KAMOO MENEELO YA LENA E DIRIŠWAGO KA GONA
Lenaneo la Sathalaeteng la Kgašo ya JW le Fihla le Moo go se Nago Inthanete
APRIL 1, 2021
Kgwedi e nngwe le e nngwe, re letela go bogela dibidio le mananeo ao a kgothatšago ao a tšweletšwago go Kgašo ya JW. Lega go le bjalo, bana babo rena ba bantši ba Afrika ga ba kgone go bogela mananeo a bjalo mo inthaneteng. Ka baka la eng?
Go hwetša inthanete ke selo se thata dinageng tše dintši tša Afrika. Dinaga tše dingwe di na le inthanete, eupša ga e sware gabotse goba data e a tura. Ka mohlala, mopotologi yo a tšwago nageng ya Madagascar o ile a taonelouta Kgašo ya JW ya kgwedi e tee feela lebenkeleng la batho bohle la go diriša inthanete. Ba ile ba mo patediša R250,00 e lego tšhelete yeo e fetago mogolo woo batho ba bangwe ba o hwetšago ka beke!
Le ge batho ba dimilione kua Afrika ba na le mathata a inthanete, eupša seo ga se ba thibele gore ba thabele go bogela lenaneo la Kgašo ya JW. Seo se kgonega bjang?
Go thoma ka 2017, dinaga tša Sub-Sahara kua Afrika di kgona go bogela lenaneo la Kgašo ya JW sathalaeteng. Lenaneo le, le gašwa mahala, diiri tše 24 letšatši ka moka, beke ka moka, ka maleme a 16.
Ka 2018 ge bana babo rena ba kua Mozambique ba be ba tsenya sathalaete ya JW Holong ya Mmušo
Gore seo se kgonege, Dihlatse tša Jehofa di patelela lenaneo la Kgašo ya JW gore le gašwe thelebišeneng ka sathalaete. Sathalaete yeo, e thuša batho bao ba dulago dinageng tše 35 tša Sub-Sahara kua Afrika. Ka kgwedi go patelwa tšhelete yeo e fetago R187 372,00. Nako e nngwe le e nngwe ge go eba le mananeo ao a kgethegilego goba dikopano, go patelwa tšhelete e oketšegilego. Seo se thuša gore batho ba dikete ba a bogele ka nako yeo a diregago ka yona, go akaretša le ge go na le ketelo ya moemedi wa Ntlokgolo.
Ka 2018 ge bana babo rena ba LDC ba kua Mozambique ba lebeletše lenaneo ba diriša sathalaete ya JW
Batho ba bantši go akaretša le bao e sego Dihlatse tša Jehofa, ba bogela lenaneo la Kgašo ya JW thelebišeneng, magaeng a bona ba diriša sathalaete. Lega go le bjalo, bana babo rena le dikgaetšedi ba bangwe ga ba kgone go bogela lenaneo la Kgašo ya JW ka ge ba se na tšhelete ya go reka didirišwa tšeo di nyakegago. Gore ba kgone go bogela lenaneo la Kgašo ya JW, go tsentšwe didirišwa tša sathalaete Diholong tša Mmušo tšeo di fetago 3,670. Ge e ba Holo ya Mmušo e na le thelebišeneng goba projector, gona go tlo nyakega tšhelete ye e ka bago R1 097,00 gore go tsenywe sathalaete le gore e fihle moo. Ge e ba go tlo hlokega gore go tsenywe didirišwa ka moka, go tlo nyakega tšhelete yeo e ka bago R8 300,00.
Bana babo rena le dikgaetšedi ba thabela go ba le lenaneo la Kgašo ya JW ka sathalaete. Mogolo yo a dulago Cameroon o itše: “Lapa la rena le lebelela tokišetšo ye e le bjalo ka manna leganateng.” Ngwanabo rena wa kua Nigeria yo a bitšwago Odebode, o re: “Re lebelela lenaneo la sathalaete la Kgašo ya JW re le lapa gararo mo bekeng. Bana baka ba le thabela kudu. Ka dinaka tše dingwe ge re bogetše mananeo a mangwe, ba kgopela gore re bogele lenaneo la Kgašo ya JW.” Rose, yo a dulago Nigeria, le yena o re: “Ke thabela go bolela gore go e na le gore ke dulele go bogela ditaba mo thelebišeneng, ga bjale ke bogela lenaneo la Kgašo ya JW mo sathalaeteng. Ge ke be ke bogela ditaba, ke be ke ikwa ke nyamile ka baka la dilo tšeo ke bego ke di bona, eupša ge ke bogela lenaneo la Kgašo ya JW ke ba le khutšo ya monagano ebile ke a holega. Ke rata lenaneo le kudu, le bjalo ka tšhegofatšo ye kgolo yeo Jehofa a re filego yona.”
Lapa le lengwe kua Malawi le lebetše di bidio tša bana sathalaeteng ya rena
Mopotologi wa kua Mozambique o boletše gore, mo a potolago gona go tsentšwe didirišwa gore sathalaete e šome Diholong tša Mmušo. Bana babo rena le dikgaetšedi ba diphuthegong tšeo ba fihla dibokeng iri pele ga ge diboka di ka thoma gore ba bogele lenaneo la Kgašo ya JW ka sathalaete.
Ka 2018 phuthego ya kua Ethiopia ile ya ipshina ka lenaneo la kgwedi le kgwedi la kgašo ya JW ntle le go diriša data
Ka 2019 ge go be go na le kopano ya ditšhabatšhaba kua Johannesburg, Afrika Borwa, go ile gwa dirišwa sathalaete gore bana ba bo rena ba bogele dipolelo go akaretša le tšeo di bego di newa ke ditho tša Sehlopha se Bušago. Dipolelo tšeo di ile tša bogelwa le mafelong a mangwe a 9. Ngwanabo rena Sphumelele, wa Lefapha la Kgašo, Lekaleng la Afrika Borwa, o re: “Nakong e fetilego, re be re swanetše go tsenya dipolelo inthaneteng gore batho ba di bogele. Eupša go be go nyakega tšhelete e ntši ya go reka di data le gore network e sware gabotse mo mafelong ao. Go diriša lenaneo la sathalaete la JW ga go ture e bile le šoma gabotse.”
Re leboga meneelo ka moka yeo le e ntšhang go tšwa pelong yeo e thekgago modiro wa lefase ka bophara, gomme ga bjale bana babo rena le dikgaetšedi ba bantši ba kua Afrika ba kgona go lebelela Kgašo ya JW ba diriša sathalaete. Re thabela meneelo ya lena yeo le e ntšhago ka ditsela tša go fapafapana tšeo di hwetšagalago wepesaeteng ya rena go donate.pr418.com.
You May Also Like
KAMOO MENEELO YA LENA E DIRIŠWAGO KA GONA
Mananeo a Kopano ao a “Kwewago le go Bonwa”
Bona seo se dirwago go kgonthišetša gore medumo le dibidio di kwagala gabotse le go bonala gabotse dikopanong tša rena
KAMOO MENEELO YA LENA E DIRIŠWAGO KA GONA
Lepokisana le Lenyenyane Leo le Thušago Bana Babo Rena go Hwetša Dijo tša Moya
Dihlatse tša Jehofa di taonelouta dikgatišo le ge network e se gona.
DIPOTŠIŠO TŠEO DI BOTŠIŠWAGO KUDU
Dihlatse tša Jehofa di Diriša Bjang Meneelo?
Na Dihlatse tša Jehofa di diriša meneelo gore di ikhumiše?
DIPOTŠIŠO TŠEO DI BOTŠIŠWAGO KUDU
Modiro wa Dihlatse tša Jehofa o Thekgwa Bjang ka tša Ditšhelete?
Ithute kamoo modiro wa lefase ka bophara wa go ruta ka Beibele o tšwelago pele o gola eupša go sa ntšhiwe dikoleke goba karolo ya lesome.
