Sefela sa Difela 5:1-16
5 “Ke tsene serapeng sa kaWena kgaetšedi ya ka, wena monyadiwa wa ka.
Ke robile sehlašana sa ka sa mira le sehlašana sa ka sa senkgišabose.*
Ke jele todi ya ka ya dinose le mamapo a ka,Ka nwa beine ya ka le maswi a ka.”
“Ejang lena baratani!
Enwang gomme le tagwe ke lerato!”
2 “Ke robetše, eupša boroko ga bo tle.*
Ke kwa moratiwa wa ka a kokota!
‘Anke o mpulele wena kgaetšedi ya ka, moratiwa wa ka,Leebana la ka, kgarebe ya ka e botsana!
Ka gobane hlogo ya ka e kolobišitšwe ke phoka,E bile meriri ya ka e kolobišitšwe ke phoka ya bošego.’
3 Ke apotše seaparo sa ka,
Ke se apare gape?
Ke hlapile maoto a ka,
Ke a tlotše ditšhila gape?
4 Moratiwa wa ka o gomišitše seatla sa gagwe lešobeng la mojako,Gomme nna ka thoma go hlologela go ba le yena.
5 Nna ka emelela gore ke bulele moratiwa wa ka mojako.Diatla tša ka di be di rotha senkgišabose sa mira,Gomme menwana ya ka e elela makhura a miraA tšhela mekgoko ya mojako.
6 Ke ile ka bulela moratiwa wa ka,Eupša ka hwetša moratiwa wa ka a se gona, o be a tlogile.
Ke ile ka nyama kudu ge ke sa mmone.*
Ke ile ka mo nyaka eupša ka se mo hwetše.
Ka mmitša eupša a se nkarabe.
7 Bahlapetši bao ba bego ba dikologa motse ba ile ba mpona.
Ba nteile gomme ba nkgobatša.
Bahlapetši ba nkapotše seaparo sa ka sa ka ntle.
8 Lena barwedi ba Jerusalema,
Nkeneleng gore ge e ba le ka bona moratiwa wa kaLe tla mmotša gore ke lwatšwa ke lerato.”
9 “Wena yo mobotse gare ga basadi,Moratiwa wa gago o phala banna ba bangwe ka’ng?
Moratiwa wa gago o phala banna ba bangwe ka’ngGe o bile o re diriša keno ye?”
10 “Moratiwa wa ka o botsana e bile o phetše gabotse,O phala batho ba 10 000 (dikete tše lesome).
11 Hlogo ya gagwe ke e botsana bjalo ka gauta, bjalo ka gauta e sekišitšwego.
Meriri ya gagwe e ya pele le morago bjalo ka mahlare a mopalema.Boso bja yona bo swana le bja legokobu.
12 Mahlo a gagwe a swana le maebana ao a dutšego dinokaneng tšeo di nago le meetse,Ao a hlapago ka maswi,E bile a dutše kgauswi le sediba.
13 Marama a gagwe a swana le serapana seo go bjetšwego mehlašana yeo e nkgago bose,Bjalo ka dinoko tšeo di nkgago bose tšeo di bjetšwego mebotwaneng.
Melomo ya gagwe e swana le mapolomo a dilili ao a elelago makhura a mira.
14 Menwana ya gagwe ke ya gauta, gomme manala a gagwe a kgabišitšwe ka kirisolite.
Mmele wa gagwe o swana le lenaka la phoofolo leo le kgabišitšwego ka maswika a bohlokwa a safire.
15 Maoto a gagwe a swana le diphilara tša mmabole tšeo di lego godimo ga gauta e sekišitšwego.
Ke yo mobotsana go swana le naga ya Libanoni, e bile ke yo motelele go swana le mehlare ya metsedara.
16 Melomo ya gagwe e bose go swana le todi ya dinose,E bile se sengwe le se sengwe ka yena se a ratega.
Lena barwedi ba Jerusalema, yo ke yena moratiwa wa ka, le ke lona lesogana la ka.”
Mengwalo ya tlase
^ Goba, “dinoko.”
^ Phetolelo ya lentšu ka lentšu e re, “eupša pelo ya ka e phafogile.”
^ Goba mohlomongwe, “Ke nyakile ke idibala ge a bolela.”
