Bjale ka ge re bone ntweng ya Ukraine, baetapele ba bantši ba bodumedi bao ba ipitšago Bakriste ba tšea karolo dintweng. Bona kamoo baetapele bao ba thekgago mahlakore ka bobedi a ntwa:

•   Go ya le ka The Jerusalem Post ya March 16, 2022, Metropolitan Epiphanius wa mathomo yo a dulago Kyiv o itše: “Re leboga kudu mašole ao a lwetšego naga ya gabo rena ya Ukraine . . . Re le thekga ka dipelo tša rena ka moka e bile re a le rapelela.”

•   “Moetapele wa kereke ya Orthodox kua Russia o ile a swarela mašole a Russia tirelo e kgethegilego ka Sontaga, tirelong yeo o ba kgothaleditše gore ba lwele naga ya gabo bona ‘ka ge e le Marussia a nnoši a ka kgonago go e lwela’ ge Moscow e sa dutše e elwa le Ukraine.”—Reuters, April 3, 2022.

 Na Bakriste ba swanetše go tšea karolo ntweng? Beibele e re’ng ka seo?

 Beibele e re balatedi ba Jesu Kriste ba therešo ga ba tšee karolo ntweng.

•   “Bušetša tšhoša ya gago lefelong la yona, gobane bohle bao ba dirišago tšhoša ba tla bolawa ka tšhoša.”—Mateo 26:52.

   Na motho yo a thekgago ntwa goba yo a e tsenelago o tloga a ekwa mantšu a Jesu?

•   “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba ka, ge e ba le ratana.”—Johane 13:34, 35.

   Na motho yo a thekgago ntwa o bontšha mohuta wa lerato leo Jesu a itšego le tlo hlaola barutiwa goba balatedi ba gagwe?

 E le gore o tsebe ka mo go oketšegilego, bala sehlogo seo se rego “Na Ntwa e Sepedišana le Bokriste?”

 Na ke mo go kwagalago gore re letele gore Bakriste ba se ke ba tšea karolo dintweng lehono? Ee. Beibele e boletše e sa le pele gore nakong ye ya rena e lego “mehleng ya bofelo,” go tla ba le batho ba go tšwa ditšhabeng ka moka bao ba ‘ka se sa hlwago ba ithuta ntwa’ go ya le ka ge Jesu a boletše.—Jesaya 2:2, 4.

•   E le gore o kwe ka mo go oketšegilego bala dihlogo tšeo di lego ka go Morokami wo o rego “Modimo o Lebelela Ntwa Bjang?”

 Kgauswinyane Jehofa, a “Modimo wa khutšo,” o tlo diriša mmušo wa gagwe wa legodimong go phološa batho “kgatelelong le bošorong.”—Bafilipi 4:9; Psalme 72:14.

•   Bogela bidio ya Mmušo wa Modimo ke Eng? go bona gore o tlo dira seo bjang.