Mmino ke mpho e botse yeo e tšwago go Jehofa. O ka kgoma kamoo re naganago ka gona, wa fetoša kamoo re ikwago ka gona, wa ba wa re fa mafolofolo. Le dikoša tša rena di bjalo. Sa bohlokwa le go feta: dikoša tša rena di ka re batametša kgaufsi le Jehofa.

 Ga e sa le go tloga ka 2014, go tšweleditšwe dikoša tša ka godimo ga tše 70, gomme bonyenyane e tee ya dikoša tše e hwetšagala ka maleme a fetago a 500! Mohlomongwe o ka ba o ile wa ipotšiša gore, ‘Ke bomang ba šomago ka dikoša tše, gona di tšweletšwa bjang?’

 Dikoša tše di tšweletšwa ke bana babo rena le dikgaetšedi bao ba šomago Lefapheng la Audio/Video, bao ba latelago tlhahlo ya Komiti ya go Ruta ya Sehlopha se Bušago. Bana ba babo rena le dikgaetšedi ba 13 ba thuša ka go hlama dikoša tše, go šoma ka metšhene ya go di tšweletša gotee le ka mešongwana ye mengwe yeo e sepedišanago le seo. Godimo ga mo, Komiti ya go Ruta e kgethile bana babo rena le dikgaetšedi bao ba tšwago dinageng tša go fapafapana bao ba šomago ba le gae go thuša ka go tšweletša mmino le go opela. Bana babo rena ba le dikgaetšedi ba diriša bokgoni bja bona ba sa inyakele botumo.

 Dikoša tše di tšweletšwa bjang? Sa pele, Komiti ya go Ruta e kgetha Mangwalo ao koša e swanetšego go tšwa go wona le kamoo e swanetšego go dira batheetši gore ba ikwe ka gona. Ke moka sehlopha sa go šoma ka mmino, se thoma go hlama koša le go ngwala mantšu a yona. Ke moka sa rekhota koša yeo le go e romela go Komiti ya go Ruta gore e e hlahlobe. Komiti ya go ruta e hlahloba koša yeo le go dira ditšhišinyo. Ke moka sehlopha sa go šoma ka mmino sa e lokiša, gomme sa e rekhota la mafelelo. Dikoša tše di rekhotwa mafelong a fapafapanego, go akaretša diofising tša makala le magaeng a bao ba nago le dilo tša go rekhota.

 Sehlopha sa go šoma ka mmino se diriša mananeo a go fapafapana a khomphutha go hlama dikoša le go di rekhota. Modiro wo o nyaka le gore ba diriše dilo tša go swana le diletšo tša mmino, dipikara, dimaekrofouno le tše dingwe. Maekrofouno o tee o ka bitša tšhelete ya go tloga go diranta tše 1 700 go ya go tše 17 000 goba le go feta moo. Ka 2020, re dirišitše diranta tše dimilione tše 1.98 mo didirišweng tša go rekhota mmino.

 Go dirwa maiteko afe bakeng sa go seketša ditšhelete tša meneelo? Go e na le go ba le sehlopha se segolo seo se tšweletšago mmino Bethele, go dirišwa baithaopi ba bantši bao ba šomago ba le gae. Godimo ga moo, bana babo rena ba hlama le go rekhota mmino ba diriša lenaneo la khomphutha leo le kgonago go tšweletša medumo ya diletšo tša go fapafapana, go e na le go biletša diopedi tše dintši lefelong le tee.

 Bana babo rena le dikgaetšedi ba rata dikoša tša rena. Tara yo a dulago Jeremane o re: “Dikoša tše, di dira gore ke imologe ge ke tshwenyegile. Ge ke di theeditše ka leleme la gešo ke kwa e ka Jehofa o nkgokaretše.” Ngwanabo rena Dmitry yo a dulago Kazakhstan o re: “Ke rata go theetša dikoša tša rena ka gore di nkgothaletša gore ke dire dilo tše dibotse, go fapana le dikoša tša batho bao ba sa hlankelego Jehofa. E bile di nthuša gore ke dule ke na le segwera se sebotse le Jehofa.”

 Delia yo a dulago Afrika Borwa o re: “Dikoša tše di tiiša tumelo ya ka. Ge ke na le mathata goba ke nyamile, go dula go na le koša yeo e swanelago maemo ao ke lego go ona. Gantši morethetho wa koša feela, o dira gore ke ikwe kaone.”

 Go na le dikoša tše dingwe tšeo di ratwago kudu. Lerato yo le yena a tšwago Afrika Borwa o re: “Koša ya ‘Paradeise e Fihlile,’ le ya ‘Lefase le Lefsa le Kgaufsi,’ di dira gore ke ipone ke le lefaseng le lefsa ke amogela mma wa ka yo ke mo ratago. Ka mehla ge ke theeditše dikoša tše, ke nagana ka yena a nkitimela a butše matsogo a gagwe gore a nkgokarele.”

 E nngwe ya dikoša tša rena e thušitše ngwanenyana yo mongwe wa kua Sri Lanka kudu. O re: “Morutiši wa ka wa go ruta saense o ile a nkwera ka klaseng ka ge ke le Hlatse ya Jehofa. Ke be ke tšhogile, e bile ke sa tsebe gore ke re’ng. Ge ke fihla gae, mma o ile a re ke theetše koša yeo e rego ‘Bala o Tie.’ Koša ye e ile ya nthuša gore ke dire nyakišišo le gore ke itokišetše gore ke tla araba bjang. Letšatši le le latelago ke ile ka boledišana le morutiši wa ka. O ile a ntheetša a ba a bolela gore o leboga go tseba seo Dihlatse tša Jehofa di se dumelago. Ke leboga mokgatlo wa Jehofa ka go tšweletša dikoša tše tšeo di kgothatšago.”

 Tšhelete ya go tšweletša dikoša tše e tšwa kae? Ke meneelo ya modiro wa lefase ka moka yeo bontši bja yona bo ntšhwago go donate.pr418.com. Re le leboga ka moka ka meneelo yeo le e ntšhago go tšwa pelong.