Ka March 2020, ge Mokgatlo wa Lefase wa tša Maphelo o be o tsebiša ka leuba la COVID-19, batho ba bantši ba be ba sa nagane gore bolwetši bjo bo tlo ama lefase ka moka ngwaga ka morago ga moo. Leuba le le ile la swara batho ba dimilione go akaretša le Dihlatse tša Jehofa e bile la ba ama maikwelong le ka tša ditšhelete. Na Dihlatse tša Jehofa di ile tša rulaganya bjang le go nea tlhakodišo ka nako ya leuba le?

 Ka tlhahlo ya Komiti ya Balomaganyi ya Sehlopha se Bušago sa Dihlatse tša Jehofa, go ile gwa hlongwa Dikomiti tša Tlhakodišo tše fetago tše 950 ka lebaka la bolwetši bja COVID-19. Maemong a mangwe go ba go lokišeditšwe thušo mo lefelong leo, gomme go a mangwe Dihlatse di ile tša holwa ke thušo ya ba mmušo. Dikomiti tša Tlhakodišo di ile tša rulaganya le mešomo e megolo ya tlhakodišo.

 Ka mohlala, nagana ka seo se diregilego kua Paraguay. Kuranta e nngwe e itše: “Ka baka la mathata a ditšhelete batho ba bantši ba Paraguay ga ba na dijo.” Eupša Komiti ya Tlhakodišo ya Paraguay e be e šetše e thomile go nea malapa mekotla ya dilo tšeo ba di hlokago tša go lekana dibeke tše pedi e lego dijo, dilo tša go hlwekiša le tša go hlapa. Mokotla o tee o be o dira R485.

 Bašomi ba modiro wa tlhakodišo ba be ba itšhirelatša le go thuša batho ba bangwe bjang gore ba se ke ba fetelwa ke COVID-19? Ba apara di mask le go ema kgole le kgole. Ba kgonthišetša le gore dikhampani tšeo di ba neago dijo di di lokišeletša mafelong a hlwekilego e bile di latela megato ya tšhireletšego. Se se akaretša go kgonthiša gore bao ba šomago ka mekotla ye ba apara dilo tša go itšhireletša, go hlwekiša le go bolaya ditwatši ka gare ga dikoloi tša bona le go bea mekotlana yeo mafelong ao ditwatši di šetšego di bolailwe. Ke moka bao ba išago mekotla yeo ba emela kgole le bana babo rena bao ba e amogelago.

 Ka January 2021, Komiti ya Balomaganyi e dumeletše gore go dirišwe tšhelete ya ka godimo ga R405 000 000 modirong wa tlhakodišo wa COVID-1 Makala le Dikomiti tša Tlhakodišo di dirišitše tšhelete ye ya meneelo gabotse go reka dilo tšeo di hlokagalago ka theko e kaone. Ka mohlala kua Chile, bana babo rena ba go rulaganya modiro wo wa tlhakodišo ba be ba nyaka go reka dinawa tša go lekana dikhilograma tše 750. Eupša theko ya dinawa e ile ya oketšwa gabedi ka kgwedi e tee. Diiri tše pedi ka morago ga go dumelelana go reka dinawa tšeo ka theko ya godimo, morekiši o ile a botša gore go na le moreki yo a bušitšego dinawa tše a bego a di rekile. Go e na le le gore ba reke dinawa ka tšhelete yeo ba dumelelanego ka yona, morekiši o ile a rekišetša bana babo rena ka tšhelete ya kgwedi ya go feta.

 Lega go le bjalo, ge bana babo rena ba be ba eya go tšea dinawa tšeo morekiši o ile a leka go se sa ba rekišetša tšona ka ge a ba latofatša ka gore ba swana le mekgatlo e mengwe yeo e abago dijo ka tsela e sa amogelegego. Ka morago ga thapelo e kopana le ya setu, ngwanabo rena o ile a botša morekiši gore phuthego e nngwe le e nngwe e šetši e hlahlobilwe go bona gore ke bomang bao ba hlokago thušo. Bana babo rena ba ile ba hlalosa gape le gore ka gobane ditšo tša bao ba amogelago mekotla di sa swane, lapa le lengwe le lengwe le abelwa mokotla wa dilo tšeo le di hlokago. Mafelelong ba ile ba kgodiša morekiši gore meneelo ka moka ya Dihlatse tša Jehofa ke ya boithatelo. Se se ile sa mo kgahla kudu. Morekiši ga se a dumela feela go ba rekišetša ka theko ya fase eupša o ile a ba nea le moneelo wa dinawa tšeo di lekanago dikhilograma tše 400 ge bana babo rena ba e tla go reka gape.

 Mohlologadi yo a godilego yo a bitšwago Lusu yo a dulago Liberia, o dula le morwedi wa gagwe le monna wa gagwe le bana ba bona ba bararo. Ge ba be ba eja dijo tša mesong le go bala temana ya letšatši, motlogolo wa Lusu wa mengwaga e šupa o ile a bona gore ga go sa na dijo ka ntlong. O ile a botšiša gore: “Re tlo ja eng?” Lusu o ile a mo kgodiša gore o šetše a kgopetše thušo go Jehofa le gore o a tseba gore Jehofa o tlo ba thuša. Ka lona letšatši leo, Lusu o ile a amogela mogala wa bagolo ba mo laletša gore a tle a tšee mokotla wa dijo. O re: “Motlogolo wa ka o re gona bjale o a bona gore Jehofa o a kwa le go araba dithapelo ka gobane Jehofa o arabile ya ka.”

 Mosadi yo mongwe wa kua Democratic Republic of Congo o dula kgauswi le lelapa leo e lego Dihlatse. Ka morago ga go bona lapa le le hwetša dijo go bakristegotee le bona o itše: “Ka morago ga bolwetši bja corona, re tlo ba Dihlatse tša Jehofa ka gobane ba hlokomela bana babo bona le dikgaetšedi ka nako tša mathata.” Monna wa gagwe o ile a mmotšiša gore: “Na o tlo ba yo mongwe wa Dihlatse tša Jehofa ka baka la dijo?” O ile a mo araba ka gore: “Aowa, eupša mokotlana woo wa dijo ke bohlatse bja lerato la kgonthe.”

 Dihlatse tša Jehofa di ile tša arabela ka pela ka dilo tšeo bana babo rena le dikgaetšedi ba di hlokago nakong ya bolwetši bja corona ka baka la moneelo wa gago wa boithatelo. Re leboga meneelo yeo o e ntšhitšego o diriša donate.pr418.com.