‘Batho ba dira dilo tše dintši tšeo di tlago go dira gore kgauswinyane go be le mathata a tša leratadima. Metse e megolo e tlo khupetšwa ke meetse, go tlo ba le phišo yeo e sa kago ya ba gona, madimo ao a tšhošago, go hlokega ga meetse lefaseng ka moka, le go fedišwa ga diphoofolo le dimela tše dintši. Se ga e no ba go feteletša ditaba. Se ke seo borasaense ba rego se tlo direga ge e ba mebušo e sa fetoše tsela yeo e dirišago dilo tša tlhago tša go tšweletša dilo tša go swana le mohlagase, oli, le tše dingwe.’—Taba ye e boletšwe ke António Guterres, e lego mongwaledi wa Ditšhaba tše Kopanego (United Nations), pegong ya gagwe ya mabapi le mokgatlo wa Intergovernmental Panel on Climate Change yeo e tšwilego ka di-4 tša April, 2022.

 “Borasaense ba re go se kgale mo e ka bago diphaka ka moka tše 423 tša kua United States di tlo senyega o šoro ka baka la go fetoga ga leratadima, kudukudu ka ge leratadima le fetofetoga ka lebelo. Dilo tše mpe tšeo di ka diregago tša go swana le mollo le meetsefula, go tologa ga meetse ao a kgahlilego, go oketšega o šoro ga meetse a ka mawatleng le phišo e feteletšego, di kwagala okare di swana le dilo tšeo di tšhošago tšeo re ka balago ka tšona ka Beibeleng.”—Mantšu a a tšwa sehlogong seo se rego “Flooding Chaos in Yellowstone, a Sign of Crises to Come,” ka go kuranta ya The New York Times, June 15, 2022.

 Na mathata a polanete ya rena ya lefase a tla tsoga a rarollotšwe? Ge e ba go le bjalo, ke mang a tlago go a rarolla? Ekwa gore Beibele e reng.

 Beibele e re Modimo o tlo “senya bao ba senyago lefase.” (Kutollo 11:18) Lengwalo le le re ruta dilo tše tše tharo:

1.  1. Dilo tšeo batho ba di dirago di tlo dira gore lefase le senyege.

2.  2. Go senywa ga lefase go tlo fela.

3.  3. Ga go na motho yo a ka kgonago go rarolla mathata ao batho ba a bakilego a go senya lefase, eupša ke Modimo feela yo a tlago go a rarolla.

 Beibele e re “lefase le [tla] dula le le gona go iša mehleng ya neng le neng.” (Mmoledi 1:4) Se se ra gore batho ba tlo dula go lona go ya go ile.

•   Psalme 37:29 e re: “Baloki bona e tla ba beng ba lefase, ba tla dula mo go lona ka mo go sa felego.”

 Polanete ya lefase la rena e tlo lokišwa.

•   Jesaya 35:1 e re: “Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona.”