Sefela sa Difela 4:1-16
4 “Bona gore o botsana bjang wena moratiwa wa ka!
Bona gore o botsana bjang!
Mahlo a gago a swana le a maeba ge a širilwe ke lešira la gago.
Moriri wa gago o swana le mohlape wa dipudiTšeo di theogago dithabeng tša Gileada.
2 Meno a gago a swana le mohlape wa dinku tšeo di sa tšwago go kotwa,Tšeo di sa tšwago go hlapišwa,E nngwe le e nngwe e sepela le lefahla la yona,Ga go na yeo e ilego ya tswala ngwana gomme a hwa.
3 Melomo ya gago e swana le thapo ya mmala o mohwibiduhwibidu,E bile ge o bolela o ntšha mantšu a mabosana.
Marama a gago ao a širilwego ke lešira la gagoA swana le seripa sa garenate.
4 Molala wa gago o swana le tora ya DafidaYeo e agilwego ka maswika,Yeo go fegilwego dikotse tše 1 000 (sekete) go yona,Dikotse ka moka tša banna ba matla.
5 Matswele a gago a swana le bana ba babediBa mafahla ba phala,Bao ba fulago gare ga mapolomo a dilili.”
6 “Pele ga ge phefo ya mosegare e ka fokaLe pele ga ge meriti e ka nyamalala,Ke tla ya thabeng ya mehlašana ya mira le mmotong wa mehlašana ya diorelo.”
7 “O yo mobotsana mo gohle wena moratiwa wa ka,Le gona ga go na moo o sodišago gona.
8 Tloga le nna Libanoni wena monyadiwa wa ka,Tloga le nna Libanoni.
A re theoge thabeng ya Amana,Thabeng ya Senire. Thabeng ya Heremone,Re tloge dithabeng tšeo go dulago ditau le mapogo.
9 O utswitše pelo ya ka wena kgaetšedi ya ka, wena monyadiwa wa ka,O utswitše pelo ya ka ka go no ntebelela gatee feela,O utswitše pelo ya ka ge ke bona pheta ya gago.
10 Tsela yeo o mpontšhago lerato ka yona e kgahliša kudu wena kgaetšedi ya ka, wena monyadiwa wa ka!
Tsela yeo o mpontšhago lerato ka yona e phala beine,Gomme monkgo wa senkgišabose sa gago o phala dinkgišabose ka moka.
11 Wena monyadiwa wa ka, melomo ya gago e elela todi yeo e tšwago lemapong.
Ka fase ga leleme la gago, go na le todi ya dinose le maswiE bile diaparo tša gago di nkga bose go swana le sethokgwa sa Libanoni seo se nkgago bose.
12 Wena kgaetšedi ya ka, wena monyadiwa wa ka, o swana le serapa se se ageleditšwego,O swana le serapa seo se ageleditšwego le sediba seo se tswaletšwego.
13 Makalana* a gago a swana le paradeise* ya digarenate,Yeo e nago le dienywa tšeo di phalago tše dingwe ka moka, le dimela tša mehenna gotee le tša menarede,
14 Menarede le mapolomo a safrona, lehlaka la go nkga bose le sinamone,Gotee le mehuta ka moka ya mehlare ya diorelo, mira le dikgopha,Le dimela ka moka tšeo di nkgago bose.
15 O swana le sediba seo se nošetšago serapa, sediba sa meetse a go nwa,Le dinokana tšeo di elelago go tšwa Libanoni.
16 Phafoga wena phefo ya leboa,Etla wena phefo ya borwa.
Fokela serapeng sa ka.
Anke go kwagale monkgo o mobose wo o tšwago serapeng seo.”
“Anke moratiwa wa ka a tle serapeng sa gagweGomme a je dienywa tše di phalago tše dingwe ka moka.”
