Sakaria 4:1-14
4 Morongwa yo a bego a bolela le nna a boa gomme a ntsoša go swana le motho yo a tsošwago borokong.
2 Ke moka a re go nna: “O bona’ng?”
Nna ka re: “Ke bona sehlomelamabone sa gauta seo godimo ga sona go nago le sebjana. Se na le mabone a šupago, gomme mabone ao a lego godimo ga sona a na le diphaephe tše šupago.
3 Kgauswi le sona go na le mehlare e mebedi ya mehlware, o mongwe o ka lehlakoreng la sona le letona gomme o mongwe o ka go le letshadi.”
4 Ke moka ka botšiša morongwa yo a bego a bolela le nna ka re: “Mong wa ka, dilo tše di ra gore’ng?”
5 Bjale morongwa yo a bego a bolela le nna a mpotšiša a re: “Na ka nnete ga o tsebe gore dilo tše di ra gore’ng?”
Nna ka re: “Ga ke tsebe mong wa ka.”
6 Ke moka a nkaraba a re: “Wo ke molaetša wa Jehofa wo o yago go Serubabele: ‘“Dilo tše ka moka di tla direga ka moya wa ka, e sego ka mašole goba ka matla a batho.” Se ke seo Jehofa wa madira a se bolelago.
7 Wena thaba e kgolo, o selo mang? O tla fetoga naga yeo e se nago selo pele ga Serubabele. Yena o tla tla le leswika la bohlokwa. Batho ba tla goeletša ba re: “Ke le lebotse kudu! Ke le lebotse kudu!”’”
8 Jehofa a bolela le nna gape a re:
9 “Serubabele ke yena a agilego fantešene ya ntlo ye, gomme ke yena a tlago go e fetša. E bile le tla tseba gore Jehofa wa madira o nthomile go lena.
10 Ke mang yo a nyaditšego dilo tše dinyenyane tšeo di dirilwego mathomong? Batho ba tla thaba ge ba bona thapo ya go meta ka seatleng sa Serubabele. Mahlo a šupago ke mahlo a Jehofa ao a lebeletšego lefase ka moka.”
11 Ke moka ka mmotšiša ka re: “Mehlare ye e mebedi ya mehlware yeo e lego ka lehlakoreng le letona le le letshadi la sehlomelamabone e ra gore’ng?”
12 Ka mmotšiša la bobedi ka re: “Makalana a a mehlware e mebedi ao a ntšhago seela sa mmala wa gauta ka diphaephe tše pedi tša gauta ke eng?”
13 Ka gona a mpotšiša a re: “Na ka nnete ga o tsebe gore dilo tše di ra gore’ng?”
Nna ka re: “Ga ke tsebe mong wa ka.”
14 Ke moka a re: “Ba ke batlotšwa ba babedi bao ba kgethilwego ke Modimo, e lego Morena wa lefase ka moka, gomme ba eme kgauswi le yena.”
