Modimo o re ngwaletše Bbeiele ya Mangwalo a Makgethwa gore a bolele le rena ka moka. Re swanetše go ithuta yona gore re tsebe Mongwadi wa yona gabotse. (Johane 17:3; 2 Timotheo 3:16) Ka Beibeleng, Jehofa Modimo o re botša gore ke ka baka la eng a bopile batho le lefase leo a ba filego lona gore e be legae la bona.—Genesi 3:15; Kutollo 21:3, 4.

Ga go na puku e nngwe yeo e kgonago go fetoša maphelo a batho go swana le Beibele. Beibele e re thuša gore re kgone go bontšha dika tša Jehofa tša go swana le lerato, kgaugelo le kwelobohloko. E nea batho kholofelo le go ba thuša gore ba kgotlelele le ge ba welwa ke mathata a magolo. Le gona, e re botša ka dilo tše mpe tšeo di diregago mo lefaseng le gore ga di dumelelane le thato ya Modimo.—Psalme 119:105; Baheberu 4:12; 1 Johane 2:15-17.

Mathomong Beibele e be e ngwadilwe ka Seheberu, Searama le Segerika. Beibele e fetoletšwe ka moka ga yona goba ka karolo ya yona ka maleme ao a fetago a 3 000. Lefaseng ka moka, ga go na puku yeo e fetoletšwego ka maleme a mantši le go newa batho go swana le yona. Taba ye ga e makatše ka gobane boporofeta bja Beibele bo re: “Ditaba tše tše dibotse tša Mmušo [e lego molaetša o mogolo wa ka Beibeleng] di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Ka ge re bone gore molaetša wa Beibele o bohlokwa, re ile ra bona go le kaone gore re kaonefatše tsela yeo o fetoletšwego ka yona, eupša re sa fetoše molaetša wa yona. Re bona re na le boikarabelo bjo bogolo bja go fetolela molaetša wa Beibele ka tsela e nepagetšego. Phetolelo ye e kaonefaditšwego e no tšwetša pele seo se ilego sa dirwa diphetolelong tše fetilego tša Beibele ya Phetolelo ya Lefase le Leswa, e lego Beibele yeo e ilego ya lokollwa la mathomo ka Seisemane mengwageng ya ka godimo ga e 60 e fetilego. Eupša tsela yeo Seisemane se bolelwago ka yona e fetogile. Seo se ile sa dira gore Komiti ya Beibele ya Phetolelo ya Lefase le Leswa e thome mošomo o mogolo wa go kaonefatša phetolelo ye. Re nyaka gore phetolelo ye e kwagale e bile go be bonolo go e bala go e na le gore re no tšweletša feela seo se bego se ngwadilwe mathomong. Dihlogo tša Ditaba tša tlaleletšo tšeo di rego, “Dilo Tšeo di Latelwago ge go Fetolelwa Beibele,” “Dilo tše Dingwe tša ka mo Beibeleng e Kaonefaditšwego,” le “Go Tlile Bjang Gore re Feleletše re na le Beibele?” di hlalosa tše dingwe tša diphetogo tšeo di dirilwego phetolelong ye.

Batho bao ba ratago Jehofa Modimo le go nyaka mo hlankela, ba nyaka go bala Beibele yeo e nepagetšego le yeo e kwešišegago gabonolo. (1 Timotheo 2:4) Ke ka baka leo re dirilego phetho ya gore phetolelo ye ya Seisemane e fetolelwe le ka maleme a mantši ka mo go ka kgonegago. Re a tshepa e bile re rapela gore ge o bala Beibele ye yeo e kaonefaditšego, o tlo bona gore e a go hola ge o dutše o ’tsoma Modimo le go mo hwetša.’—Ditiro 17:27.