E tla ba e le la mathomothomo ge ka kgwedi ya July le August 2020, bana babo rena lefaseng ka moka ba tla be ba bogela lenaneo la kopano ka nako e tee. Gore se se kgonege, dipolelo tša kopano ye di ile tša swanelwa ke go fetolelwa ka maleme a fetago a 500. Gantši go ka tšea ngwaga goba go feta e le gore go rulaganywe, go fetolelwe le go rekhota dipolelo tše le dibidio. Ka baka la coronavirus, bafetoledi ba kopano ya selete ya 2020 ya Dulang le Thabile! ba ile ba swanelwa ke go dira mošomo wo ka dikgwedi tša ka tlase ga tše nne.

 Ba Ditirelo tša Bofetoledi le ba Lefapha la go Reka la Lefaseng ka Moka kua Ntlongkgolo ya Dihlatse tša Jehofa, ba ile ba thuša gore modiro wo o mogolo o atlege. Ba Ditirelo tša Bofetoledi ba ile ba lemoga gore bafetoledi ba bantši ba tlo hloka dilo tše dintši gore ba kgone go phetha mošomo wo. Dilo tšeo di akaretša le dimaekrofouno tša maemo a godimo. Ba Lefapha la go Reka la Lefaseng ka moka ba ile ba reka dimaekrofouno tše 1000, ke moka ba di romela mafelong a e ka bago a 200.

 E le gore go se ke gwa šomišwa tšhelete e ntši, dimaekrofouno tše di ile tša rekwa ka nako e tee, tša romelwa lefelong le tee ke moka tša romelwa go bafetoledi lefaseng ka moka. Ka ge re rekile dimaekrofouno tše dintši ka nako e tee, maekrofouno o tee o be o bitša mo e ka bago R2 854.74 go o reka le go o romela mo o swanetšego go ya gona. Theko yeo e be e le fase kudu ge e bapetšwa le ge go rekwa maekrofouno o tee.

 Ba Lefapha la go Reka la Lefaseng ka moka ba ile ba swanelwa ke go reka dimaekrofouno tšeo dikgweding tša April le May 2020, e lego ka nako yeo dikgwebo tše dintši di bego di sa šome gabotse ka lebaka la coronavirus. Lega go le bjalo diofisi tša bofetoledi, diofisi tša makala le mafelo a mangwe a go fetolela a ile a hwetša dilo tšeo a di hlokago mafelelong a kgwedi ya May.

 Molebeledi wa Lefapha la go Reka la Lefaseng ka moka o boletše gore: “Mafapha a Bethele a ile a dirišana gabotse le dikgwebo tšeo re rekilego go tšona. Ka thušo ya Jehofa, re kgonne go dira dilo tše ka moka ka pela le go diriša meneelo gabotse bakeng sa go thuša bana babo rena le dikgaetšedi.”

 Nicholas Ahladis, wa Ditirelo tša Bofetoledi, o boletše gore: “Bafetoledi bao ba bego ba amilwe ke dithibelo tšeo di bilego gona ka baka la coronavirus, ba ile ba thabela go hwetša di dirišwa tše. Le ge ba be ba le kgole le kgole, ba ile ba šoma gotee go fetolela le go rekhota dipolelo, diterama le dikoša ka maleme a ka godimo ga a 500.”

 Wo ke o mongwe wa mešomo yeo e ilego ya dirwa gore Kopano ya Selete ya 2020 ya Dulang le Thabile! e atlege, e le gore bana babo rena lefaseng ka moka ba holege. Meneelo ya lena yeo le e neelago ka lerato go donate.pr418.com le ka mekgwa e mengwe, e ile ya dira gore go reka dilo tše go kgonege.