Sakaria 13:1-9
13 “Letšatšing leo ditlogolwana tša Dafida le badudi ba Jerusalema ba tla epelwa sediba gore ba itlhwekiše dibeng le ditirong tša bona tša go se hlweke.”
2 “Jehofa wa madira o re: “Letšatšing leo ke tla fediša medingwana mo nageng gomme e ka se sa gopolwa. Ke tla fediša le baporofeta mo nageng le bao ba dirago dilo tše di sa hlwekago pele ga Modimo.
3 Le gona ge e ba motho a ka porofeta gape, tatagwe le mmagwe, e lego batswadi ba gagwe, ba tla re go yena: ‘O tla hwa, ka gobane o boletše maaka ka leina la Jehofa.’ Tatagwe le mmagwe, e lego batswadi ba gagwe, ba tla mo hlaba ka lerumo ka ge a porofeta.
4 “Letšatšing leo baporofeta ka moka ba tla lešwa dihlong ke dipono tša bona ge ba porofeta. Baporofeta ba ba ka se sa apara diaparo tša baporofeta tšeo di dirilwego ka boya tšeo ba bego ba di apara gore ba fore batho.
5 Yo mongwe le yo mongwe wa bona o tla re: ‘Ga se nna moporofeta. Nna ke no ba molemi, ka gobane ke rekilwe ke sa le yo moswa gore ke be mohlanka.’
6 Ge e ba motho yo mongwe a ka botšiša yo mongwe wa bona a re: ‘Dintho tšeo di lego mmeleng wa gago ke tša eng?’ Yena o tla re: ‘Ke gobetše ke le ntlong ya bagwera ba ka.’”
7 Jehofa wa madira o re: “Wena o nago le tšhoša,Tsoga o hlasele modiši wa ka le mogwera wa ka.
Itia modiši gomme mohlape o gašane.Ke tla kgalema bao ba lebelelwago ba se bohlokwa.”
8 Jehofa o re: “Mo nageng ka mokaBatho ba bantšhi ba tla fedišwa,Gomme gwa šala ba sego kae.
9 Go no swana le ge gauta le silifera di fetišwa mollong gore di hlwekišwe,Ke tla lekola bao ba šetšego,Gomme ka ba dira gore e be bao ba hlwekilego.
Bona ba tla bitša leina la ka,Gomme nna ke tla ba araba.
Ke tla re: ‘Ba ke batho ba ka,’
Gomme bona ba tla re: ‘Jehofa ke Modimo wa rena.’”
