“Moragonyana, go hwetša dijo [tša moya] ka tsela ya elektroniki go be go bonala okare go ka se kgonege.” Na o dumelelana le mantšu a? Mantšu a a boletšwe ke Geoffrey Jackson go Pego ya 2020 ya Sehlopha se Bušago #6. O ile a tšwela pele ka gore: “Re a ipotšiša gore re be re tlo kgona bjang ntle le didirišwa tša go swana le JW Library. Mengwageng ya go feta, Jehofa o be a dutše a re lokišeletša gore re tle re kgone go lebeletšana le maemo a go swana le a.”

 Jehofa o be a dutše a re lokišeletša maemo a go swana le a bjang? Ke eng seo se bego se hlokega gore re feleletše re na le JW Library, le gona go hlokega eng gore sedirišwa se se dule se šoma gabotse le go kaonefatšwa?

 Ka May 2013, Sehlopha se Bušago se ile sa kgopela lefapha la kua ntlongkgolo la MEPS Programming, gore le dire app yeo e nago le Beibele e kaonefaditšwego ya Phetolelo ya Lefase le Lefsa. Paul Willies wa lefapha la MEPS Programming o re: “E be e le la mathomo re lokolla app yeo e ka taoneloutwago mo didirišweng tša elektroniki. Re ile ra šoma le mafapha a fapafapanego go hlama le go dira app ye le dikagare tša yona gomme ra tlogela go dira mešomo e mengwe. Re be re dula re rapela ka mehla, le gona ka thušo ya Jehofa re ile ra kgona go e lokolla ka morago ga dikgwedi tše tlhano feela sebokeng sa ngwaga le ngwaga!”

 Ka morago, re ile ra ba le bothata bjo bongwe bja gore ba be ba tlo dira bjang gore app ye e be laeprari ya go ba le dikgatišo tše dintši ka maleme a go fapafapana. Ka January 2015, sedirišwa se se be se šetše se na le bontši bja dikgatišo tša Seisemane tšeo re di šomišago gona bjale, e bile ka morago ga dikgwedi tše tshela, batho ba be ba šetše ba kgona go taonelouta dikgatišo ka maleme a mantši kudu.

 Ga e sa le go tloga ka nako yeo, bana babo rena ba kaonefaditše sedirišwa se ka mekgwa e mentšinyana, ba tsentše dibidio e bile ba dirile gore dikgatišo le dibidio tšeo re di šomišago dibokeng di be lefelong le tee, le gona ba dirile gore go be bonolo go diriša puku ya Tlhahlo ya go Dira Nyakišišo ge re bala Beibele.

 JW Library e bulwa ke batho ba dimilione tše 8 didirišweng tša bona tša elektroniki letšatši le letšatši e bile kgwedi e nngwe le e nngwe e bulwa ke batho ba fetago ba dimilione tše 15 didirišweng tša bona. Go hlokega eng gore app ye e kgone go tšwela pele e šoma gabotse mo didirišweng tše ka moka? Ngwanabo rena Willies o hlalosa gore: “Di-app tšeo di lego mo didirišweng tša elektroniki di dula di nyaka go kaonefatšwa. Re dula re nyaka ditsela tša go dira gore app ye e be bonolo go e diriša le gore e kgone go thuša batho go tiiša segwera sa bona le Jehofa. Re swanetše go dula re kaonefatša app ye gore e kgone go šomišana gabotse le diphetogo tšeo di dulago di dirwa go didirišwa tša rena tša elektroniki. Le gona re swanetše go dula re kaonefatša tsela yeo app ye e šomago ka yona ge dikgatišo tšeo di lego mo go JW Library di dutše di oketšega.” Gona bjale mo go JW Library go na le dikgatišo tše e ka bago tše 200 000 le dibidio tšeo di fetago tše 600 000 ka maleme a go fapafapana!

 Ga go hlokege didirišwa tša khomputha feela go dira gore app ye e dule e šoma gabotse. Go hlokega gore ba šomiše le mananeo a khomputha (software) ao ba swanetšego go a reka. Lenaneo le tee ba le reka ka R21 591,08 ngwaga o mongwe le o mongwe. Godimo ga moo, ngwaga o mongwe le o mongwe lefapha la MEPS Programming le diriša mo e ka bago R143 940,50 go reka metšhene e fapafapanego yeo e tlago go dira gore app ye e dule e šoma gabotse ka gare ga dikhomputha, difouno le didirišwa tše dingwe tše mpsha.

 Go šomiša JW Library go thušitše go boloka tšhelete yeo e bego e dirišwa go phrintha le go romela dikgatišo mafelong a go fapafapana. Ka mohlala, nagana ka pukwana ya Go Hlahloba Mangwalo ka Mehla. Re printhile mo e ka bago dikopi tše 12 milione tša pukwana ya Go Hlahloba Mangwalo ya 2013. Le ge re bile le bagoeledi ba bafsa ba 700 000 lefaseng ka moka, re phrinthile dikopi tše e ka bago 5 milione feela tša pukwana ya 2020 ya Go Hlahloba Mangwalo. Go fetogile eng? Bana babo rena le dikgaetšedi ba bantši lehono ba bala pukwana ye ba diriša JW Library. a

 JW Library e thuša batho bao ba e dirišago ka ditsela tše di fapafapanego. Geneviève wa go dula Canada o re JW Library e dira gore a kgone go ithuta ka mehla. O itše: “Go bolela nnete, ge nkabe ke be ke swanelwa ke go kgoboketša dipuku ka moka tšeo ke di dirišago go ithuta, ga ke nagane gore ke be nka kgona go ithuta mesong e mengwe le e mengwe. Eupša ka app ye, ge ke swere thabolete ya ka, ke na le dilo ka moka tše ke di hlokago. Go ithuta ka mehla go tiišitše tumelo ya ka, gwa matlafatša le segwera sa ka le Jehofa.”

 Nakong ye ya COVID-19, JW Library e thušitše batho ba bantši. Charlyn wa go tšwa United States o re: “Ke na le mo e ka bago ngwaga ke sa hwetše dikgatišo tše di gatišitšwego. Eupša ka JW Library re hwetša dilo tšeo re di nyakago go tiiša tumelo ya rena e bile ke leboga Jehofa kudu ka ge a re diretše app ye.”

 Batho ba bantši ba ikwa go swana le Faye, yo a dulago Philippines. O re: “Ke šomiša app ye go tiiša segwera sa ka le Jehofa. Ge ke tsoga, ke thoma ka go bala ke e diriša. Ge ke dira mešomo ya ka gae, ke diriša app ye go theetša dikoša le dikgatišo. Ke e diriša go lokišeletša diboka le dithuto tša Beibele. Ge ke hweditše nako, ke bogela dibidio go yona. Ge ke eme laeneng, ke bala Beibele goba dihlogo tša go bolela ka Beibele go yona. E nkhola kudu.”

 App ye e re thuša kudu ge re le tšhemong. Ka mohlala, ge kgaetšedi yo mongwe wa kua Cameroon a be a le tšhemong, o be a nyaka go diriša lengwalo le lengwe leo a kwelego kgaetšedi yo mongwe a le diriša dibekeng tše di fetilego. Eupša o be a sa gopole gore a ka hwetša kae lengwalo leo. O re: “Ke ile ka thušwa ke gore ke be ke gopola mantšu a mangwe ao a lego lengwalong le. Ke ile ka bula Beibele go JW Library ke moka ka ngwala mantšu ao ke a gopolago. Ke ile ka hwetša lengwalo leo ka pelapela. Ge ke diriša app ye, ke kgona go hwetša mangwalo ao ka dinako tše dingwe ke a lebalago.”

 Tšhelete yeo le neelago ka yona le diriša mekgwa yeo go bolelwago ka yona go donate.pr418.com e re thušitše go hlama, go hlokomela le go kaonefatša app ya JW Library gore bana babo rena le dikgaetšedi lefaseng ka moka ba kgone go e diriša. Re leboga moya wa lena wa go fa.

1. Ka October 2013—App ye e lokollotšwe e na le Phetolelo ya Lefase le Lefsa yeo e kaonefaditšwego

2. Ka January 2015—Dikgatišo tše dingwe di be di hwetšagala ka Seisemane, ka morago tša thoma go hwetšagala ka maleme a mangwe a mantši

3. Ka November 2015—App ye e ile ya thoma go re dumelela go thalela dintlha ka mebalabala

4. Ka May 2016—Re ile ra thoma go hwetša dibidio le dikgatišo tša dibokeng lefelong letee

5. Ka May 2017—Go ile gwa lokelwa karolo ya go ngwala dintlha

6. Ka December 2017—Go ile gwa dirwa gore app ye e kgone go ba le Beibele ya go Ithuta goba (Study Bible)

7. Ka March 2019—App ye e ile ya thoma go re dumelela go taonelouta dikgatišo tšeo di rekhotilwego, go bogela dibidio ntle le go di taonelouta, le go kgona go diriša puku ya Tlhahlo ya go Dira Nyakišišo

8. Ka January 2021—Go okeditšwe dilo tša go fapafapana pukung ya O ka Thabela Bophelo go ya go Ile!