Ka di 9 October 2024, World Wildlife Fund e ntšhitše pego e sa kgahlišego ya kamoo batho ba sa swarego diphoofolo tša naga gabotse ka gona. Go ile gwa utollwa gore “diphoofolo tša nageng di fokotšegile ka 73% mengwaga e 50 (1970-2020), e fetilego.”Pego ye e hlalositše gore: “Re ka bolela re tiišitše gore seo se tlago go direga mengwaga e mehlano ye e latelago, ke sona seo se tlago go re bontšha gore bokamoso bo re swaretše eng.”

 Batho ba bantšhi ba makatšwa ke dipego tša mohuta wo. Re rata lefase la rena le lebotse ebile re nyamišwa ke go bona diphoofolo tša naga di tlaišega. Re ikwa ka tsela ye ka gobane Modimo o re dirile gore re hlokomele diphoofolo.—Genesi 1:27, 28; Diema 12:10.

 O ka ipotšiša gore, ‘Na re ka kgona go šireletša diphoofolo tša naga? Beibele e re’ng?’

 Go sa šetšwe gore re leka ka thata bjang go hlokomela diphoofolo tša naga, ke Modimo fela yo a ka kgonago go di šireletša. Go ya ka Kutollo 11:18, Beibele e boletše e sa le pele gore Modimo o tlo “senya bao ba senyago lefase.” Temana ye e re ruta dilo tše pedi:

1.  1. Modimo o tlo dira gore batho ba se sa senya lefase.

2.  2. E se kgale Modimo o tlo tšea kgato. Re tseba seo bjang? Ka gobane lehono batho ba senya lefase go feta le ge e le neng pele.

 Modimo o tlo dira eng go rarolla bothata bjo? O tlo diriša Mmušo wa gagwe wo o lego legodimong go buša lefase ka moka. (Mateo 6:10) Mmušo wo o tlo nea batho bao ba kwago thuto le tlhahlo ya kamoo ba ka hlokomelago le go šireletša diphoofolo ka gona.—Jesaya 11:9.