Sakaria 1:1-21
-
Batho ba kgothaletšwa go boela go Jehofa (1-6)
-
‘Boelang go nna gomme le nna ke tla boela go lena’ (3)
-
-
Pono ya pele: Banna bao ba nametšego dipere gare ga mehlare ya memirite (7-17)
-
“Nna Jehofa ke tla kgothatša Tsione gape” (17)
-
-
Pono ya bobedi: Manaka a mane le banna ba bane bao e lego ditsebi tša mošomo wa diatla (18-21)
1 Ka kgwedi ya seswai ngwageng wa bobedi wa ge go buša Dario, Jehofa o ile a bolela le Sakaria morwa wa Berekia, e lego morwa wa Ido, a re:
2 “Nna Jehofa ke be ke galefetše botatago lena kudu.
3 “O ba botše o re: ‘Se ke seo nna Jehofa wa madira ke se boletšego: “‘Ke nna Jehofa wa madira. Boelang go nna gomme le nna ke tla boela go lena.’ Nna Jehofa wa madira ke nna ke le botšago dilo tše.”’
4 “‘Le se ke la swana le botatago lena bao baporofeta ba kgale ba ilego ba ba botša ba re: “Jehofa wa madira o re: ‘Hle, tlogelang mekgwa ya lena e mebe gomme le boeleng go nna.’”’
“‘Eupša ga se ba ntheetša e bile ga se ba kwa seo ke se bolelago.’ Se ke seo Jehofa a se bolelago.
5 “‘Gona bjale botatago lena ba kae? Na baporofeta bona ba ile ba phela go ya go ile?
6 Eupša ke boditše botatago lena gore ba swanetše go latela melao efe. Ke rometše bahlanka ba ka, e lego baporofeta, gore ba ba lemoše ka seo se tlago go ba diregalela ge e ba ba sa latele melao yeo ya ka. Na dilo tšeo ka moka ga se tša ka tša ba diragalela?’ Ka gona ba ile ba itshola gomme ba re: ‘Jehofa wa madira o re dirile dilo tšeo di swanelago ditiro tša rena, feela bjalo ka ge a be a boletše gore o tla re dira tšona.’”
7 Letšatšing la bo-24, kgweding ya bo-11, e lego kgwedi ya Shebate, ngwageng wa bobedi wa ge go buša Dario, Jehofa o ile a dira gore moporofeta Sakaria morwa wa Berekia, e lego morwa wa Ido a bone pono. Sakaria o itše:
8 “Ponong yeo ke e bonego bošego, ke ile ka bona monna yo a nametšego pere e khwibidu a eme a sa šikinyege kgauswi le mehlare ya memirite* yeo e bego e le moeding, gomme ka morago ga gagwe go be go eme dipere tše khwibidu, tše tsootho* le tše tšhweu.”
9 Bjale nna ka botšiša morongwa yo a bego a bolela le nna ka re: “Mong wa ka, ke bomang ba?”
Ke moka yena a re: “Ke tla go bontšha gore ke bomang.”
10 Ke moka monna yo a bego a eme a sa šikinyege gare ga mehlare ya memirite a re: “Ba ke bao Jehofa a ba romilego gore ba sepelasepele le lefase.”
11 Bona ba araba morongwa wa Jehofa yo a bego a eme gare ga mehlare ya memirite ba re: “Re tšo sepelasepela lefaseng, gomme lefase ka moka le iketlile e bile le na le khutšo.”
12 Ke moka morongwa wa Jehofa a re: “Wena Jehofa wa madira, o tla tšea nako e kae o sa gaugele Jerusalema le metse ya Juda, yeo o tšerego mengwaga e 70 o e galefetše?”
13 Jehofa a araba morongwa yo a bego a bolela le nna, gomme a mmotša mantšu a mabotse le ao a kgothatšago.
14 Ke moka morongwa yo a bego a bolela le nna a re: “Goeletša, o botše batho o re: ‘Jehofa wa madira o re: “Ke tlo lwela Jerusalema le Tsione, ruri ke tlo di lwela ka pelo ya ka ka moka.
15 Ke galefetše kudu ditšhaba tšeo di iketlilego. Ke be ke galefetše batho ba ka ganyenyane, eupša ditšhaba tšeo tšona tša oketša mathata.”’
16 “Ka gona Jehofa o re: ‘“Ke tla gaugela Jerusalema gape, gomme ntlo ya ka e tla agwa moo. Jerusalema e tla metwa ka thapo ya go meta.” Se ke seo Jehofa wa madira a se bolelago.”’
17 “Goeletša gape o botše batho o re: ‘Jehofa wa madira o re: “Metse ya ka e tla tlala kudu ka dilo tše dibotse, gomme nna Jehofa ke tla kgothatša Tsione gape, ka ba ka kgetha Jerusalema gape gore e be motse wa ka.”’”
18 Ke moka ka lebelela godimo ka bona manaka a mane.
19 Bjale ka botšiša morongwa yo a bego a bolela le nna ka re: “Manaka a a swantšhetša eng?” Yena a re: “Manaka a a swantšhetša mebušo yeo e ilego ya phatlalatša batho ba Juda, ba Isiraele le ba Jerusalema.”
20 Ka morago ga moo, Jehofa a mpontšha banna ba bane bao e lego ditsebi tša mošomo wa diatla.
21 Ke ile ka botšiša ka re: “Ba bona ba tlo dira eng?”
Ke moka yena a re: “A ke manaka ao a ilego a phatlalatša batho ba Juda moo go ilego gwa se be le motho le o tee yo a kgonago go tsoša hlogo. Banna ba ba tlile go tlo tšhoša manaka a ditšhaba, ba tlo fediša manaka a ditšhaba tšeo di dirišitšego manaka a tšona go lwa le naga ya Juda, e le gore di phatlalatše batho ba yona.”
Mengwalo ya tlase
^ Wo ke mohlašana wo o nago le matlakala ao a phadimago le mapolomo a mašweu a go nkga bose.
^ Goba “brown.”
