Ka ge batho ba bantši ba kolobetšwa, ngwaga le ngwaga go nyakega mafelo a borapedi a oketšegilego. Ka baka leo, Mafapha a Bohlami le a Mediro ya go Aga (LDC) lefaseng ka moka a be a rulagantše go aga goba go tsošološa mafelo a rena a borapedi a fetago 2 700 ngwageng wa tirelo wa 2020. a

 Ka manyami, bolwetši bja Corona bo ile bja šitiša mediro yeo ya go aga. Ka ge Komiti ya Kgatišo ya Sehlopha se Bušago e be e nyaka go šireletša bana babo rena le dikgaetšedi le go kwa melao yeo ba mmušo ba e beilego, e ile ya emiša mediro e mentši ya go aga lefaseng ka moka. Lega go le bjalo, ngwageng wa tirelo wa 2020 go agilwe le go tsošološwa mafelo a borapedi a fetago 1 700 pele bolwetši bjo bo ka ba thoma. Go oketša moo go ile gwa agiwa le go mpshafatšwa meago e fetago e 100. Meago e mebedi yeo e ilego ya fetšwa go aga e hotše bana babo rena bjang.

 Lekala la Cameroon. Ofisi ya lekala ya kgale e be e le Douala. E be e le e nyenyane e bile e swanetše go kaonefatšwa kudu. Komiti ya Kgatišo e be e nyaka go mpshafatša lekala leo, eupša e ile ya bona gore go mpshafatša moago woo go be go tura go feta moago woo ka bowona. Bana babo rena ba ile ba nyakišiša gore ba ka nyaka lefelo le lefsa gomme ba aga go lona goba ba ka reka moago gomme ba o mpshafatša. Eupša ga sa nka ba dira le se tee sa dilo tšeo.

 Bana babo rena ba ile ba kwa gore ka leboa la Douala, mmušo o be o nyaka go dira tsela kgauswi le e nngwe ya Diholo tša Kopano. Tsela yeo e be e tlo thuša mmušo gore o kgone go iša ditirelo tše di nyakegago holong yeo. Tsela yeo e be e tlo thuša bana babo rena ba ofisi yeo kudu. Ka gona Sehlopha se Bušago se ile sa dumelela bana babo rena gore ba age ofisi ya lekala ka jarateng ya Holo ya Kopano.

 Bana babo rena ba ile ba šoma gotee le boradikonteraka go aga moago woo. Ka gona ba ile ba boloka nako le tšhelete. Bana babo rena ba ile ba seketša tšhelete yeo e fetago R32 570 200,00 ge ba be ba aga moago wo. Lapa la Bethele le ile la kgona go hudugela moagong woo o mofsa pele bolwetši bja Corona bo ka thoma.

 Bana babo rena bao ba dulago Bethele ya Cameroon ba ile ba thabela go dula le go šomela lefelong leo le lefsa e bile ba bona ofisi yeo e le mpho e tšwago go Jehofa. Banyalani ba bangwe ba itše: “Re nyaka go šoma ka thata gore re bontšhe gore re tšeela mpho ye godimo.”

 Ofisi ya Bofetoledi ya Setojolabal (RTO), yeo e lego Mexico. Sehlopha sa go fetolela Setojolabal se feditše mengwaga e mentši se šomela lekaleng la Central America, leo le lego kgauswi le toropo ya Mexico. Eupša Setojolabal se bolelwa kudu Altamirano le Las Margaritas. Mafelo a a kgole le ofisi ya lekala ka dikhilomithara tše e nyakilego go ba tše 1 000! Ka baka leo, bafetoledi ba be ba sa kgone go kwa segagabo bona ka mehla. Le gona, ba be ba sa kgone go hwetša bana babo rena le dikgaetšedi bao ba swanelegago bao ba bego ba ka thuša ka go fetolela le go rekhota ka Setojolabal.

 Ka baka la mabaka a, Komiti ya Bongwadi ya Sehlopha se Bušago e be e nyaka go hudušetša bafetoledi lefelong leo go bolelwago Setojolabal. Ka gona, bana babo rena ba ile ba reka moago ke moka ba o mpshafatša. Go reka moago le go o mpshafatša go be go le kaone kudu go feta go aga goba go renta diofisi.

 Mofetoledi yo mongwe o hlalosa kamoo a ilego a holega ka gona. O re: “Ke feditše mengwaga e lesome ke šoma lekaleng eupša ga sa nka ka kopana le lapa leo le bego le bolela segagešo. Gona bjale ofisi ya rena e lefelong leo batho ba bantši ba bolelago Setojolabal. Letšatši le letšatši ke kopana le batho bao ba bolelago Setojolabal. Ga bjale ke ithutile mantšu a mantši a mafsa e bile ke kgona go kaonefatša mošomo wa ka.”

 Ge maemo a dumela, ngwageng wa tirelo wa 2021 go swanetše go agwa goba go mpshafatšwa di-RTO tše 75 le mafelo ao go swarelwago dikolo tša mokgatlo. Mešomo ya go feleletša makala ao a šetšego a thomile go agwa e tlo tšwela pele. Mešomo yeo e akaretša mošomo wa go aga moago o mogolo wa go rekhotela dibidio wa kua Ramapo, New York, gotee le go huduša lekala la Argentina le la Italy. Go tlaleletša moo, go swanetše gore go agwe Diholo tša Mmušo tše 1 000. Mafelo ao a fetago 6 000 ao bana babo rena ba swarelago diboka go ona ga a sa le maemong a mabotse, ka gona a swanetše go lokišwa. Go sa na le Diholo tša Mmušo tše 4 000 tšeo di swanetšego go mpshafatšwa.

 Tšhelete ya go aga le go mpshafatša mafelo a e tšwa kae? Ngwanabo rena Lázaro González, wa Komiti ya Lekala la Central America, o ile a araba potšišo ye ge a be a bolela ka mošomo wa go mpshafatša Ofisi ya Bofetoledi ya Tojolabal. O itše: “Nageng ya gabo rena, ga rena tšhelete le dilo tše dintši tša go aga. Ka gona, ka ntle le thušo ya bana babo rena lefaseng ka moka, re ka se kgone go aga diofisi tša bofetoledi tša maleme ao a bolelwago nageng ye. Tšhelete yeo bana babo rena ba neetšego ka yona lefaseng ka moka e ile ya thuša gore bafetoledi ba kgone go šomela moo maleme a gabo bona a bolelwago gona. Re leboga bana babo rena lefaseng ka moka ka meneelo ya bona ya go tšwa pelong.” Re kgona go aga le go mpshafatša meago ya rena ka baka la meneelo ya bana babo rena lefaseng ka moka. Ba bantši ba bona ba ntšha meneelo go donate.pr418.com.