Go ya ka World Health Organization (WHO), go fihla ka di-23 tša May 2022, batho ba 6 270 000 ba hlokofetše ka baka la bolwetši bja COVID-19. Eupša ditabeng tšeo di tšweleditšwego ka di 5 tša May 2022, mokgatlo wa WHO o akantše gore palo ya batho bao ba hlokofetšego ka baka la bolwetši bjo, e swanetše go ba e le godimo kudu. Mokgatlo woo o itše ka 2020 le 2021, “batho bao ba hlokofetšego ka baka la bolwetši bja COVID-19 e be e le ba ka lekanago 14 900 000.” Na go na le seo Beibele e se bolelago ka dilo tše tše di kwešago bohloko?

•    Jesu o boletše e sa le pele gore nakong yeo e bitšwago “mehleng ya bofelo” go be go tla ba le mauba a malwetši goba malwetši a fetelago.—Luka 21:11; 2 Timotheo 3:1.

 Boporofeta bja Jesu bo a phethagala lehono. E le gore o ithute ka mo go oketšegilego, bala sehlogo seo se rego, “Ke Eng Seo se Bontšhago Gore re Phela “Mehleng ya Bofelo” Goba Nakong ya Bofelo?

•    “Modimo wa khomotšo yohle . . . yo a re homotšago ditlaišegong tša rena tšohle.”—2 Bakorinthe 1:3, 4.

 Batho ba bantši bao ba lahlegetšwego ke baratiwa ba bona lehung, ba hweditše khomotšo ka Beibeleng. E le gore o ithute ka mo go oketšegilego, bala sehlogo seo se rego: “Kamoo o ka Kgotlelelago Bohloko bja go Hwelwa—Seo o ka se Dirago” le sa “Thušo e di Phalago ka moka Bakeng sa Bao ba Hwetšwego”

•    “ Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:10.

 Kgauswinyane “Mmušo wa Modimo” o tlo kgonthišetša gore “ga go na modudi yo a tla rego: ‘Ke a babja.’” (Mareka 1:14, 15; Jesaya 33:24) Bogela bidio yeo e rego Mmušo wa Modimo ke Eng? gore o tsebe ka Mmušo wo wa legodimong le gore o tlo dira eng.

 Re go mema gore o tle o ithute ka mo go oketšegilego gore Beibele e re’ng, e le gore wena le lapa la gago le tle le holwe ke keletšo ya yona e bohlale le ditshepišo tša Modimo tšeo di thabišago.