DULANG LE PHAKGAME!
Ngwaga wa 2022 e Bile Ngwaga wa Mathata—Beibele e Re’ng?
Ngwageng wa 2022, go bile le dintwa, mathata a ditšhelete le dikotsi tša tlhago. Beibele ke yona e nnoši yeo e ka re botšago gore ditiragalo tše di ra go re’ng.
Dilo tšeo di diregilego ka 2022 di ra gore’ng?
Dilo tšeo di diragetšego ngwageng wa go feta di bontšha gabotse gore re phela nakong yeo Beibele e e bitšago ‘mehla ya bofelo.’ (2 Timotheo 3:1) Mehla yeo e thomile ka 1914. Ekwa gore ditiragalo tše di sepedišana bjang le dilo tšeo Beibele e boletšego e sa le pele gore di tla direga mehleng ya rena:
“Dintwa.”—Mateo 24:6.
“2022 e bile ngwaga woo naga ya Yuropa e bilego le ntwa e nngwe gape e šoro.” a
Bala sehlogo seo se rego “Russia e Hlasela Ukraine.”
“Tlhaelelo ya dijo.”—Mateo 24:7.
“Ngwageng wa 2022 go bile le tlala e kgolo kudu.” b[2]
Bala sehlogo seo se rego “Ntwa ya Kua Ukraine e Dira Gore mo Lefaseng go be le Tlhaelelo ya Dijo le go Feta.”
“Leuba la malwetši.”—Luka 21:11.
“Bolwetši bja Polio bo ile bja boa gape, bja monkeypox ya ba tlhobaboroko e bile bja COVID-19 bo tšwela pele bo baka mathata. Dilo tše di bontšha kamoo malwetši ao a fetelago a lego kotsi ka gona le kamoo a amago batho ka gona.” c
Bala sehlogo seo se rego “Batho ba 6 Milione ba Bolailwe ke Bolwetši bja COVID.”
“Go tla bonagala dilo tše di boifišago.”—Luka 21:11.
“Phišo e kgolo kudu, komelelo, mello ya tlhaga le mafula. Selemo sa 2022 se tla gopolwa ka dikotsi tše dintši tša tlhago tšeo di sentšego kudu, tša bolaya batho ba bantši gomme tša dira gore ba bantši lefaseng ka moka ba lahlegelwe ke magae a bona.” d
Bala sehlogo seo se rego “Phišo e Feteletšego Yeo e Lego Lefaseng ka Moka.”
“Meferefere.”—Luka 21:9.
“Ka 2022 batho ba ile ba toyitoyela mmušo ka ge ba be ba galefišitšwe ke go ba le mathata a ditšhelete kudukudu ka ge dilo di be di thoma go tura.” e
Bala sehlogo seo se rego “Go Namelela ga Theko ya Dilo Lefaseng ka Moka.”
Go tla direga’ng ngwageng o tlago?
Ga go yo a tsebago gore ka 2023 go tla direga eng. Eupša seo re se tsebago ke gore e se kgale, Mmušo wa Modimo goba mmušo wa magodimong o tlo fetoša lefase. (Daniele 2:44) Mmušo woo o tlo fediša dilo ka moka tšeo di dirilego gore batho ba tlaišege gomme wa kgonthišetša gore thato ya Modimo e a direga mo lefaseng.—Mateo 6:9, 10.
Re go kgothaletša gore o kwe keletšo ya Jesu Kriste gomme o ‘dule o phakgame,’ e le gore o bone kamoo dilo tše di diregago mo lefaseng di phethagatšago boporofeta bja Beibele ka gona. (Mareka 13:37) Hle re tsebiše ge e ba o nyaka go kwa gore Beibele e ka go thuša bjang gona bjale le gore e ka thuša bjang wena le ba lapa la gago gore le be le kholofelo ya gore dilo di tlo loka nakong e tlago.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
You May Also Like
DIPOTŠIŠO TŠA BEIBELE DI A ARABJA
Ke Dilo Dife Tšeo di Bontšhago Gore re Phela “Mehleng ya Bofelo,” Goba ‘Nakong ya Bofelo’
Beibele e hlalosa ditiragalo le maemo a pele ga “bofelo bja lefase.”
MOROKAMI
Modimo o Kgauswi le go Fediša Tlaišego
Re tseba bjang gore Modimo o kgauswi le go fediša tlaišego le go hloka toka?
ESSENTIAL BIBLE TEACHINGS
Mmušo wa Modimo ke Eng?
Ge Jesu a be a le mo lefaseng, o boletše ka Mmušo wa Modimo go feta selo le ge e le sefe. Ke kgale balatedi ba gagwe ba rapelela gore Mmušo woo o tle.
MABAPI LE RENA
Kgopela Thuto ya Mahala ya Beibele
Ithute Beibele, goba o ithute ka mo go oketšegilego ka Dihlatse tša Jehofa.
