Dibidio tšeo re di bonago kopanong ya rena ya selete di re kgoma dipelo, ebile di re thuša go kwešiša Beibele gakaone. Kopanong ya rena ya Selete ya 2020 ya Dulang le Thabile! go na le dibidio tše 114, dibidio tšeo di akaretša dipolelo tše 43 tšeo di neilwego ke bana babo rena ba Sehlopha se Bušago le bathuši ba bona. Na o kile wa ipotšiša gore go dirwa mošomo o mo kaakang, le gore go nyakega tšhelete e kaakang go dira dibidio tše?

 Bana babo rena le dikgaetšedi ba e ka bago ba 900 lefaseng ka moka ba dirišitše bokgoni bja bona le nako ya bona go thuša go tšweletša lenaneo le. Mošomo wo o dirilwe ka mengwaga e mebedi, gomme go feditšwe mo e ka bago diiri tše 100 000 go o dira. Se se be se akaretša diiri tše 70, 000 tšeo di bego di hlokega gore go dirwe terama ya metsotso e 76 yeo e rego: Nehemia: “Lethabo Leo Jehofa a le Neago Lona ke Sebo sa Lena.”

 Go be go nyakega tšhelete e ntši go hlokomela dinyakwa tša baithaopi ba, le go ba hweletša didirišwa ka moka tšeo ba bego ba di hloka go dira mošomo wo.

 Jared Gossman yo a šomago lefapheng la go dira dibidio le dilo tša go theetšwa o re: “Komiti ya go Ruta ya Sehlopha se Bušago e nyaka gore go bontšhwe batho ba ditšo le maleme a fapafapanego dibidiong tša rena. Ba dira se ka gobane ba nyaka go bontšha botee bjo bana babo rena ba nago le bjona lefaseng ka moka. Gore ba kgone go fihlelela se go bile le dihlopha tše 24 dinageng tše e ka ba go tše 11 tšeo di ilego tša šoma mmogo go dira dibidio tše. Go be go nyakega tšhelete e ntši le go lokišetša gabotse gore bana babo rena lefaseng ka moka ba tle ba kgone go šoma gabotse.”

 Dibidio tša rena tše dintši di hloka gore go be le didirišwa tše kgethegilego le mafelwana a go direla diterama. Ka mohlala, mafelwana ao go diretšwego terama ya Nehemia: “Lethabo Leo Jehofa a le Neago Lona ke Sebo sa Lena” a agilwe ka gare ga setudio sa Mount Ebo kgauswi le Patterson, New York, U.S.A. Gore ba kgone go diriša meneelo yeo e lego gona gabotse bana babo rena ba ile ba aga maboto a go se imele ao a bego a swana le maboto a kgale a Jerusalema gore terama ye e bonagale eka e dirilwe mehleng yeo. Maboto ao a dirilwe ka diforeime tša mapolanka tša dimithara tše 6 ka botelele tšeo di tsentšhitšwego sepontšhe seo se pentilwego go swana le maswika. Maboto ao a be a ka kgona go šuthišwa ge go dirwa dikarolo tše dingwe tša terama. Se se ile sa dira gore go se sa hlokagala gore go dirwe mafelo a mangwe ao terama e bego e ka direlwa go ona. Lega go le bjalo, gore go dirwe mafelwana a terama ye go ile gwa nyakega mo e ka bago R1 739 773. a

 Go tseba gore lenaneo la kopano ya rena ya Selete le dirilwe bjang go re dira gore re e tšeele godimo kudu. Re a tshepa gore maiteko ao a dirilwego gore lenaneo le le be gona a tla dira gore Jehofa a tumišwe lefaseng ka moka. Re leboga kudu meneelo ya lena yeo le neelago ka yona le šomiša donate.pr418.com le mekgwa e mengwe.