Ge ngwaga wa 2023 o thoma, re na le kholofelo ya gore rena le ba malapa a gabo rena, re diragalelwe ke dilo tše dibotse. Ke ka baka la’ng re na le kholofelo?

 Beibele e na le ditaba tše dibotse tša gore mathata ao re lebanego le ona gona bjale a tlo rarollega go se kgale. Ge e le gabotse, Beibele e “ile [ya] ngwalelwa go re ruta, gore. . . ka khomotšo e tšwago Mangwalong re be le kholofelo.”—Baroma 15:4.

•   Bala sehlogo seo se rego “A Real Hope for a Better Tomorrow” gore o kgone go ithuta kamoo go oketšegilego ka dilo tšeo Beibele e di tshepišago.

 Kholofelo yeo re e hwetšago ka Beibeleng e swana le “tshetledi ya sekepe ya maphelo a rena.” (Baheberu 6:19) Kholofelo ye e dira gore re dule re tiile. E ka re thuša gore re kgone go lebeletšana le mathata ao re kopanago le ona, re lebelele dilo gabotse e bile re hwetše le lethabo la nnete. Ka mohlala:

•   Ekwa kamoo kholofelo ya Beibele e thušitšego monna yo mongwe yoo a bego a lemaletše bjala. Bogela bidio yeo e rego Ke be ke sa Thabišwe ke Tsela Yeo ke Bego ke Phela ka Yona.

•   Ekwa kamoo kholofelo ya Beibele e ka re thušago ka gona ge motho yo re mo ratago a hlokofala. Bogela bidio yeo e rego Khomotšo go Bao ba Hlokofaletšwego.

 Batho ba bantši ba na le kholofelo ya gore ba tla diragalelwa ke dilo tše dibotse, eupša ba ipotšiša ge e ba di tla direga e le ka nnete. Beibele e tshepiša seo se fapanego. Ka baka la’ng? Ka gobane ditshepišo tša Beibele di tšwa go Jehofa Modimo a, “yo a ka se kego a aketša.” (Tito 1:2) Ke Jehofa feela yo a ka kgonago go phethagatša ditshepišo tša gagwe ka moka; a ka dira selo se sengwe le se sengwe seo “a ratago go se dira.”—Psalme 135:5, 6.

 Re duma gore le wena o holwe ke dikholofetšo tša kgonthe tša ka Beibeleng. Ge o ka “hlahloba Mangwalo ka kelohloko,” o tlo kgona go tshepa seo Beibele e se bolelago. (Ditiro 17:11) O ka ithuta kamoo go oketšegilego ka go leka thuto ya mahala ya Beibele. Thoma ngwaga wa 2023 o na le kholofelo ka bokamoso!