Tsefanya 3:1-20
3 Go madimabe motse wo o hlanogilego, wo o šilafetšego le wo o gatelelago badudi ba wona!
2 Ga se wa theetša lentšu. Ga se wa amogela tayo.
Ga se wa ithekga ka Jehofa, e bile ga se wa batamela kgauswi le Modimo wa wona.
3 Baetapele ba wona ba swana le ditau tše di rorago.
Baahlodi ba wona ba swana le diphiri tša bošego.Ga ba tlogele le lerapo leo ba tlago go le kokona go fihla bo esa.
4 Baporofeta ba wona ba a ikgogomoša e bile ba radia batho.
Baperisita ba wona ba šilafatša dilo tše kgethwa.Ba tshela melao ya Modimo.
5 Jehofa o lokile e bile o gare ga badudi ba wona. Ga a dire selo sa go hloka toka.
Go swana le letšatši leo le dulago le hlaba,O dira gore batho ba tsebe melao ya gagwe mesong e mengwe le e mengwe
Eupša motho yo a sa lokago, ga a hlabje ke dihlong.
6 “Ke fedišitše batho ba ditšhaba gomme ditora tša bona tšeo di lego dikhoneng tša maboto, tša šala di se na motho.
Ke sentše diterata tša bona gore go se sa ba le yo a sepelago go tšona.
Metse ya bona e tlogetšwe e le mašope e bile ga go sa na motho yo a dulago go yona.
7 Ka re go bona: ‘Ruri le tla mpoifa gomme la amogela tayo’
E le gore ke se ke ka otla badudi ba motse ka baka la dibe tša bonaLe gore motse wa bona o se ke wa senywa.
Eupša bona ba be ba ikemišeditše go dira dilo tše mpe le go feta.
8 Jehofa o re: ‘Ka gona dulang le ntetetše,Go fihla letšatši leo ke hlaselago batho gomme ke ba tšeela dilo tša bona tše bohlokwa.Ke ikemišeditše go kgoboketša ditšhaba le mebušoE le gore ke di galefele kudu,Ka gobane kgalefo ya ka e swana le mollo wo o tšhumago lefase ka moka.
9 Ka morago ga moo, ke tla fetoša leleme leo batho ba le bolelago gore ba bolele leleme le le sekilego,E le gore ka moka ga bona ba tumiše leina la ka, e lego JehofaGomme ba ntlhankele ka botee.’
10 Batho ba ka bao ba nthapelago, e lego bao ba tletšego le naga,Ba tla ntlišetša dimpho ba etšwa tikologong ya dinoka tša Ethopia.
11 Letšatšing leo, le ka se lewe ke dihlongKa baka la dilo ka moka tšeo le di dirilego gore le ntlhanogele.Ke tla tloša batho bao ba ikgogomošago gare ga lena.Le gona le ka se sa boela la ikgantšha thabeng ya ka e kgethwa.
12 Ke tla dira gore batho bao ba ikokobeditšego le ba maemo a tlase ba šale gare ga lena.Le gona ba tla šireletšega leineng la ka, e lego Jehofa.
13 Baisiraele bao ba šetšego ba ka se dire dilo tšeo di sa lokago.Ba ka se bolele maaka e bile ba ka se fore batho ba bangwe ka melomo ya bona.Go swana le dinku, ba tla ja ba ba ba robala e bile ga go na motho yo a tlago go ba tšhoša.”
14 Lena batho ba Tsione, goeletšang le thabile!
Wena Isiraele, goeletša o thabile!
Lena batho ba Jerusalema, thabang ka dipelo tša lena ka moka!
15 Jehofa o tlošitše kotlo yeo a bego a le otlile ka yona.
O gomišitše manaba a lena.
Jehofa Kgoši ya Isiraele o na le lena.
Le ka se sa boifa masetlapelo.
16 Ka letšatši leo, Jerusalema e tla botšwa gore:
“O se ke wa boifa wena Tsione.
O se ke wa dumelela pelo ya gago e nyama.*
17 Nna Jehofa Modimo wa lena, ke na le lena.
Ka ge ke na le matla, ke tla le phološa.
Ke tla le thabela kudu.
Ke tla kgotsofatšwa kudu ke gore ke a le rata.
Ke tla le thabela kudu.
18 Ke tla kgoboketša bao ba nyamišitšwego ke gore ba be ba se gona menyanyeng ya lena.Ba be ba se gona ka gobane ba be ba le bothopša e bile batho ba be ba ba kwera.
19 Ka nako yeo, ke tla le lwela go batho bao ba le gatelelago.Ke tla phološa yo a hlotšago.Ke tla kgoboketša bao ba phatlaletšego.
Ke tla dira gore ba hlomphiwe le go tumaNageng ka moka yeo ba bego ba lešwa dihlong go yona.”
20 Jehofa o re: “Ka nako ya ge ke le kgoboketša, ke tla le amogela.Ge ke buša batho ba gabo lena bao ba thopilwego,
Ke tla dira gore le hlomphiwe le go tuma gare ga batho ka moka ba lefaseng.Le tla bona ge seo se direga.”
Mengwalo ya tlase
^ Phetolelo ya lentšu ka lentšu e re, “O se ke wa dumelela letsogo la gago le fela matla.”
