenyane gare ga ditšhaba.O nyatšegile kudukudu.
3 Boikgantšho bja pelo ya gago bo go forile,Wena yo o tšhabetšego leswikeng leo le lego leweng,Wena yo o dulago godimodimo ga dithaba, o ipotša gore:‘Ke mang a tlago go ntheošetša fase?’”
4 Jehofa o re: “Le ge o ka dula godimodimo* go swana le ntšhu,Goba wa aga sehlaga sa gago gare ga dinaledi,Ke tla go fološa gona moo.
5 Ge mahodu a be a ka tla go wena, gomme batho ba tla go wena bošego ba go swara poo,Na ba be ba ka se utswe feela dilo tšeo ba di nyakago?
(Ruri manaba a gago a be a tla go fedišetša sa ruri.)
Goba ge e ba babuni ba diterebe ba be ba ka tla go wena,Na ba be ba ka se go šiele tše dingwe?
6 Eupša ba tšere dilo ka moka tšeo e bego e le tša Esau!
Dilo tša gagwe tše bohlokwa tšeo a bego a di utile, ba di thopile!
7 Ba go rakile nageng ya bona.
Bao o bego o dirišana le bona,* ba go forile.
Banna bao o bego o dula le bona ka khutšo ba go fentše.
Bao o bego e eja dijo le bona,Ba tla go beela molaba, eupša wena o ka se o lemoge.”
8 Jehofa o re:“Letšatšing leo ke tla fediša ba bohlale ba Edomo.Ka ba ka fediša bao ba nago le temogo dithabeng tša Esau.
9 Wena Themane, banna ba gago ba bogale ba tlo tšhoga,Ka gobane yo mongwe le yo mongwe yo a lego dithabeng tša Esau o tlo bolawa.
10 Ka baka la bošoro bjoo o bo dirilego moratho wa gago Jakobo,O tla lewa ke dihlong kuduGomme wa fedišetšwa sa ruri.
11 Letšatšing leo o bego o emetše ka thoko,Letšatšing leo manaba a išitšego mašole a moratho wa gago bothopša,Ge manaba a be a tsena ka dikeiti tša gagwe gomme a direla Jerusalema matengwa,O be o le gare ga ona.
12 O se ke wa thaba ge ngwaneno a welwa ke dilo tše mpe.O se ke wa thaba ge batho ba Juda ba fedišwa.O se ke wa ba kwera ge ba le tlalelong.
13 O se ke wa tsena motseng wa batho ba ka ge ba le tlalelong.O se ke wa thaba ge ngwaneno a wetšwe ke masetlapelo e bile a le tlalelong.Le gona, o se ke wa tšea mahumo a gagwe ge a wetšwe ke masetlapelo.
14 O se ke wa ema ditseleng gore o bolaye batho ba gagwe bao ba tšhabago.Batho ba gagwe bao ba phologilego o se ke wa ba iša go manaba a bona ge ba tlaletšwe.
15 Ka gobane letšatši la Jehofa la go tlo lwa le ditšhaba ka moka le kgauswi.
Dilo tšeo o di dirilego, le wena di tla go diragalela.
Tsela yeo o bego o swara ba bangwe ka yona le wena o tla swarwa ka yona.
16 Tsela yeo o bego o enwa beine ka yona godimo ga thaba ya ka e kgethwa,Ke tsela yeo batho ba ditšhaba ba tlago go dula ba enwa kgalefo ya ka bjalo ka beine.
Ba tlo enwa gomme ba e metša,Le gona, ba tlo nyamelela bjalo ka ge eka ga se ba ka ba ba gona.
17 Eupša batho ba ka bao ba phonyogilego ba tla ba Thabeng ya TsioneGomme yona e tla ba e kgethwa.Le gona ditlogolo tša Jakobo di tla boela tša tšea bohwa bja tšona.
18 Ditlogolo tša Jakobo di tla ba bjalo ka mollo,Ditlogolo tša Josefa tša ba bjalo ka kgabo ya mollo,Ba ntlo ya Esau ba ba bjalo ka mahlaka,Mollo wa bona o tla ba tšhuma ba swa lorelore.Le gona, ntlong ya Esau go ka se be le yo a phologago,Ka gobane go boletše Jehofa.
19 Ba tla tšea Negebe le tikologo ya dithaba ya Esau,Le metse yeo e lego tlase ga thaba le naga ya Bafilisita.
Ba tla tšea naga ya Efuraime le naga ya Samaria gore ba dule go yona,Gomme Benjamini yena o tla tšea naga ya Gileada a dula go yona.
20 Bao ba thopilwego ka morago ga leboto le, e lego batho ba Isiraele,Ba tla hwetša naga ya Bakanana go fihla Tsarepata,
Gomme mathopša a Jerusalema ao a bego a le Sefaradi a tla tšea metse ya Negebe.
21 Bao ba tlago go phološa batho ba tla ya Thabeng ya Tsione,E le gore ba ahlole badudi ba tikologong ya dithaba ya Esau,Gomme Jehofa o tla buša e le kgoši.”
Mengwalo ya tlase
^ Leina le le ra gore, “Mohlanka wa Jehofa.”
^ Goba mohlomongwe, “o ka fofela godimodimo.”
^ Goba, “Bao o dirilego kgwerano le bona.”
