Ga e sa le go tloga mengwageng e 130 e fetilego, Dihlatse tša Jehofa di dula di bokana gotee dikopanong tša selete tša ngwaga le ngwaga. Ga bjale mananeo a a akaretša dipolelo tša ka godimo ga tše 40, gotee le mmino, dipoledišano le dibidio. Gore lenaneo le hole le go kgothatša bao ba tlilego kopanong, le swanetše go ba leo le “kwewago le go bonwa” gabotse. (Luka 2:20) Meneelo ya lena e dirišwa bjang go kgonthišetša gore bohle ba holwa ke dikopano tše go sa šetšwe mo ba dulago gona?

 Mapatlelo a mantšhi lehono dinageng tša Bodikela a šetše a ena le didirišwa tša modumo le bidio. Ka gona ge eba re swarela dikopano mafelong a bjalo, gona ke ka lebaka la eng re etla le didirišwa tša rena? Ngwana borena David yo a šomago le ba Lefapha la Kgašo Ntlongkgolo ya Lefase ka Moka o hlalosa gore: “Go mafelo ao re a dirišago go swara dikopano, ke a mmalwa feela ao a kgonago go thuša batho gore ba theetše lenaneo gabotse ka diiri tša ka godimo ga tše tshela. Ka mohlala, mafelong a dipapadi go na le didirišwa tšeo di reretšwego go bolela le batho ka nakonyana le go bapala mmino o mo kopana. Disekirini tša mafelong ao di bontšha feela gore dihlopha di bapetše bjang gotee le dipapatšo. Mola ele gore rena re nyaka gore batheetši ba bogele le go theetša dibidio tše ditelele le go kwešiša gabotse sohle seo se bolelwago sethaleng.”

 Didirišwa tša modumo le bidio di swanetše go swanelega go ya ka lefelo leo kopano e tlago go swarelwa gona. Ka morago ga gore go kgethwe mafelo a moo dikopano di tlago go swarelwa gona, Ba lefapha la Kgašo diofising tša rena tša lekala ba lebelela gore bao ba tlago kopanong ba tlo dula kae, go ithekgile ka gore ke batho ba bakae bao ba tlago go ba gona le gore lefelo leo le tlo kgona go amogela batho ba bakae. Ke moka bana ba borena ba lebelela gore dipikara le disekirini tša go bapala dibidio di swanetše go bewa le go hlongwa kae, ka morago ba lebelela gore ke didirišwa dife tše dingwe tšeo di tlago go hlokagala bakeng sa gore bohle ba kgone go bona le go kwa lenaneo gabotse.

 Didirišwa tša modumo le bidio di ka no se kwagale gabotse ge eba lenaneo la kopano le tlo swarwa ka maleme a mmalwa. Ge eba lenaneo le tlo fetolelwa ka leleme le lengwe, bafetoledi ba swanetše go kgona go bona le go kwa lenaneo ke moka ka morago ga gore ba le fetolele ba swanetše go le romela go bana ba borena bao ba kwešišago leleme leo ba diriša mokero o fapanego. Didirišwa tše di thuša gore bao ba tlilego kopanong ba kgone go bona dibidio ka nako e tee le ge eba lenaneo leo le fetolelwa ka maleme a seswai ao fapafapanego. Ngwanabo rena David o re, “Ka ge didirišwa tše di bonala di ka ba thata go ka šomišwa, baithaopi ba swanetše go tlwaetšwa gabotse.”

 Diofisi tša makala tše dintšhi di na le didirišwa tše tša modumo le bidio tšeo di šomišwago ngwaga le ngwaga. Ka gona bana ba borena ba dira ditokišetšo tša gore karolo e nngwe le e nngwe ya didirišwa tše di tloga kopanong e nngwe go ya go e nngwe. Lekala la United States le šomiša tšhelete ya ka godimo ga ditolara tše 200 000 a ngwaga o mongwe le o mongwe go sepediša didirišwa tša kopano. Se se re thuša go fokotša ditshenyagalelo tša go reka le go hlokomela didirišwa tše dingwe. Steven yo a bego a thuša go hlokomela tša modumo le bidio kopanong kua Canada o re, “Sehlopha sa modumo le bidio se šomile ka thata go kgonthišetša gore dithapo le didirišwa tše dingwe ka moka di a hlokomelwa le go phuthwa gabotse bakeng sa kopano e latelago.”

 Go hiriša didirišwa tša modumo le bidio go tura kudu e bile gantšhi didirišwa tšeo ga di be maemong a mabotse ka ge di sa hlokomelwe. Ke ka moo re bonego go le kaone gore re ithekele didirišwa tše re di hlokago. Ga bjale disekirini tša bidio tša LED tša go lekana dimithara tše 5 ka tlase le 3 ka mathoko(16 by 10 ft)di bitša tšhelete ye e ka lekanago ditolara tše $24,000, mola thapo e tee ya maekrofouno ya go lekana dimithara tše 15(50-ft, e ka bitša ditolara tše $20. Ka gona ba Lefapha la Kgašo le ba Lefapha la go Reka ba “bala ditshenyegelo” pele ba ka reka sedirišwa le ge ele sefe. (Luka 14:28) Ka mohlala ba lebelela gore ke batho ba bakae bao ba tlago go holwa ke sedirišwa se? Na go a hlokagala go reka sedirišwa se seswa? Na re na le lefelo le le lekanego bakeng sa go bea sedirišwa seo le baithaopi bao ba tlwaeditšwego bao ba tla kgonago go hlokomela sedirišwa seo se seswa?

 Gore sedirišwa sa modumo le bidio se kgone go šoma ka nako e telele, re fela re lokiša metšhene yeo ele gore re boloke tšhelete. Re laiša didirišwa tše ka gare ga mapokisi a magolo a go tia gore di se ke tša gobala, gomme le mapokisi ao a go tia a fela a lokišwa ge go hlokagala.

 Bao e sego Dihlatse tša Jehofa ba ile ba thabišwa ke tsela yeo modumo le dibidio tša rena di kwagalago le go bonala gabotse dikopanong. Ka mohlala kopanong e nngwe, mošomi yo a šomago khamphaning e kgolo ya tša kgašo, o ile a reta tsela yeo modumo le dibidio tša rena di lego ka gona. Jonathan yo a thušago ka tša modumo le bidio dikopanong o re, “Mošomi yoo o be a makaditšwe ke go tseba gore batho ba sehlopha sa rena e be e le baithaopi. O okeditše ka gore go be go ka tšea matšatši a mahlano gore khamphani ya gagwe e dire mošomo wo rena re o dirilego ka letšatši le tee le seripa.” Kopanong e nngwe mohlokomedi wa lefelo leo o ile a bolela gore: “Ditsebi tše dintšhi tša go kgona go beakanya didirišwa tša modumo le bidio ba fela ba etla, eupša ke la mathomo ke bona batho ba go šoma ka bothakga le bokgwari ka tsela ye!”

 O hotšwe bjang ke didirišwa tša modumo le bidio kopanong? Mohlomongwe o ka ba o ikwa go swana le David yo a dulago England. O re: “Ke na le mengwaga e 88 gomme ke dula ke eba gona ka mehla dikopanong. Ga bjale go bonolo go feta peleng go kwa lenaneo gabotse. Ka lebaka la dibidio tše, lenaneo le kgona go kwagala gabotse le go fela ka pela.” Micheal, wa go dula Nigeria yena o re, “Ka ge bana ba borena ba se sa thatafalelwa ke go kwa seboledi le go bona dibidio, ba kgona go theetša lenaneo gabotse ntle le ditšhitišo.”

 Ngwageng wo ge o tla be o le Kopanong ya Selete ya sehlogo seo se rego “Bolela Ditaba tše Dibotse!”, tšea motsotswana go naganišiša ka mošomo wo o ilego wa dirwa go go thuša gore o kwe le go bona lenaneo gabotse. Re leboga meneelo ya lena go akaretšwa le yeo e ntšhwago go donate.pr418.com, e thušitše gore se se kgonege. Re a leboga.