Sehlopha se bušago se tloga se nyaka go diriša meneelo go aga meago yeo e tlago go re thuša go bolela ditaba tše dibotse tša Mmušo. Ka mohlala nakong ya ngwaga wa tirelo wa 2023, dikhamphani tšeo di dirišitšwego ke diofisi tša lekala tša Dihlatse tša Jehofa, di dirišitše mo e ka bago 500 milione ya ditolara go reka, go aga, go mpshafatša le go hlokomela Diholo tša Mmušo le Diholo tša Kopano lefaseng ka moka. a Meneelo ye e akaretša le seo diphuthego lefaseng ka moka di e dirišitšego go hlokomela Diholo tša bona tša Mmušo.

 Go oketša moo, meneelo ye e dirišwa go aga le go hlokomela meago ya lekala yeo e thušago go rulaganya le go thekga modiro wa go bolela ditaba tše dibotse lefaseng ka moka. Re nolofaditše mošomo wo re o dirago lekaleng e le gore e mengwe wa moneelo o thekge go aga le go kaonafatša Diholo tša Mmušo le Diholo tša Kopano. Eupša go sa nyakega tšhelete e ntšhi go lokiša, go kaonafatša goba go aga meago ya lekala lefelong le lengwe. Ke ka baka la’ng modiro wo e le o bohlokwa? Makala a thekga bjang mošomo wo o bohlokwa? A re kweng mabaka.

 Diofisi tša makala tše dintšhi di na le mengwaga ya ka godimo ga e 30 goba e 40 di agilwe. Nicholas wa Lefapha la Lefase ka Bophara la Bohlami le la go Aga o hlalosa gore: “Le ge meago e hlokometšwe gabotse e ka senyega ge nako e dutše e sepela. Ge re mpshafatša meago re e thuša gore e tšee nako e telele e šomišwa.”

 Meago ya Bethele e swanetše go fetofetoga le maemo e le gore e thekge dinyakwa tša mokgatlo. Bagoeledi lefaseng ka moka ba oketšegile kudu ga e sa le go tloga ge diofisi tše dintšhi tša makala di mpshafatšwa. Se se dirile gore go nyakege baithaopi ba bantši gore ba yo šoma diofising tšeo. Meago ya bethele yeo e bego e bonagala e le e megolo ga bjale e lekanetše

 Go bohlokwa go dula re šireletšegile. Ka ge re phela mehleng ya bofelo ya tshepedišo ya dilo, re lebeletšana le dikotsi tša tlhago tšeo di ka beago maphelo a rena kotsing. (Luka 21:11) Ge re diriša mekgwa e mefsa nakong ya ge go mpshafatšwa meago, se se tlo re thuša gore meago yeo e be yeo e bolokegilego bakeng sa bao ba tlago go šoma go yona. Go kaonafatšwa ga meago ye go thuša bana ba borena gore ba kgone go rulaganya modiro wa tlhakodišo le go tšwela pele ba thekga modiri wa go bolela ditaba tše dibotse ka morago ka gore go be le kotsi ya tlhago.

 Nakong ya ngwaga wa tirelo wa 2023, bana ba borena ba ile ba thoma modiro wa go aga makaleng a 43 ba hlahlwa ke Sehlopha se Bušago. Se se ra gore mo e ka bago seripa sa meago ya Bethele lefaseng ka moka go bile le modiro wa go aga. Bona mehlala e mmalwa yeo e bontšhago bohlokwa bja mošomo wo.

 Angola. Matt e lego o mongwe wa setho sa Komiti ya Lekala la Angola o re: “Re bone go phethagala ga boporofeta bja Hagai 2:7 ka tsela e makatšago. Re bone go oketšega ga bagoeledi ka diperesente tše 60 ka mengwaga e lesome feela. Lapa la Bethele le ile la swanelwa ke go oketšega gararo ka palo e le gore le kgone go thekga bagoeledi ba. Eupša meago ya rena ya Bethele e be e sa re dumelele go laletša batho ba bantšhi bao re bego re ba hloka gore ba tlo šoma moo. Se se ile sa dira gore bao ba lego Bethele ba šome mošomo o boima ka diiri tše dintšhi.”

 Bana ba borena ba be ba neilwe kabelo ya gore ba ka dira eng gore ba katološe moago. Mathomong ba be ba nagana gore tsela e kaone le ya kapela ke go mpshafatša moago wa lekala wo o bego o šetše o le gona. Eupša ka morago ga go dira nyakišišo ba ile ba lemoga gore go mpshafatša moo e be a ka se be tsela ya maleba ya go diriša meneelo. Go ena le moo ba ile ba bona go le kaone go reka moago wa kgauswi le go o mpshafatša. Matt o hlalosa gore “Ge Komiti ya Lekala e kgopelwa go reka le go mpshafatša moago wo o bego o šetše o le gona, re be re tshwenyegile ge eba moago woo o tla swanelega goba go le kaone ge e ba re ka thoma moago woo fase. “Eupša ga bjale re a bona gore moago woo o a swanelega. Jehofa o šegofaditše phetho ye.”

 Go ka direga gore nakong e tlago lekala la Angola le hloke lefelo leo le oketšegilego. Eupša moago wo mofsa gotee le madulo ao a lego Bethele le madulo ao a lefelelwago ao bašomi ba Bethele ba dulago go ona, di neile ofisi ya lekala lefelo leo le oketšegilego gore le kgone go thekga tšhemo yeo e golago.

 Japan. Meago ya mathomo ya lekala e na le mengwaga e 40 e le gona gomme ga se ya ka ya kaonafatšwa. Le ge bana ba borena ba be ba šoma ka thata go hlokomela meago yeo, meago ye e dirišitšwe nako e telele go feta kamoo e bego e reretšwe go dirišwa ka gona. Se se dirile gore go be le mošomo o mogolo wa go kaonafatša meago yeo.

 Bophelo bja Bethele le bjona bo fetogile ge mengwaga e dutše e eya. Pele ga ngwaga wa 2015, badudi ba Bethele ba be ba direlwa dijo tša letšatši ka moka, ba be ba direlwa dijo tša mesong, tša mosegare le tša bošego. Diphapoši tša Bethele ya Japan di dirilwe gore di be le khitšhing e nyenyane. Ditho tša Bethele ga bjale di itirela dijo kutšwanyana. Go kaonafatšwa ga meago ye go dirile gore diphapoši tša bona di be le di khitšhing tšeo di dirago gore go be bonolo go itirela dijo. Kgaetšedi Kumiko, yo a hlankelago lekaleng la Japan o re, “Khitšhing ye e ntira gore ke ikwe ke le gae ga mahlaku, le gona e nthuša gore ke thekge tokišetšo ye e mpsha ya Bethele.”

 Mošomo wo o dirwago lekaleng la Japan ke karolo ya bohlokwa ya modiro wa lefaseng ka bophara. (Mat. 28:19, 20) Japan ke e nngwe ya makala a mabedi ao a gatišago Beibele e feletšego. Ga bjale go thomile mošomo wa go lokela motšhene wa go kgoboketša lerole gore bao ba šomago ka mo go gatišwago ba dule ba šireletšegile. Go reka le go lokela motšhene wo go biditše mo e ka bago milione ya ditolara, ka gona se se thuša lekala gore le kgone go tšwela pele le gatiša le go aba dijo tša moya.

 Bana ba borena ba ile ba kgonthišetša gore di Beibele di dule di gatišwa le ge go be go na le modiro wa go aga. Trey e lego o mongwe wa leloko la Komiti ya Lekala kua Japan o re: “Ge go be go na le modiro wa go aga lekaleng la rena, re be re dutše re lokolla di Beibele tše dintšhi ka ge batho ba bantšhi lefaseng ka moka ba be ba nyaka di Beibele. Batho bao ba šomago mafapheng ao a fapafapanego ba be ba swanetše go dirišana gabotse e le gore mošomo wa go lokela motšhene o moswa le go gatiša go tšwele pele.” Go sa šetšwe mathata ao ba bilego le ona, go ile gwa gatišwa di Beibele tše 220 000 kgwedi e nngwe le e nngwe magareng ga March le August 2023 le ge mošomo wa go aga o be o dutše o tšwela pele. Mošomo wo ka moka o ile wa fetšwa ka ntle le gore go nyakege tšhelete yeo e oketšegilego.

 Go seketša mohlagase ke karolo e nngwe e bohlokwa modirong wo. Di solar tše mpsha tšeo di tlago go tsenywa di tlo seketša mo e ka bago ditolara tše 120 000 ngwaga o mongwe le o mongwe. Go tlo tsenywa le mafasetere ao a sa tlwaelegago ao a tiilego ao a tlago go re thuša go seketša mohlagase. Seo se tlo dira gore ngwaga o mongwe le o mongwe go seketšwe mo e ka bago ditolara tše 10 000. Le ge didirišwa tše tša go seketša mohlagase di tura, se se tlo dira gore go seketšwe tšhelete ye e ka bago 3.5 milione ya ditolara. Nakong ya ge go tsentšhitšwe di solar le mafasetere a, go tlo fetoša le tsela yeo meago e bogegago ka gona.

 Mešomo ye e mebedi yeo e lego lekaleng e bontšha gore go hlokagala gore go dirwe mošomo o mo kaakang go kgonthišetša gore meago ya Bethele e thekga tšhemo. Le ga go le bjalo mošomo ga se wa fela. Aaron yo a šomago.go Lefapha la Lefase ka Bophara la Bohlami le la go Aga o re: “Mošomo o montšhi o šetšwe o dirilwe eupša go sa na le o mongwe o montšhi wo o swanetšego go dirwa. Na mošomo wo o tla fihlelelwa bjang?” O oketša ka gore: “Go tlaleletša go meneelo yeo e thušitšego go dira mošomo o, re leboga le moya wa boikgafo wo baithaopi ba o bontšhitšego le bao ba dirilego diphetogo maphelong a bona e le gore ba kgone go hwetšagala nakong e tlago. Thekgo yeo re e hweditšego go bana ba borena e tloga e le bohlatse bja gore Jehofa o šegofatša modiro wo.”—Ps. 110:3.

 Mošomo wo re o dirago wa go aga le go kaonafatša o thekgwa ke meneelo yeo e mentšhi ya yona e neelwago go donate.pr418.com. Re leboga kudu go neela ga lena.