Beibele e boletše e sa le pele gore “setšhaba se tla tsogela setšhaba” gomme gwa ba le ditšhišinyego tša lefase ‘bofelong bja tshepedišo ya dilo.’ (Mateo 24:3, 7) Re ile ra bona go phethagala ga boporofeta bjo ngwageng wa tirelo wa 2023. a Eupša Dihlatse tša Jehofa di ile tša bontšha lerato nakong ya dintwa le dikotsi tša tlhago mafelong ao a ka bago a 100. Ba bontšhitše seo bjang?

 Nakong ya ngwaga wa tirelo wa 2023, bana babo rena ba ile ba welwa ke dikotsi tša tlhago le dikotsi tšeo di hlodilwego ke batho tše di fetago tše 200. Mokgatlo wa Dihlatse tša Jehofa o dirišitše tšhelete ya ka godimo ga dimilione tše lesome tša di ditolara b go tšwa go moneelo wo o neelwago lefaseng ka bophara bakeng sa modiro wa tlhakodišo. Se se akaretša le meneelo yeo bana babo rena le dikgaetšedi ba e ntšhitšego ka boithatelo go thuša bao ba hlokago, bao ba dulago kgauswi le moo. Bona kamoo meneelo ya lena e dirišwago go thuša bana babo rena le dikgaetšedi bao ba wetšwego ke dikotsi tša tlhago.

 Mafelo a mangwe kua Nigeria a fela a e ba le mafula. Eupša mafula ao a bilego gona ka October 2022 e bile a maatla kudu go feta kamoo naga ya Nigeria e ilego ya ba le wona ka mengwa e lesome. Mašemo a magolo ao a fetago 676 000 hectares a ile a senyega, gomme batho ba ka godimo ga dimilione tše pedi ba ile ba swanelwa ke go tlogela magae a bona. Lekala la Nigeria le ile la kgetha Komiti ya Modiro wa Tlhakodišo gore ba rulaganye ditsela tšeo ba ka thušago bana babo rena ka tšona le gore ba dule ba tiile moyeng.

•   Bagoeledi ba 7505 ba ile ba swanelwa ke go tlogela magae a bona

•   Magae a 860 a ile a senyega

•   Diholo tša Mmušo tše 90 le Holo ya Kopano e tee di ile tša tšewa ke mafula

 Go dirišitšwe ka godimo ga ditolara tše 250,000 go modiro wa tlhakodišo wo o akaretšago:

•   Dijo tša go swana le reise, dinawa le makaroni

•   Dilo tša ka ntlong tša go swana le materase le dilo tša go thibela menang

•   Go lokiša le go aga leswa magae ao a senyegilego

 Bana babo rena ba kgonthišeditše bjang gore meneelo e dirišitšwe gabotse? Tsela e nngwe yeo ba dirilego se ka yona ke ka go lebelela gore ke meago efe yeo e swanelwago ke go lokišwa. Ge e ba moago o be o swanetše go agwa ka leswa, o be o agwa go swana le dintlo tšeo di lego lefelong leo.

 Bana babo rena le dikgaetšedi ba tloga ba leboga thušo yeo ba e hweditšego. Kgaetšedi yo mongwe o itše: “Mafula a ile a hlakahlakanya maphelo a rena ka gobane mašemo a rena a ile a senyega. Ebile seo se ile sa dira gore re hloke madulo. Re be re imologile ge bana babo rena le dikgaetšedi ba etla ka lona letšatši leo go re thuša ka go re nea madulo ao a šireletšegilego. Re hweditše thušo ge re hwetša dijo tšeo di tšwago ofising ya lekala. Re be re feletšwe ke mantšu ge re bona go phethagala ga Johane 13:34, 35 maphelong a rena. . . . Ruri lerato la nnete le gona. Nna le lapa laka re leboga go tšwa dipelong gore bana babo rena ba ile ba re thuša ka nako ya maleba.”

 Ba bangwe ba ile ba bona modiro wa rena wa tlhakodišo mo re dulago gona. Kgoši ya moo setšhabeng kua Sabagreia, e lego Bayelsa State, o itše: “Go na le mekgatlo le dikereke tše dintšhi lefaseng eupša ke Dihlatse tša Jehofa feela bao ba dirilego selo sa mohuta wo. . . . Mokgatlo wa lena o phala mekgatlo ka moka ya lefaseng.”

 Nakong ya February 2023, go bile le mello ya ka godimo ga e 400 yeo e ilego ya senya kua Chile. Mašemo ao a ka lekanago bogolo bja 430 000 hectares gotee le dilo tše dingwe tše bohlokwa kua Chile di ile tša senywa. Batho bao e ka bago ba 8000 ba ile ba tlošwa magaeng a bona. Gateetee ka morago ga gore dikotsi tša tlhago di be gona, ofisi ya lekala e ile ya thoma go rulaganya modiro wa tlhakodišo.

•   Bagoeledi ba 222 ba ile ba swanelwa ke go tlošwa magaeng a bona

•   Magae a 20 a ile a senywa

 Go dirišitšwe tšhelete ya ka godimo ga ditolara tše 200 000 modirong wa tlhakodišo, yeo e akaretšago:

•   Dijo le meetse

•   Makhura a koloi, dilo tša go hlwekiša le dihlare

•   Go aga leswa magae ao a senyegilego

 Lapa le lengwe le ile la makala ge ba hwetša gore dilo tša bona ka moka di senyegile go akaretša legae la bona le kgwebo. Se se ile sa dira gore lapa leo le hloke seo le ka iphedišago ka sona. Matšatši a mmalwa a mathomo lapa leo le ile la kwa bohloko ge le bona moo ntlo ya bona e be go e agilwe gona go se sa na selo. Eupša ge ba bona ntlo ya bona e agwa gape ba ile ba ikwa ba le kaone. Go hwetša lerato leo le tšwago go baithaopi go ile gwa ba thuša go lebeletšana le mathata a bona. Lapa leo le ile la kgongwa ke seo baithaopi ba se dirilego gomme seo se ile sa dira gore ba šome le bona go thuša go agela ngwanabo rena yo mongwe ntlo.

 Bana babo rena le dikgaetšedi ba bantšhi ba ile ba kgongwa ke modiro wa rena wa tlhakodišo. Ngwanabo rena yo mongwe o itše: “Go thabiša kudu go bona kamoo Jehofa a dirišago Komiti ya Modiro wa Tlhakodišo ka gona. Letšatši ka morago ga ge kotsi e diregile bana babo rena ba be ba šetše ba le gona go re thuša ka dilo tšeo re di hlokago. Go a kgothatša go bala ka modiro wa tlhakodišo wo o bilego gona dikarolong tše dingwe tša lefase. Eupša go fapane kudu ge e ba seo se go hlagela. O leboga mokgatlo wa Modimo le go feta ge o bona kamoo bana babo rena ba ekišago dika tša Jehofa ebile ba tshwenyegile ka seo re se hlokago gore re phele gabotse mmeleng, go dula re tiile moyeng le gore re dule re išitše maswafo fase. Re tloga re bona lerato la Jehofa.”

 Ge tshepedišo ye ya dilo e eya mafelelong re tlo tšwela pele re bona go oketšega ga dikotsi tša tlhago. (Luka 21:10, 11) Le gago le bjalo, Kgoši ya rena yeo e rategago Jesu Kriste o diriša phuthego ya Bokriste go re bontšha gore o na le rena “matšatši ka moka go fihla bofelong bja tshepedišo ya dilo.” (Mateo 28:20) Meneelo ya lena yeo e tšwago dipelong ya go thekga modiro wa lefase ka bophara, yeo e neelwago go donate.pr418.com le ka mekgwa e mengwe gotee le matla a lena le nako ya lena, di bontšha gore le thekga Mmušo le kgoši ya ona. Re tloga re leboga go tšwela pele ga lena le neela.