Seo Dihlatse tša Jehofa di ilego tša se thabela ngwageng wo, ke go bogela Karolo ya pele ya bidio ya Bophelo le Bodiredi bja Jesu. Bana ba borena ba dimilione ba šetše ba e bone. Gomme ye ke karolo ya pele go dikarolo tše 18. Go dirilwe eng gore bidio ye e be gona, gomme wena ke eng seo o se dirilego go thuša gore bidio ye e be gona?

 Lekaleng la Australasia elego lefelong leo bontšhi bja bidio ya Ditaba tše Dibotse e tšerwego gona, batho ba e ka bago ba 50 go ya go 80 ba ba gona ge karolo e nngwe le e nngwe e rekhotiwa. a Go na le bana ba borena le dikgaetšedi bao ba neago batšea karolo dijo tša mesong, tša mosegare le dilo dingwe. Ba di lokišeletša e sa le pele. Esther yo a šomago ka Lefapheng la Dijo o re: “Re reka dijo tšeo di lego maemong a mabotse ka theko ya tlasana mafelong a fapafapanego. Ebile re dula re fetoša tsela yeo re apeago ka yona ele gore re se ke ra senya dijo.” Letšatši le lengwe le le lengwe re diriša ditolara tše nne go motho yo tee bakeng sa dijo.

 Bao ba tšeago karolo go dira bidio ye, ga ba hloke dijo feela eupša ba hloka le go šireletšwa. Ba hloka go šireletšwa go eng? Naga ya Australia e a fiša ebile e ruthetše eupša ka dinako tše dingwe e fiša kudu. Ele gore batho ba se ke ba fišwa ke letšatši le go lapišwa ke phišo, bana ba borena le dikgaetšedi bao ba šomago ka thata ba hloma ditente, diamporela le go kgonthišetša gore meetse le dilo tše dingwe tša bohlokwa di ba gona. Kevin yo a šomago ka Lefapheng la Didirišwa tša Modumo le Bidio o re: “Bontšhi bja bana ba borena le dikgaetšedi bao ba dirago mošomo wo ba thuša Bethele. Ba dira mošomo wo le e mengwe e mentšhi ka lethabo le boikokobetšo. Re be re ka se kgone go dira mošomo wo ka ntle le bona.”

 Dikarolo tše dingwe di ka no se bonagale gabotse ge di ka rekhotelwa ofising ya lekala goba ka setudiong. Mabakeng a bjalo go ka dirišwa lefelo le lengwe go rekhota bidio. Ele gore go rekhotiwe dikarolo tša mehleng ya kgale ya Beibele mo go se nago dithapo tša mohlagase, sekontiri le dintlo tša sebjalebjale, batšea karolo ba swanetše go ya lefelong la kgole ele gore ba kgone go rekhota bidio ye. Go hlokagala motho yo a tlago go paka le go iša didirišwa gotee le diaparo tšeo di tlago go šoma moo go rekhotelwago gona. Pele go ka rekhotiwa bidio ye, mothuši wa balomaganyi bao ba dirago bidio ye, o kgonthišetša gore go ba le generator, meetse ao a hlwekilego a go nwa, dintlwana tša boithomelo le tše dingwe. Batšea karolo ba amogelwa magaeng a bana ba borena ba lefelong leo, dikharabaneng le dihoteleng.

 Go rekhota bidio lefelong le lengwe go a tura ebile go ka lapiša le bao ba tšeago karolo. Ka gona ka 2023, Sehlopha se Bušago se ile sa dumelela gore go dirišwe 2.5 milione ya ditolara tša Amerika, go reka sedirišwa seo se tla ba thušago gore ge ba tšea bidio go bonagale eka ba mafelong a fapafapanego. Sedirišwa se sa thekinolotši se dira gore diswantšho di bonagale gabotse gomme go bonagale eka bidio yeo e rekhotilwe ka ntle. Seo se tla dira gore re se ke ra ba le ditshenyagalelo tše dintšhi ge re rekhota lefelong le lengwe. Darren, yo e lego wa leloko la lekala la Australasia o re: “Ka mohlala ge eba re be re swanetše go rekhotela ka ntle, re be re swanetše go dira seo pele letšatši le sobela eupša ka baka la sedirišwa se se seswa sa thekinolotši re kgona go rekhota dikarolo tšeo di hlokago gore go be le letšatši gantšhi le gantšhi go fihlelela re kgotsofala.”

 Go nyakega batšea karolo ba bantšhi bakeng sa karolo e nngwe le e nngwe ya bidio ye ya Ditaba tše Dibotse. Ba ikwa bjang ka maiteko ao bana ba borena le dikgaetšedi ba a dirago gore ba ba hlokomele?

 Amber, yo a sepetšego dikhilomithara tša ka godimo ga tše 700 go tšwa legaeng la gagwe kua Melbourne bakeng sa go tlo tšea karolo bidiong yeo o re: “Go thoma ge ke sa fihla boema fofane bana ba borena ba kua Bethele ba ile ba ntlhokomela kudu. Bontšhi bja bana ba borena ba ba ile ba ntaletša dijong goba go nwa teye le bona ge bidio e dutše e rekhotiwa. Batho ka moka ba ile ba ntira gore ke ikwe ke lokologile ebile ke ratwa. Leeto le le ile la ntira gore ke ikwe ke šegofaditšwe. Ga se gwa bonala eka ke boikgafo!”

 Derek yo a šomago ka lefapheng la go dira dibidio o re: “Mafapha a mantšhi a re thušitše ga e sa le re thoma go rekhota bidio ye. Ke leboga go šoma le bana ba borena le dikgaetšedi bao ba bego ba bontšha boikgafo ka go diriša nako ya bona, dilo tša bona tšeo di bonagalago le matla a bona bakeng sa bidio ye. Ba re thekga le go bontšha maikemišetšo ebile ba botho. Jehofa o tloga a re šegofaditše ka moka ga rena. Ke kgodišegile gore Modimo o na le taba le kamoo re dirago mošomo woo ka gona e sego feela kamoo mošomo o fedilego ka gona.”

 Re leboga thekgo yeo le e bontšhitšego ge go be go rekhotiwa bidio ye ka meneelo ya lena, go akaretša le yeo e ntšhitšwego go donate.pr418.com.