Ngwageng wa 2020, go bile le dikotsi tše dintši tša tlhago gotee le bolwetši bja COVID-19 bjo bo ilego bja phatlalala lefaseng ka moka. Dihlatse tša Jehofa di ile tša thuša bjang bao ba bego ba wetšwe ke dikotsi tše?

 Ngwageng wa tirelo a wa 2020 Komiti ya Balomaganyi ya Sehlopha se bušago, e ile ya dumelela gore go dirišwe R417 566 240 go thuša bao ba wetšwego ke dikotsi tša tlhago. Go ile gwa thušwa batho bao ba wetšego ke dikotsi tša tlhago tšeo di fetago 200. Dikotsi tšeo di akaretša bolwetši bja COVID-19, madimo a fapafapanego, mafula a Afrika, tlhaelelo ya dijo nageng ya Venezuela le komelelo ya Zimbabwe. Meneelo yeo e thušitše go reka dijo, meetse, ditente, diaparo, dihlare gotee le dilo tša go hlwekiša, go lokiša le go tsošološa meago. Ekwa ka ba bangwe bao ba ilego ba thušwa ge ba be ba wetšwe ke dikotsi tša tlhago.

 COVID-19. Lefaseng ka moka, bolwetši bjo bja COVID-19 bo kgomile bana babo rena le dikgaetšedi mmeleng, maikwelong le ka lehlakoreng la ditšhelete. Go thuša bana babo rena bao, go ile gwa hlongwa Dikomiti tša Tlhakodišo tše di fetago 800 lefaseng ka moka. Dikomiti tše di lebelela gore ke dilo dife tšeo bana babo rena ba di hlokago, ke moka tša begela Komiti ya Balomaganyi gore e bone gore e ka thuša bjang.

 Ngwageng woo ka moka, dikomiti tše di ile tša thuša bana babo rena ba bantši gore ba hwetše dijo, meetse, dilo tša go hlwekiša le dihlare. Mafelong a mangwe, dikomiti tše di ile tša šomišana gotee le bagolo ba di phuthego go thuša bana babo rena gore ba hwetše thušo ya mmušo.

 Batho bao e sego Dihlatse ba ile ba bona ka mokgwa wo re bego re thuša bana babo rena. Ka mohlala, Field Simwinga, e lego mokomišinare wa selete sa Nakonde, kua Zambia, o ile a botša bana babo rena gore: “Ga re tsebe gore re ka le leboga bjang ka ge le ile la thuša malapa ao a kgomilwego ke dikotsi tša tlhago ka go a nea dilo tšeo a bego a tloga ba di hloka.”

 Tlhaelelo ya Dijo Angola. Bolwetši bjo bja COVID-19 bo ile bja dira gore dijo di se sa hwetšagala gabotse kua Angola le gona, ditheko tša tšona di ile tša nyoga kudu. Ka baka leo, bana babo rena le dikgaetšedi, ba be ba thatafalelwa ke go reka dijo.

 Ofisi ya lekala la Brazil e ile ya kgopelwa gore e thuša bana babo rena ba Angola ka go ba romela dijo. Bana babo rena ba moo, ba ile ba nyakišiša gore ba ka reka bjang le go romela bana babo bona dijo. Ka gona ba ile ba di reka e le tše dintši ka nako e tee gomme ka go re’alo ba seketša tšhelete. Go dirišitšwe tšhelete yeo e lekanago R328 go reka le go romela morwalo o mongwe le o mongwe wa dijo. Morwalo o tee o be o imela dikhilograma tše 20. Ka gare ga morwalo woo go be go na le dijo tša go swana le rice, diponkisi le makhura. Go fihla lehono, go šetše go rometšwe merwalo e 33 544 yeo e imelago dikhilograma tše 654 000. Dijo tše di tšwago Brazil ge di kopana le tša Angola, di ile tša kgona go fepa batho ba fetago 50 000!

 Bana babo rena ba ikwa bjang ge ba thušitšwe ka tsela ye? Alexandre yo a dulago karolong ya kgole ya Angola, o re: “Ke kgona go bona gore Jehofa o a nthata le gore ga ke noši. Mokgatlo wa Jehofa o mpona ke le bohlokwa!” Mariza, e lego mma yo a godišago bana a nnoši, o re: “Jehofa o kwele thapelo ya ka. Ke leboga Jehofa le mokgatlo wa gagwe!”

 Go Thuša Naga ya Zimbabwe Yeo e Kgomilwego ke Komelelo. Ngwageng wa tirelo wa 2020, naga ya Zimbabwe e ile ya ba le komelelo yeo e ilego ya tlogela batho ba dimilione ba se na dijo. Dihlatse tša Jehofa tše dintši tša Zimbabwe di ile tša hloka dijo tše di lekanego.

 Go ile gwa hlangwa dikomiti tše hlano tša tlhakodišo gore di nee bana babo rena ba moo dijo. Bagoeledi ba makgolokgolo ba ile ba thuša ka go paka dijo, go di nametša diloring goba ba adimiša dikoloi tša bona. b Ngwageng wa tirelo wa 2020, go ile gwa dirišwa R10 313 304.52 go fepa batho ba 22 700!

 Bana babo rena ba bangwe ba ile ba leboga gore dijo tše tša tlhakodišo di fihlile ka nako ka ge tša bona di be di šetše di ba feletše. Ge ba se na go hwetša dijo, ba ile ba tumiša Jehofa. Ba bangwe ba ile ba ba ba opela le dikopelo tša Mmušo.

 Lefelong le lengwe gona moo Zimbabwe, dikgaetšedi tše pedi tša bahlologadi di ile tša ya sebokeng sa setšhaba. Sebokeng seo go be go bolelwa ka dijo tša tlhakodišo tšeo ba bego ba tlo di fiwa ke mokgatlo wo e se go wa mmušo (NGO). Seboka seo, se ile sa fetoga sa bopolotiki. Ka gona dikgaetšedi tšeo di ile tša phetha ka gore di ka se tšee lehlakore dipolotiking e le feela gore di tle di hwetše dijo tšeo. Ge di be di tloga sebokeng seo, di ile tša botšwa gore: “Le se ke la tla la boa go rena le nyaka dijo!” Le ge go le bjalo, ka morago ga dibeke tše pedi, bana babo rena ba tlhakodišo ba ile ba ya lefelong leo dikgaetšedi tšeo di bego di dula go lona gomme ba di nea dijo pele mokgatlo wola e sego wa mmušo o ka tliša dijo tša wona!

 Modiro wa tlhakodišo kua Zimbabwe o ile wa nea bohlatse. Ka mohlala, ekwa seo se ilego sa diragalela Prisca yo a dulago motsaneng o mongwe. Le ge go be go na le bothata bja komelelo e bile e le nako ya go lema, Prisca o ile a diriša letšatši la Laboraro le Labohlano go ruta batho ka Modimo. Batho ba motsaneng woo ba ile ba mo kwera. Ba be ba re: “O tlo bolaiša lapa la gago tlala ka go hlwa o gerema le metse ya batho.” Prisca o be a ba araba ka gore: “Jehofa ga sa nka a lahla bahlanka ba gagwe.” Ka moragonyana ga tiragalo ye o ile a hwetša dijo tša tlhakodišo go tšwa mokgatlong wa rena. Seo se ile sa kgahla ba bangwe ba baagišani ba gagwe gomme ba mmotša gore: “Modimo ga sa nka a go lahla. Ka gona le rena re nyaka gore o re rute ka yena.” Ga bjale baagišani ba gagwe ba šupa ba theetša diboka tšeo di gašwago radiong.

 Ge re dutše re batamela bofelo, re sa tlo welwa ke dikotsi tša tlhago. (Mateo 24:3, 7) Re leboga meneelo ya lena kudu yeo le e ntšhago le diriša e mengwe ya mekgwa yeo e lego go donate.pr418.com. Meneelo yeo e tlo dirišwa gabotse go thuša bao ba hlokago thušo.