“Go kgotlelelana go thušitše batho ba bantši gore ba kgone go ba le khutšo.”—UNESCO Declaration of Principles on Tolerance, 1995.

 Go se kgone go kgotlelelana go ka dira gore batho ba nyatšane gaešita le go hloyana. Maikwelo a go swana le a, a ka dira gore batho ba feleletše ba bolela mantšu ao a bontšhago lehloyo, ba kgetholle ba bangwe le go baka dintwa.

 Batho ba hlalosa lentšu kgotlelelo ka ditsela tša go se swane. Ba bangwe ba re batho bao ba kgonago go kgotlelela batho ba bangwe ba swanetše go rata dilo tšeo batho bao ba di dirago le mekgwa ya bona. Ba bangwe ba dumelelana le seo Beibele e se bolelago ge e re, batho ba go kgona go kgotlelela ba bangwe ba hlompha diphetho tša batho ba bangwe le ditumelo tša bona le ge bona ba sa dumelelane le tšona.

 Na Beibele e ka kgona go thuša batho gore ba kgone go kgotlelelana mo nakong ye?

Beibele e reng ka go kgotlelelana?

 Beibele e re kgothaletša gore re kgotlelelane. E re: “Anke go lekalekana ga lena go tsebje bathong bohle.” (Bafilipi 4:5) Beibele e re kgothaletša gore re hlomphe batho ba bangwe, re ba sware gabotse e bile re ba naganele. Batho bao ba dirišago keletšo ye ba ka no se dumelelane le tsela yeo ba bangwe ba bonago dilo ka yona goba go di dira, eupša ba dumelela batho bao ba itshwara ka tsela yeo ba nyakago.

 Lega go le bjalo, Beibele e re ruta gore go na le tsela yeo Modimo a nyakago batho ba itshwara ka yona. E re: “[Modimo] o go boditše se sebotse, wena motho.” (Mika 6:8) E bile e re botša ka melao yeo e tšwago go Modimo yeo e thušago batho gore ba thabele bophelo.—Jesaya 48:17, 18.

 Modimo ga se a re fa tshwanelo ya gore re ahlole batho ba bangwe. Beibele e re, “Go na le o Tee yo e lego monei wa molao e bile e le moahlodi . . . wena o mang gore o ahlole moagišani wa gago?” (Jakobo 4:12) Modimo o file yo mongwe le yo mongwe wa rena tokologo ya go ikgethela mo e lego gore yo mongwe le yo mongwe o tla buna seo a se bjalago.—Doiteronomio 30:19.

Beibele e reng ka tlhompho?

 Beibele e re re swanetše go ‘hlompha batho bohle.’ (1 Petro 2:17, Beibele ya Taba ye Botse) Batho bao ba kgethago go phela ka go dumelelana le seo Beibele e se rutago ba swara batho ka moka ka tlhompho, go sa šetšwe gore ke ba bodumedi bofe goba ba phela bophelo bja mohuta mang. (Luka 6:31) Se ga se bolele gore batho bao ba phelago ka melao ya Beibele ba tla thekga selo se sengwe le se sengwe seo batho ba se dumelago goba seo ba se naganago goba ba thekga phetho e nngwe le e nngwe yeo batho ba e dirago. Eupša go e na le gore ba se ke ba hlompha batho bao ba tlo leka ka thata gore ba ekiše tsela yeo Jesu a bego a swara batho ka yona.

 Ka mohlala, Jesu o ile a boledišana le mosadi yo a bego a le bodumeding bjo yena a bego a sa dumelelane le bjona. Le gona mosadi yo, o be a dula le monna yo a bego a se a mo nyala, e lego bophelo bjoo Jesu a bego a sa dumelelane le bjona. Eupša o ile a boledišana le mosadi yoo ka tlhompho.—Johane 4:9, 17-24.

 Go swana le Jesu, Bakriste ba ikemišeditše go hlalosetša batho bao ba ikemišeditšego go ba theetša ge ba ba botša ka ditumelo tša bona, eupša ba dira seo ka “tlhompho e tseneletšego.” (1 Petro 3:15) Beibele e kgothaletša Bakriste gore ba se ke ba gapeletša batho gore ba dumele seo bona ba se dumelago. E re molatedi wa Kriste “ga se a swanela go lwa, eupša o swanetše go ba bonolo go bohle,” go akaretša le bao ba sego bodumeding bjo botee le bona.—2 Timotheo 2:24.

Beibele e reng ka lehloyo?

 Beibele e re kgothaletša gore re ‘phegelele khutšo le batho bohle.’ (Baheberu 12:14) Motho yo a phegelelago khutšo ga a hloye batho ba bangwe. Ga a dire dilo tšeo a sego a swanela go di dira eupša o leka ka thata gore a phedišane le batho ba bangwe ka khutšo. (Mateo 5:9) Le gona, Beibele e kgothaletša Bakriste gore ba rate manaba a bona ka go ba swara ka botho le ge bona ba sa ba sware gabotse.—Mateo 5:44.

 Beibele e re, Modimo o ‘hloile’ goba o ‘šišimišwa’ ke dilo tšeo di dirago gore batho ba bangwe ba se sa ba le seriti goba dilo tšeo di kwešago batho ba bangwe bohloko. (Diema 6:16-19) Ge e le gabotse Beibele mo e šomiša lentšu go hloya go hlalosa kamoo Modimo a bontšhago gore o tloga a hloile dilo tše mpe tšeo di dirwago. Beibele e bontšha gore Modimo o ikemišeditše go lebalela le go thuša batho bao ba nyakago go fetoga gomme ba phele ka go dumelelana le melao ya gagwe.—Jesaya 55:7.

Ditemana tša Beibele tšeo di bolelago ka go kgotlelelana le tlhompho

 Tito 3:2: ‘Eba le tekatekano, o bontšhe boleta bjohle go batho ka moka.’

 Mateo 7:12: “Dilo tšohle tše le nyakago batho ba le dira tšona, le lena le ba dire tšona.”

 Joshua 24:15: “Ikgetheleng lehono yoo le tlago go mo hlankela”

 Ditiro 10:34: “Modimo ga a bebe sefahlego.”

 Habakuku 1:12, 13: “[Modimo] o palelwa ke go bogela bokgopo.”

 Baroma 12:19: “Šuthelelang kgalefo ya Modimo; gobane go ngwadilwe gwa thwe: “Tefetšo ke ya ka, ke tla lefetša, go re’alo Jehofa.” a

 Jehofa Modimo ga a dumelele batho ba itefeletša. O tlo kgonthišetša gore toka e tlo direga ka nako yeo yena a e beilego. Go ithuta ka mo go oketšegilego bala sehlogo seo se rego, “Will the Cry for Justice Be Heard?”