Sakaria 8:1-23
8 Jehofa wa madira a bolela le nna gape a re:
2 “Se ke seo nna Jehofa wa madira ke se bolelago: ‘Ke tla lwela Tsione, ruri ke tla e lwela ka pelo ya ka ka moka.’”
3 “Jehofa o re: ‘Ke tla boela Tsione gomme ke dule Jerusalema, le gona Jerusalema e tla bitšwa motse wa nnete, ge e le thaba ya Jehofa wa madira yona e tla bitšwa thaba e kgethwa.’”
4 “Jehofa wa madira o re: ‘Bakgalabje le bakgekolo ba tla itulela gape mebarakeng ya Jerusalema, yo mongwe le yo mongwe a swere lehlotlo la gagwe ka baka la go tšofala.
5 Le gona bašemane le banenyana bao ba bapalago ba tla tlala mebarakeng ya motse.’”
6 “Jehofa wa madira o re: ‘Le ge mehleng yeo taba ye e ka bonagala e sa kgonege go batho bao ba šetšego, na le mo go nna e tla bonagala e sa kgonege?’ Se ke seo se bolelwago ke Jehofa wa madira.”
7 “Jehofa wa madira o re: ‘Ke phološa batho ba ka nageng ya ka bohlabela le ya ka bodikela.
8 Ke tla ba tliša Jerusalema ba dula gona, e tla ba setšhaba sa ka gomme nna ka ba Modimo wa bona yo a botegago le wa toka.’”
9 “Jehofa wa madira o re: ‘Tiang matla lena bao gona bjale le kwago mantšu a baporofeta, e lego wona mantšu ao a ilego a bolelwa mohlang wa ge fantešene ya ntlo ya Jehofa wa madira e be e thewa gore tempele e agiwe.
10 Ka gobane pele ga mehla yeo, le ge diruiwa le batho ba be ba šoma, ba be ba sa patelwe. Le gona, batho ba be ba sa kgone go tšwa le go tsena ka baka la manaba, ka gobane ke be ke dirile gore batho ba lwe.’
11 “Jehofa wa madira o re: ‘Bjale nka se sa swara batho bao ba šetšego ba setšhaba se go swana le mehleng ya kgale.
12 ‘Ka gobane ba tla bjala peu ya khutšo, ge e le mohlare wa diterebe wona o tla enywa dienywa, lefase la tšweletša dibjalo gomme magodimo a neša phoka ya ona. Le gona ke tla nea batho bao ba šetšego ba setšhaba se dilo tše ka moka e le bohwa.
13 Lena Bajuda le lena Baisiraele, ka ge ditšhaba di be di le rogaka, ke tla le phološa gomme ka le šegofatša. Le se ke la boifa. Tiang matla.’
14 “Jehofa wa madira o re: ‘“Mathomong ke be ke ikemišeditše go le dira dilo tše mpe ka gobane borakgolokhukhu ba lena ba ile ba nkgalefiša, gomme ka se itshole,” se ke seo Jehofa wa madira a se bolelago,
15 “eupša gona bjale ke ikemišeditše go direla batho ba Jerusalema le Bajuda dilo tše dibotse. Le se ke la boifa.”’
16 “‘Lena le swanetše go dira dilo tše: Botšanang nnete. Ge le ahlola dikgorong tša lena, le ahlole ka toka gomme le dire gore batho ba be le khutšo.
17 Le se ke la logelana maanomabe ka dipelong tša lena gomme le tlogele go dira dikeno tša maaka, ka gobane dilo tše ka moka ke di hloile.’ Se ke seo Jehofa a se bolelago.”
18 Jehofa wa madira a bolela le nna gape a re:
19 “Nna Jehofa wa madira ke re: ‘Go itima dijo kgweding ya bone, ya bohlano, ya bošupa le ya lesome e tla ba dinako tša go thaba le tša go hlalala gotee le tša go keteka menyanya go Bajuda. Ka gona, ratang nnete e bile le dire gore go be le khutšo.’
20 “Jehofa wa madira o re: ‘Go tla tla nako yeo batho ba merafo le badudi ba metse e mentšhi ba tlago go tla lefelong le,
21 gomme badudi ba motse o mongwe ba tla ya go ba motse o mongwe, ba re: “A re yeng re kgopele gore Jehofa a re gaugele le go hlankela Jehofa wa madira. Le rena re tla ya.”
22 Batho ba merafo e mentšhi le ditšhaba tše matla ba tla tla ba tsoma Jehofa wa madira Jerusalema le go kgopela gore Jehofa a ba gaugele.’
23 “Jehofa wa madira o re: ‘Mehleng yeo batho ba lesome bao ba tšwago ditšhabeng tša maleme ka moka ba tla itshwarelela seaparong sa Mojuda, ba re: “Re nyaka go sepela le lena ka gobane re kwele gore Modimo o na le lena.”’”
