Go letetšwe gore batho ba e ka bago ba 5 000 000 ba bogele Papadi ya Sebjana sa Lefase ya FIFA yeo e tlago go thoma ka di-20 tša November go fihla ka di-18 tša December 2022. Ba bantši ba nagana gore dipapadi tša mohuta wo di hola kudu go feta go no dira gore batho ba bogele papadi ba le felo gotee.

•   Nelson Mandela, yo e kilego ya ba mopresidente wa Afrika Borwa o ile a re: “Papadi e na le matla a go fetoša lefase. E na le tlhohleletšo. E na le tsela ya moswananoši ya go kopanya batho ya ba dira selo setee.”

•   Gianni Infantino, e lego mopresidente wa FIFA, o itše: “Kgwele ya maoto e kopanya batho ka gobane e dira gore batho ba e rate, ba be le kholofelo, ba thabe, ba rate batho ba bangwe e bile ba rate dilo tša go swana.” a

 Na Papadi ya Sebjana sa Lefase goba papadi le ge e le efe e ka ba le mafelelo ao a mabotse? Na go na le kholofelo ya gore papadi ye e tla dira gore go be le khutšo le botee?

 Papadi ya Lefase ya ngwaga wo, e dira gore batho ba se ke ba nagana ka kgwele ya maoto feela. Dipapadi tše di dirile gore batho ba ngangišane ka ditaba tša setšhaba le tša dipolotiki tšeo di akaretšago ditokelo tša batho, semorafo le go se lekalekane ka maemo a ditšhelete.

 Lega go le bjalo, batho ba bantši ba thabela go bogela dipapadi tša ditšhabatšhaba tša go swana le Papadi ya Sebjana sa Lefase. Le ge batho ba ka nyaka gore dipapadi tše di ba dire selo setee, di ka se kgone go ba dira selo setee go ya go ile. Go e na le moo, tsela yeo batho ba itshwarago ka yona le dilo tšeo ba di dirago, di dira gore ba arogane, e lego maswao ao Beibele e boletšego gore re tlo bona ka ona gore re phela “mehleng ya bofelo.”—2 Timotheo 3:1-5.

 Beibele e re botša gore go na le selo setee feela seo se ka dirago gore batho lefaseng ka moka e be selo setee. E tshepiša gore batho lefaseng ka moka e tla ba batee ge go buša mmušo wa legodimong wo o bitšwago “Mmušo wa Modimo.”—Luka 4:43; Mateo 6:10.

 Jesu Kriste, e lego Kgoši ya Mmušo wa Modimo o tlo kgonthišetša gore lefaseng ka moka go tlo ba le khutšo. Beibele e re:

•   Moloki o tla atlega, le khutšo e tla ata.”—Psalme 72:7.

•   O tla hlakodiša modiidi yo a llelago thušo . . . ​O tla lopolla moya wa bona kgatelelong le bošorong.”—Psalme 72:12, 14.

 Le lehono, dithuto tša Jesu di šetše di kopantše batho ba dimilione dinageng tše 239. Ba ithutile go se sa hloya batho ba merafo e mengwe. E le gore o kwe ditaba tše dingwe, bala dihlogo tšeo di tšwelelago ka tlase ga sehlogo seo se rego “Re ka Fenya Lehloyo.”