Bafetoledi bao ba fetago diperesente tše 60 ba šomela diofising tša bofetoledi (RTO), e sego diofising tša makala. Ke ka baka la’ng go nyakega di-RTO? Bafetoledi ba hloka didirišwa dife gore ba kgone go šoma gabotse di-RTO? Le gona lefelo leo bafetoledi ba fetolelago go lona le ama bjang bofetoledi bja bjona?

 Di-RTO di thuša bafetoledi go dula mo batho ba bantši ba bolelago leleme leo ba le fetolelago. Karin yo a fetolelago Sejeremane sa ka Leboa o re :“ Ga e sa le re hudugela RTO yeo e lego Cuauhtémoc, Chihuahua, Mexico re dula re bolela Sejeremane sa ka Leboa le bafetoledi gotee le rena, ge re le tšhemong le ge re le mabenkeleng. Re dula gare ga batho bao ba bolelago segagabo rena, re dula re ekwa dipolelwana tšeo re feditšego nako e telele re sa di kwe e bile re ithuta le mantšu ao batho ba a dirišago gona bjale le ao ba se sa a dirišago.”

 James yo a šomago le sehlopha sa go fetolela Sefrafra kua Ghana, o dumela gore ka dinako tše dingwe o fela a hlolosela bana babo rena le dikgaetšedi bao ba lego Bethele. Eupša o oketša ka go re: “Ke rata go šomela RTO. Go boledišana le batho tšhemong ka segagešo le go bona kamoo ba arabelago ka gona ge ba ekwa ditaba tše dibotse go nthabiša kudu.”

 Bana babo rena ba lebelela eng ge ba kgetha mo RTO e tlago go ba gona? Joseph yo a šomago Lefapheng la Lefase ka Bophara la Bohlami le la go Aga, leo le lego Warwick, New York, U.S.A. o re :“ Bothata bjo bongwe bjo re kopanago le bjona ke gore mafelo a mangwe ga a dule a na le mohlagase, meetse goba inthanete yeo e nyakegago gore mešomo ya bofetoledi e kgone go romelwa. Ka gona ge re dira RTO re ka swanelwa ke go lebelela mafelo a mantši ao leleme leo le bolelwago go ona.”

 Ge re bolela ka kakaretšo tsela e kaone ya go dira RTO ke go diriša Holo ya Kopano, Holo ya Mmušo goba Legae la Baromiwa leo bafetoledi ba ka kgonago go šoma go lona ba dula magaeng a bona. Ge e ba meago yeo e se gona, bana babo rena ba dumelelwa gore ba reke meago ya bodulo yeo bafetoledi ba ka dulago go yona, le diofisi tšeo ba ka šomelago go tšona. Ge e ba dinyakwa tša sehlopha seo di ka fetoga, meago yeo e ka rekišwa gomme tšhelete yeo ya dirišwa mo go nago le tlhokagalo.

 Ngwageng wa tirelo wa 2020, re dirišitše R195 021 450 go thuša di-RTO gore di tšwele pele di šoma. Bafetoledi bao ba lego di-RTO ba swanetše go ba le dikhomphutha, mananeo a itšego a dikhomphutha, didirišwa tša go rekhota, inthanete le dilo tše dingwe tša go swana le meetse le mohlagase. Go nyakega R11 251, 24 gore mofetoledi o tee a kgone go ba le khomphutha yeo e nago le mananeo ka moka ao a a hlokago go fetolela. Di khomphutha tšeo di tsenywa mananeo a mangwe ao a rekišwago gotee le Watchtower Translation System, e le go lenaneo leo le thušago bafetoledi, go dira mošomo wa bona.

 Go oketša moo bafetoledi ba hwetša le didirišwa tša go rekhota, tšeo di ba thušago go rekhota ge ba le di-RTO. Didirišwa tšeo di thušitše kudu ge go be go thoma bolwetši bja COVID-19, ka gobane bafetoledi ba bantši ba ile ba kgona go ya le tšona magaeng a bona gomme ba tšwela pele ba rekhota dikgatišo le dibidio.

 Bana babo rena le dikgaetšedi bao ba dulago kgauswi le di-RTO ba thuša bao ba lego di-RTO ka go hlahloba dilo tšeo ba di fetoletšego le ka go hlokomela meago ya di-RTO. Cirstin yo a hlankelago Ofising ya Bofetoledi ya Afrikaanse yeo e lego Cape Town, Afrika Borwa o re: “Bagoeledi ba bantši le babulamadibogo ba ba le sebaka sa diriša bokgoni bja bjona mo.”

 Bana babo rena bao ba thabela tokelo ye kudu. Kgaetšedi yo mongwe yo a thušago RTO o re: “Go šoma RTO go a lapološa.” Bana babo rena ba bangwe le dikgaetšedi bao ba dulago kgauswi le di-RTO ba fela ba eya go thuša ka go rekhota. Juana yo a fetolelago se Totonac nageng ya Veracruz, Mexico, o re: “Ga bjale ka gore re kgauswi le ditoropo tšeo di bolelago segagabo rena go bonolo gore bana babo rena le dikgaetšedi ba tle go thuša ka go rekhota dilo tšeo di theetšwago le dibidio.”

 Eupša na di-RTO tše di ile tša thuša bafetoledi go kaonefatša bofetoledi bja bona? Ba bantši ba dimilionemilione bao ba balago dikgatišo tša rena ba re ee. Cédric yo a šomago le sehlopha sa go fetolela Sekongo kua Democratic Republic of Congo, o re:“ Bana babo rena ba bangwe le dikgaetšedi ba be ba re dikgatišo tša rena di fetolelwa ka Sekongo seo se kwešišwago ke Dihlatse tša Jehofa fela, ka gobane Sekongo seo re bego re se fetolela se be se sa tlwaelega. Eupša gona bjale ba re dikgatišo tša rena di fetolelwa ka Sekongo seo se tlwaelegilego seo batho ba se dirišago letšatši le lengwe le le lengwe.”

 Andile yo a šomago le sehlopha sa se-Xhosa seo se le go Afrika Borwa le yena o ile a kwa taba e swanago o re: “Batho ba bantši ba re botša gore ga bjale ba kgona go bona phapano go dikgatišo tšeo re di fetolelago. Le bana bao ba bego ba bala Morokami ka Sekgowa ga bjale ba o bala ka se-Xhosa. Ba rata le Beibele yeo e kaonefaditšwego ya Phetolelo ya Lefase le Lefsa ka gobane ga bjale e kwagala le go kwešišega go feta mathomong.”

 Ditshenyagalelo ka moka tšeo di bago gona ge go dirwa RTO, ge e hlokomelwa le ge e tsenywa thoto di patelwa bjang? Di patelwa ka meneelo yeo e ntšhwago lefaseng ka moka go akaretša le yeo e ntšhwago go dirišwa donate.pr418.com.