Ditabeng go tletše dipego tša batho bao ba bolelago dilo tša go kweša bohloko, goba bao ba dirago dilo tše šoro ka ge ba na le kgethollo ya semorafo. Le batho bao ba hlaselago batho ba bangwe ka ge e se ba morafo wa gabo bona, gotee le dintwa.

•   The New York Times, ya November 15, 2023, e begile gore: “Ga bjale dikgokaganong tša leago goba social media go na le dipolelo tše dintšhi tša lehloyo ka baka la ntwa yeo e lego gona magareng ga Isiraele le Gaza, le ka baka la batho bao ba hlohleletšago bošoro le lehloyo.”

•   Ka di 3 tša November 2023, Dennis Francis e lego mopresitente wa United Nations General Assembly, o boletše gore: “Ga e sa le go tloga ka di-7 tša October, mo lefaseng go bile le koketšego e kgolo ya lehloyo, dipolelo tše mpe le dintwa.”

 Polelo ya lehloyo, bošoro le dintwa ga di thome gona bjale. Ge e le gabotse, Beibele e bolela ka batho ba nakong e fetilego bao ‘mantšu a bona a bego a hlaba bjalo ka tšhoša’ le bao ba bego ba rata dintwa le bošoro. (Psalme 64:3; 120:7; 140:1) Beibele e re botša le gore lehloyo leo re le bonago lehono, go na le seo le se bolelago.

 Beibele e re botša mabaka a mabedi, gore ke ka baka la’ng lehloyo le atile lehono.

1.  1. E re boditše e sa le pele gore “lerato la ba bantši le tla fola.” (Mateo 24:12) Batho ba bantšhi ba tlo hloyana go ena le gore ba ratane.​—2 Timotheo 3:1-5.

2.  2. Sathane Diabolo ke yena a dirago gore mo lefaseng go be le lehloyo le le tseneletšego. Beibele e re “lefase ka moka le laolwa ke Sathane.”​—1 Johane 5:19; Kutollo 12:9, 12.

 Le ga go le bjalo, Beibele e boletše gore e se kgale Modimo o tlo tloša dilo tšeo di bakago lehloyo. Go feta moo o tlo tloša tlaišego ka moka yeo e bakilwego ke lehloyo. Beibele e tshepiša gore:

•   Modimo “o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”​—Kutollo 21:4.