Jesu o boditše barutiwa ba gagwe gore: “Le tla ba dihlatse tša ka . . . go fihla karolong ya kgole ya lefase.” (Ditiro 1:8) Lehono Dihlatse tša Jehofa di šoma ka mafolofolo go phethagatša seo. Eupša dikarolo tše dingwe tša lefase go akaretša le mafelo ao go nago le batho ba bantši, ga se gwa tšwe go hwetšwa bohlatse bjo bo lekanego. Le gona dinageng tše dingwe go na le Dihlatse tša Jehofa tše dinyenyane feela. (Mateo 9:37, 38) Re dira’ng gore re fihlelele batho ba bantši ka mo go kgonegago?

 E le gore re fihlelele taelo ye ya Jesu, Komiti ya Tirelo ya Sehlopha se Bušago e abela baromiwa tšhemong yeo go nago le tlhokagalo lefaseng ka moka. Gona bjale go na le baromiwa ba 3 090 lefaseng ka moka. a Bontši bja bona ba ba tlwaeditšwe Dikolong tša Beibele, go swana le Sekolo sa Baebangedi ba Mmušo. Baromiwa ba ikemišeditše go tloga magaeng a bona gomme ba yo dula nageng e nngwe. Ka ge barumiwa ba bao ba godilego moyeng ba, ba tlwaetša ba bange e bile ba na le phihlelo, ba kgona go bolela ditaba tše dibotse le go beela barutiwa ba bafsa mohlala o mobotse.

 Ofising e nngwe le e nngwe ya lekala, Lefapha la Badiredi ba Tšhemong le šoma le Komiti ya Lekala go hlokomela dinyakwa tša maromiwa, go swana le madulo, tša maphelo, le tšhelete yeo ba ka kgonago go phela ka yona. Nakong ya ngwaga wa tirelo wa 2020, Dihlatse tša Jehofa di dirišetše $27 million (U.S.) go hlokomela baromiwa. Re leboga tokišetšo ye kudu ka gobane e thuša baromiwa gore ba diriše matla a bona go ruta batho ditaba tše dibotse le go tiiša phuthego ya bona.

 Baromiwa ba thušitše bjang modirong wa go ruta ditaba tše dibotse? Frank yo a hlankelago e le setho sa Komiti ya Lekala la Malawi, o re: “Ka ge ba na le sebete le bokgoni ba kgona go kgotlelela mathata a go swana le maleme ao a sa bolelwego moo ba dulago le mafelo ao go sa tsenwego ga bonolo. Le gona go šoma ga bona ka thata ka go ithuta leleme le lefsa le setšo se sefsa go kgothatša ba bangwe le go ba beela mohlala o mobotse, le gona ba kgothaletša bafsa gore ba tsenele tirelo ya nako e tletšego. Re leboga Jehofa ka baromiwa ba.”

 Setho se sengwe sa Komiti ya Lekala se itše: “Baromiwa ke mehlala ya go bontšha gore bahlanka ba Jehofa ke batee lefaseng ka moka. Le batho bao e sego Dihlatse tša Jehofa ba kgona go bona gore ga re aroganywe ke ditšo le gore re batee lefaseng ka moka.”

 Barumiwa ba thuša bjang bagoeledi ba phuthegong? Paulo yo a tšwago Timor-Leste, o leboga baromiwa bao ba abetšwego phuthego ya gabo. O re: “Mo re dulago go fiša kudu. Eupša le ge baromiwa ba tšwa mafelong a go tonya, ga ba dumelele maemo a leratadima a ba thibela go bolela ditaba tše dibotse. Ba phela ba le gona mesong e mengwe le e mengwe sebokeng sa tirelo ya tšhemo. Ke phela ke ba bona ba dira maeto a go boela mosegare ge go fiša kudu le thapama. Ba thušitše batho ba bantši go ithuta therešo lenna ba nthušitše. Ka ge ba ikemišeditše e bile ba na le mafolofolo ba diriša maphelo a bona go hlankela Jehofa, le gona se se dira gore phuthego ka moka e nyake go hlankela Jehofa ka mo go oketšegilego.”

 Ketti, yo e lego mmulamadibogo wa ka mehla kua Malawi, o boletše kamoo baromiwa ba thušitšego lapa la gagwe ka gona. O re: “Ge baromiwa ba be ba abelwa phuthego ya rena, ke be ke le Hlatse ke nnoši ka gae. Eupša banyalani bao ba ile ba nthekga gomme ba tlwaelana le lapa la laka. Mohlala wa bona o thušitše bana ba ka go bona gore go hlankela Jehofa go a thabiša le go kgotsofatša. Ka ge baromiwa bao ba be ba bea mohlala o mobotse, gona bjale barwedi ba ka ba bararo ke babulamadibogo ba ka mehla e bile monna wa ka o thomile go tla dibokeng.”

 Ditshenyagalelo tša baromiwa di lefya ka eng? Ka meneelo yeo e ntšhwago modirong wa lefase ka moka, yeo gantši e ntšhwago go dirišwa donate.pr418.com. Meneelo ye yeo e ntšhwago go tšwa pelong e lebogwa kudu.