Mengwageng yeo e fetago e lesome, diteroli tša go nea bohlatse e be e dutše e le karolo ya bodiredi bja rena e gogago kgahlego bathong. Lefaseng ka ka moka, diteroli tše di a tsebega. Ga di goge šedi feela, eupša gape di a šomišega. O ka dumelelana le kgaetšedi Asenata wa Poland ge a re: “Diteroli tše di hlamegile ka tsela yeo e sego e thata le ya go rarakana eupša ge o di lebelela di a bogega. Go bonolo go no e tšea wa tloga.”

 Na o kile wa ipotšiša gore ge e le gabotse diteroli tše di hlamilwe, le go dirwa bjang?

 Ka 2001, ka tumelelo ya Sehlopha se Bušago, bana babo rena le dikgaetšedi kua Fora ba ile ba thoma go leka mekgwa e fapafapanego ya go nea bohlatse phatlalatša, go akaretša le wa go diriša diteroli. Ba ile ba leka go di hlama ka ditsela tše mmalwa. Ka mohlala, ba ile ba diriša diteroli tša go rwala merwalo le tša go reka dikorosari gore ba bontšhe le gore ba bee dipuku. Mafelelong lekala la Fora le ile la kgetha tlhamego e tee e swanago yeo bagoeledi ba e dirišitšego ka mengwaga e mentši.

 Bana babo rena ba kua Fora ba ile ba kgahlwa ke dipoelo tša teko ye ya go nea bohlatse phatlalatša. Ka gona ka 2011, Sehlopha se Bušago se ile sa dumelela gore go thongwe lenaneo la go nea bohlatse phatlalatša kua New York City, U.S.A. go šomišwa diteroli le ditafola. Babulamadibogo bao ba bego ba tšea karolo lenaneong leo ba ile ba lemoga gateetee gore diteroli tše di be di na le mehola e mentši go akaretša le kamoo go lego bonolo ka gona go di iša kua le kua. Babulamadibogo ba ile ba nea le ditšhišinyo tša kamoo go ka kaonefatšwago sebopego sa diteroli ka gona. Diteroli tša pele tša go dirwa ka mapolanka di be di roba, go le thata go ka di iša tlase le godimo ditepising. Ka gona di ile tša hlangwa leswa gore di be bofefo, eupša e sego ka tsela yeo di tlago go fefošwa ke moya ge o tšutla. Sebopegong se se seswa le gona go tsentšwe mabilwana a magolwanyana le ao a kgotlelelago morwalo, e lego seo se thušago mafelong a mekotikoti goba a lekgwara. Go oketša moo, di be di na le lepokisana le lenyenyane la go bea dipuku tše di oketšegilego.

 Lenaneo lela la diteko le ile la atlega! Ka gona ka 2012, Sehlopha se Bušago se ile sa dumelela gore diteroli di dirišwe lefaseng ka moka. Go ile gwa dirwa ditokišetšo le batšweletši ba tšona gore ba di dire ka bontši ba diriša ditlabakelo tše bohwefo eupša tša go se onale ka pela.

 Mengwaga ge e dutše e eya, diteroli di be di kaonefatšwa ganyenyaneganyenyane. Ka mohlala, ka 2015 polasitiki e bonagatšago tša ka gare ya go e šireletša puleng e ile ya tsenywa. Dina yo a dulago nageng ya Georgia o tloga a rata se. O re, “Teroli e na le ‘seitšhireletši’ sa yona sa pula sa go šireletša dipuku.” Ka 2017, maleme a mangwe a ile a direlwa diphousetara tša makenete. Tomasz, e lego ngwanabo rena wa kua Poland, o re: “Go fetofetoša diphousetara tšela tša pele tša go kgomarela e be e tloga e le mošomo. Tše tša makenete ke tharollo e botse kudu.” Ka 2019, go ile gwa dirwa diphetogo tše dingwe gape ditlabakelong tša go dira diteroli le kamoo di dirwago ka gona gore di kgone go tšea nako e telele di šomišega.

 Diteroli tša go nea bohlatse di tšweletšwa ke motšweletši o tee gomme tša romelwa lefaseng ka bophara. Gabjale teroli ka e tee e bitša ditolara tše 43 tša Amerika go sa balwe ditshenyagalelo tša thomelo le tše dingwe. Go fihla gabjale, go dirišitšwe tšhelete ya ka godimo ga ditolara tše dimilione tše 16 tša Amerika go tšweletša diteroli, gomme diteroli tša ka godimo ga tše 420 000 di rometšwe diphuthegong lefaseng ka bophara.

 Gore tšhelete ya meneelo e dirišwe gabotse kudu, diteroli di otarwa ka bontši. Go oketša moo, diphuthego bjale di ka otara dikarolo tša diteroli go di lokiša go e na le go otara diteroli tše dingwe tše diswa.

 Bagoeledi lefaseng ka bophara ba ipshina ka go diriša diteroli tša go nea bohlatse. Martina, yo a tšwago Ghana, o re: “Mekgweng e mentši ya bodiredi bja rena, re ya go batho. Seo ke se ratago ka go nea bohlatse ka diteroli ke gore batho ba tla go rena. Gaešita le bafetakatsela ba ka hwetša bohlatse.”

 Nageng ye nngwe ya Afrika, monna yo mongwe o ile a tla teroling gomme a ikhweletša dipuku ka leleme la gabo. O ile a boa bekeng e latelago gomme a re: “Ke badile dipuku ka moka. Molaetša wa tšona ke o bohlokwa kudu. Ke ile go botša le ba gešo kua gae,” e lego motseng woo o bego o le bokgole bja dikhilomithara tše 500. Dikgweding tše pedi ka morago, o ile a boa gomme a re: “Batho ba kua gagešo ba badile dipuku tšela ka moka, gomme ba ipshinne ka seo ba se badilego. Ba nyaka go ba Dihlatse tša Jehofa. Eupša ba na le dipotšišo. Ka mohlala, ba kwešiša gore e le gore ba kolobetšwe ba swanetše gore ba inelwe ka meetseng. Lega go le bjalo, ga re na noka mo motseng. Na re swanetše go tla mo go tlo kolobetšwa?” Bagoeledi ba ile ba mo kopanya le mmulamadibogo yo a bolelago segagabo. Ga e sa le go tloga moo, bobedi ba thabela go boledišana ka mehla.

 Go bona diteroli di dirišwa bodireding “lefaseng ka moka gore e be bohlatse go ditšhaba tšohle” ke mo go kgahlišago kudu. (Mateo 24:14) Ditshenyagalelo tša go di tšweletša di lefelelwa bjang? Di lefelelwa ka meneelo ya modiro wa lefase ka bophara, yeo bontši bja yona e dirwago go donate.pr418.com. Re leboga go fana kudu ga lena ka seatla se se bulegilego.