Sakaria 12:1-14
12 Molaetša wo o tšwago go Modimo šo:
“Wona ke molaetša wa Jehofa wa mabapi le Isiraele,” o realo Jehofa,Yena yo a phurulotšego magodimo bjalo ka lešela,Yo a dirilego motheo wa lefase,Le yo a filego motho moya wa bophelo.
2 “Ke nna yo, ke dira gore Jerusalema e be komiki yeo e dirago gore ditšhaba ka moka tšeo di lego kgauswi le yona di thekesele. Le gona Juda le Jerusalema di tla hlaselwa.
3 Letšatšing leo ke tla dira gore Jerusalema e swane le leswika leo le imelago go ditšhaba ka moka. Batho ka moka bao ba lekago go le kuka ba tla gobala kudu. Le gona, ditšhaba ka moka tša lefaseng di tla kgobokana gomme tša lwa le yona.
4 Jehofa o re: “Letšatšing leo, ke tla gakantšha dipere ka moka tša bona gomme ka gafiša banamedi ba tšona. Ke tla dula ke beile Bajuda leihlo, eupša ka dira gore dipere ka moka tša ditšhaba di foufale.
5 Dikgošana tša Juda dipelong tša tšona di tla re: ‘Batho bao ba dulago Jerusalema ke matla a rena ao a tšwago go Jehofa wa madira, yena Modimo wa bona.’
6 Letšatšing leo ke tla dira gore dikgošana tša Juda di swane le mollo wa sethokgweng. Di tla swana le legong leo le tukago gare ga dingatana tša mabele tšeo di sa tšwago go robja, gomme di tla fediša ditšhaba ka moka tšeo di lego ka mahlakoreng ka moka a tšona, e lego ka go le letona le ka go le letshadi. Ge e le badudi ba Jerusalema bona ba tla boela ba dula motseng wa bona, e lego Jerusalema.
7 “Jehofa o tla phološa ditente tša Juda pele, e le gore letago la ditlogolwana tša Dafida* le la badudi ba Jerusalema le se ke la feta la Bajuda.
8 Letšatšing leo Jehofa o tla šireletša badudi ba Jerusalema. Letšatšing leo yo a ka kgopšago gomme a wa o tla ba matla go swana le Dafida, gomme ditlogolwana tša Dafida di tla ba matla go swana le Modimo, e bile di tla swana le morongwa wa Jehofa yo a di hlahlago.
9 Le gona letšatšing leo ke tla fediša ditšhaba ka moka tšeo di lwago le Jerusalema.
10 “Ke tla tšhollela moya wa ka go ditlogolwana tša Dafida le go badudi ba Jerusalema. Ke tla ba amogela gomme bona ba tla nthapela. Ba tla lebelela yo ba mo hlabilego, gomme ba mo llela go swana le ge go llelwa morwa a nnoši yo a hlokofetšego. O tla llelwa gabohloko go swana le ge go llelwa morwa wa mathomo.
11 Letšatšing leo sello sa Jerusalema e tla ba se segolo kudu go swana le seo se kilego sa ba gona Hadadarimoni Moeding wa Megido.
12 Naga e tla tlala sello gomme moloko o mongwe le o mongwe o tla lla o nnoši. Moloko wa Dafida o tla lla o nnoši, le basadi ba moloko woo ba lla ba nnoši. Moloko wa Nathane o tla lla o nnoši, le basadi ba moloko woo ba lla ba nnoši.
13 Moloko wa Lefi o tla lla o nnoši, le basadi ba moloko woo ba lla ba nnoši. Moloko wa Bashimei o tla lla o nnoši, le basadi ba moloko woo ba lla ba nnoši.
14 Moloko o mongwe le o mongwe go meloko yeo e šetšego e tla lla e nnoši, le basadi ba meloko yeo ba lla ba nnoši.
Mengwalo ya tlase
^ Phetolelo ya lentšu ka lentšu e re, “ba ntlo ya Dafida.”
