Mopresitente wa World Bank Group o lemošitše pegong ya June 2022 gore “ikonomi ya lefase e kotsing gape. Theko ya dilo e oketšega ka lebelo mola e le gore batho ga ba na tšhelete e lekanego ya go reka.”

 International Monetary Fund e bolela gore, “theko ya makhura le dijo e ile godimo ka lebelo gomme ya dira gore batho bao ba dulago dinageng tšeo di diilago ba imelwe le go feta.”

 Beibele e re thuša go tseba gore ke ka lebaka la eng re e na le mathata a a ikonomi, gore re ka lebeletšana bjang le ona, le gore tharollo ya ona ya ka mo go sa felego ke efe.

•   Beibele e bitša nako yeo re phelago go yona gore ke ‘mehla ya bofelo.’—2 Timotheo 3:1.

•   Jesu o boletše gore “dilo tše di boifišago” tlo direga mo nakong ye. (Luka 21:11) Batho ba a tšhoga ge theko ya dilo e namelela ka lebelo. Batho ba tshwenyega ka dilo tša nakong e tlago, ba ipotšiša ge e ba ba tlo kgona go hlokomela malapa a bona.

•   Puku ya Kutollo e boletše e sa le pele gore theko ya dijo e tlo namelela mo mehleng ye. “Ka kwa seo se kwagalago eka ke lentšu. . . . Se re, ‘Khilograma ya korong goba dikhilograma tše tharo tša garase di tlo lekana mogolo wa letšatši ka moka.’”—Kutollo 6:6, Easy-to-Read Version.

 E le gore o ithute mo go oketšegilego ka ‘mehla ya bofelo’ le boporofeta bjo bo lego ka pukung ya Kutollo, bona bidio yeo e rego Ga e sa le go Tloga ka 1914 Bophelo bo Fetogile Kudu o be o bale le sehlogo seo se rego “Banamedi ba Bane ba Dipere—Ke Bomang?”

•   “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele.”—Jesaya 65:21, 22.

•   “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”—Psalme 72:16.

•   “‘Ka baka la go tlaišwa ga bahlaki, ka baka la go fegelwa ga badiidi, bjale ke tla ema,’ o re’alo Jehofa.”’—Psalme 12:5. a

 Kgaufsinyane Modimo o tlo fediša bodiidi, e sego nageng e tee feela, eupša lefaseng ka moka. E le gore o tsebe gore o tlo dira seo bjang, bala sehlogo seo se rego “Na go a Kgonega Gore Maemo a Ikonomi a Lekalekane?”

 Beibele e ka go thuša le lehono gore o kgone go lebeletšana le go hlatloga ga theko ya dilo. Bjang? E na le keletšo e botse ya kamoo o ka dirišago tšhelete ka bohlale. (Diema 23:4, 5; Mmoledi 7:12) E le gore o ithute ka mo go oketšegilego, bala sehlogo seo se rego “Šireletša Dilo Tšeo o Nago le Tšona” le seo se rego “Kamoo o ka Phelago ka Tšhelete e Nyenyane.”