Na Bosenyi bo tla ka bja Fela?
Ka morago ga gore go be le tlhaselo, o ka ipotšiša gore: Na Modimo o na le taba le rena? Ke ka baka la’ng dilo tše di direga? Na bosenyi a bo tla ka bja fela? Ke tlo phela bjang ke dula ke boifa? Beibele e re nea dikarabo tše di kgotsofatšago tša dipotšišo tše.
Modimo o ikwa bjang ka bosenyi?
Modimo o hloile dintwa le bosenyi. (Dipsalme 11:5; Diema 6:16, 17) Moemedi wa Modimo e lego Jesu, o ile a kgalemela barutiwa ba gagwe ge ba be ba dira bošoro. (Mateo 26:50-52) Modimo ga a dumelele motho go dira bošoro, le ge ba bangwe ba bolela gore ba dira bošoro ka leina la Modimo. Ge e le gabotse ga a theetše dithapelo tša bona.—Jesaya 1:15.
Modimo o na le taba le batho ka moka bao ba tlaišegago, go akaretša le bao ba tlaišwago ke ditlhaselo tša bosenyi. (Dipsalme 31:7; 1 Petro 5:7) Beibele e bontšha gape gore Modimo o tlo fediša bošoro.—Jesaya 60:18.
Seo se hlolago bosenyi
Beibele e re botša gore ke eng seo se hlolago bosenyi, e re: “Motho [o] buša yo mongwe gore a mo gobatše.” (Mmoledi 8:9) Nakong e fetilego batho bao ba nago le matla ba be ba diriša bosenyi go gatelela batho ba bangwe. Ka baka la go gatelelwa, ba bangwe ba ile ba diriša bosenyi go itwela.—Mmoledi 7:7.
Phedišo ya bosenyi
Modimo o tshepiša gore o tlo fediša dintwa le poifo ke moka a dira gore go be le khutšo mo lefaseng. (Jesaya 32:18; Mika 4:3, 4) O tla:
Tloša seo se hlolago bosenyi. Mmušo wa Modimo o tla tšea legato la mebušo ya batho. Mmuši wa mmušo wo, Jesu Kriste, o tla swara batho ka moka ka toka, le go fediša kgatelelo le bošoro. (Psalme 72:2, 14) Ka nako yeo, ga go na yo a tlago go dira bosenyi. Batho “ba tla thaba kudu ka baka la go ata ga khutšo.”—Psalme 37:10, 11.
Fediša ditlamorago tša bosenyi. Modimo o tla fediša ditlamorago tša bosenyi bathong, e ka ba go gobala mmeleng goba maikwelong. (Jesaya 65:17; Kutollo 21:3, 4) O tshepiša le gore o tla tsoša bahu, ba boela ba phela lefaseng leo le nago le khutšo.—Johane 5:28, 29.
Beibele e re nea mabaka a kwagalago ao a dirago gore re tshepe gore Modimo o tla tšea kgato kgauswinyana. Le ga go le bjalo o ka ipotšiša gore, ‘Ke ka baka la’ng Modimo a sa fediše bosenyi gona bjale?’ E le gore o hwetše karabo, bogela bidio yeo e rego, Ke ka Baka la Eng Modimo a Dumelela Gore Batho ba Welwe ke Mathata?
a “Gantšhi “Bosenyi” bo hlaloswa e le go diriša dintwa kudu go tšhošetša bakeng sa go fihlelela maikemišetšo a tša dipolotiki, bodumedi goba a tša leago. Le ga go le bjalo, batho ba ka fapana ka dikgopolo mabapi le seo se ka lebelelwago e le tiro ya bosenyi.
You May Also Like
DIPOTŠIŠO TŠA BEIBELE DI A ARABJA
Mmušo wa Modimo ke Eng?
Ela hloko lebaka leo ka lona mmušo wa Modimo o phagametšego mebušo e mengwe ka moka.
MOROKAMI
Mmušo wa Modimo o tlo re Direla Eng?
Jesu o be a tseba gore Mmušo wa Modimo ke wona feela wo o ka rarollago mathata ka moka mo lefaseng. Mmušo woo o šetše o dirile eng gore re o tshepe?
ESSENTIAL BIBLE TEACHINGS
Ke ka Baka la Eng Modimo a Dumelela Gore Batho ba Welwe ke Mathata?
Beibele e re botša karabo ya nnete yeo e tlago go re homotša.
