“Ke feditše mengwaga e 19 ke letile!” Ngwanabo rena o be a leteše eng? O be a letetše Beibele ya Phetolelo ya Lefase le Lefsa ya Mangwalo a Bakriste a Segerika ka leleme la gabo la Sebengali. Batho ba bantši ba ikwa ka tsela e swanago ge ba hwetša Beibele ka maleme a gabo bona. Eupša na o kile wa ipotšiša gore ke eng seo se diregago ge go fetolelwa Dibeibele tše?

 Sa pele, Komiti ya Bongwadi ya Sehlopha se Bušago e kgetha bafetoledi. Go tšea nako e kaakaang go fetolela Beibele? Ngwanabo rena Nicholas Ahladis, yo a šomago ka Ditirelo tša Bofetoledi kua Warwick, New York, o re: “Go lebelelwa dilo tše dintši, go swana le gore go na le bafetoledi ba bakae bao ba ka fetolelago Beibele? Ke batho ba bakae bao ba bolelago leleme leo? Na babadi ba a kwešiša gore bophelo bo be bo le bjang ge Beibele e be e ngwalwa le gore na leleme leo le fapana go ya ka meboto? Gantši go ka tšea ngwaga o tee go ya go e meraro go fetolela Mangwalo a Bakriste a Segerika gomme gwa tšea e mene goba go feta moo go fetolela Beibele ka moka. Go fetolela Beibele ka polelo ya diatla go tšea nako e telele le go feta.”

 Go re Beibele e fetolelwe, ga go hlokege bafetoledi feela. Go hlokega le batho bao ba dulago ditikologong tše di sa swanego, ka dinako tše dingwe le dinageng tše di sa swanego, gore ba tle ba hlahlobe seo se fetoletšwego go bona ge e ba se kwagala le go kwešišega. Ba dira se ka go rata. Ditšhišinyo tša bona di thuša bafetoledi gore ba fetolele Beibele ka tsela yeo e nepagetšego, e kwagalago le e kwešišegago. Ngwanabo rena yo a hlahlago bafetoledi Afrika Borwa o re: “Bafetoledi ba ikwa ba na le boikarabelo bjo bogolo go Jehofa le go batho bao ba tlo balago Lentšu la gagwe, e lego Beibele.”

 Ge mošomo wa go fetolela Beibele o fedile, Beibele yeo e swanetše go phrinthiwa. Go nyakega dilo tše 10 gore Beibele e phrinthiwe. Dilo tšeo ke: maphephe, enke, letlalo la ka ntle, glue, Lešela leo le sa bonagalego leo le kgomaretšwago letlalong la Beibele. Pampiri goba lešela la go kgomarela le le silver, di-ribbon, direkere, dilo tša go dira mokokotlo wa puku, letlakala la go swaraganya Beibele gore e be puku e tee. Ka 2019, go šomišitšwe tšhelete ye e fetago R 200 000 000,00 go reka dilo tše tša go thuša go dira Beibele. Bana babo rena ba go phrintha ba šomile diiri tše di fetago 300 000 ngwageng woo go dira Dibeibele le go di romela.

 Ke ka baka la eng re diriša nako e ntši le tšhelete go dira mešomo yeo? Joel Blue, yo a šomago Lefapheng la go Printha la Ditšhabatšhaba o re: “Beibele ke puku e bohlokwa kudu go dipuku ka moka tšeo re di dirago. Ka baka leo, re nyaka gore ponagalo ya yona e tumiše Modimo yo re mo rapelago le molaetša wa ditaba tše dibotse tšeo re di botšago batho.”

 Re dira Dibeibele tše di tlwaelegilego ša Phetholelo ya Lefase le Lefsa gotee le Dibeibele tša batho bao ba sa kgonego go bala tše di tlwaelegilego. Ka mohlala, Beibele ya Phetolelo ya Lefase le Lefsa ya mongwalo wa batho bao ba sa bonego (braille), e hwetšagala ka maleme a 10. Go dira Beibele e tee ya braille go ka tšea diiri tše 8. Le gona, dibolumo tša yona tše dintši di nyaka sekgoba sa dimithara tše 2.3 šelefong. Re dira le Dibeibele tše di kgethegilego tša bagolegwa bao ba lego ditronkong tšeo go dumelelwago dipuku tšeo letlakala la tšona la ka ntle le dirilwego ka pampiri feela.

 Beibele ya Phetolelo ya Lefase le Lefsa e fetoša maphelo a babadi ba yona. Nagana ka phuthego ya Sekiluba yeo e lego lefelong leo le bitšwago Tombe, Democratic Republic of the Congo. Go tloga toropong e kgolo ya moo Congo go ya Tombe ke dikhilomithara tše di fetago 1 700. Dihlatse tša Jehofa tša moo di be di na le Beibele e tee feela yeo e bego e fetoletšwe ka Sekiluba sa kgale. Bana babo rena le dikgaetšedi ba moo ba be ba adimana Beibele yeo gore ba kgone go lokišetša dikabelo tša bona tša diboka. Eupša go tloga ka August 2018, yo mongwe le yo mongwe ka phuthego yeo o ile a hwetša Beibele ya Phetolelo ya Lefase le Lefsa ya Sekiluba sa mehleng yeno.

 Kgaetšedi yo mongwe wa go bolela Sejeremane, ge a bolela ka Beibele ya Phetolelo ya Lefase le lefsa ya Sejeremane, o re: “Gona bjale ga ke sa re ke swanetše go bala Beibele. Go e na le moo, ke ipotšiša gore: ‘Ke tlo bala neng gape?’” Mogolegwa yo mongwe o ngwadile gore: “Ba mphile Beibele ya Phetolelo ya Lefase le lefsa, e bile e fetoša bophelo bja ka. Ga sa nka ka kwešiša Lentšu la Modimo go swana le ka mokgwa wo ke le kwešišago gona bjale ge ke bala Beibele ye. Nka rata go tseba ka mo go oketšegilego ka Dihlatse tša Jehofa le gore nka dira eng gore ke be Hlatse ya Jehofa.”

 Babadi ka moka ba Beibele ya Phetolelo ya Lefase le Lefsa ba leboga meneelo ka moka yeo e ntšhitšwego bakeng sa gore go dirwe Beibele ye. Meneelo ye ya lefase ka moka e ntšhitšwe go dirišwa e mengwe ya mekgwa ya go neela yeo e lego go donate.pr418.com. Re leboga meneelo yeo le e ntšhitšego ka go rata.