Ka di-19 tša May 2022, Lekgotla la tša Tšhireletšego la Ditšhaba tše Kopanego le ile la begelwa ke baetapele ba ka godimo ga ba 75 gore “tlhaelelo ya dijo lefaseng ka moka yeo e bego e šetše e mpefaditšwe ke bolwetši bja COVID-19 le go fetoga ga maemo a leratadima, e mpefala le go feta ka baka la ntwa yeo e lego kua Ukraine.” Ka moragonyana, The Economist e boletše gore “Mo lefaseng go šetše go na le mathata a mantši, eupša ntwa yeo e lego gona e tlo dira gore go be le batho ba bantši bao ba se nago dijo.” Beibele e boletše e sa le pele gore tlhaelelo ya dijo e be e tlo direga mehleng ye ya rena, e bile e re thuša go lebeletšana le mathata ao.

•    Jesu o ile a porofeta gore: “Setšhaba se tla tsogela setšhaba gomme mmušo wa tsogela mmušo; go tla ba le tlhaelelo ya dijo.”—Mateo 24:7.

•    Puku ya Beibele ya Kutullo e bolela ka banamedi ba bane ba dipere ba seswantšhetšo. O tee wa banamedi bao o emela ntwa. O latelwa ke yo mongwe yo a emelago tlala, e lego nakong yeo dijo di tlago go arolwa le go rekišwa ka theko ya godimo. “Ka lebelela gomme ka bona pere e ntsho; yo a e nametšego o be a swere sekala ka seatla sa gagwe. Ka kwa seo se kwagalago eka ke lentšu. . .‘Se re: “Khilograma ya korong ke tenariase, dikhilograma tše tharo tša garase ke tenariase.’”—Kutollo 6:5, 6.

 Boporofeta bjo bja Beibele mabapi le tlhaelelo ya dijo bo phethagala gona bjale e lego nakong yeo Beibele e e bitšago gore ke “mehleng ya bofelo.” (2 Timotheo 3:1) E le gore o ithute ka mo go oketšegilego ka ‘mehla ya bofelo’ le ka banamedi ba bane ba dipere bao go bolelwago ka bona ka Pukung ya Kutollo, bogela bidio yeo e rego, Ga e sa le go Tloga ka 1914 Bophelo bo Fetogile gomme o bale sehlogo seo se rego “Banamedi ba Bane ba Dipere—Ke Bomang?”

•    Beibele e na le dikeletšo tše šomago tšeo di ka re thušago go lebeletšana le mathata ao a swanago le go oketšega ga theko le tlhaelelo ya dijo. Bona mehlala e mengwe sehlogong seo se rego “Kamoo o ka Phelago ka Tšhelete e Nyenyane.”

•    Beibele e re nea le kholofelo ya gore maemo a tla kaonefala. E re holofetša gore “go tla ba le mabele a mantši mo lefaseng” gomme bohle ba tlo ba le dijo tše dintši. (Psalme 72:16) E le gore o ithute ka dikholofetšo tša Beibele ka bokamoso le gore ke ka baka la’ng o ka e tshepa, bala sehlogo seo se rego, “A Real Hope for a Better Tomorrow.”