Mokgatlo wa Ditšhaba tše Kopanego o boletše gore:

•   Go tloga ka October 7 go fihla ka October 23, 2023, go bile le batho ba 6 400 bao ba hlokofetšego le ba 15 200 bao ba gobetšego ntweng ya magareng ga Gaza le Isiraele, ba bantšhi ba bona e be e le badudi ba naga. Godimo ga moo, batho ba bantšhi ba ile ba gapeletšega go tlogela magae a bona.

•   Ka September 24, 2023, batho bao ba bego ba šetše ba hlokofetšego kua Ukraine ka baka la ntwa ya magareng ga Russia le Ukraine e be e le ba 9 701 gomme bao ba gobetšego e be e le ba 17 748.

 Beibele e nea kholofelo efe go batho bao ba tlaišwago ke ntwa?

 Beibele e re botša gore Modimo o tlo “fediša dintwa lefaseng ka moka.” (Psalme 46:9) O tlo diriša mmušo woo o lego legodimong go tšeela mebušo ya batho legato. (Daniele 2:44) Mmušo wa Modimo o tlo tlišetša batho khutšo.

 Bona seo se tlago go dirwa ke Jesu Kriste yo e lego kgoši ya Mmušo wa Modimo:

•   “Ka gobane o tla phološa modiidi yo a mo kgopelago gore a mo thuše, le motho wa maemo a tlase gotee le motho yo mongwe le yo mongwe yo a hlokago motho yo a mo thušago. O tla kwela motho wa maemo a tlase le modiidi bohloko, gomme a phološa maphelo a badiidi. O tla ba phološa go batho bao ba ba tlaišago le bao ba ba swerego ga sehlogo.”—Psalme 72:12-14.

 Modimo o tlo diriša Mmušo wa gagwe go tloša mathata ao a tlišwago ke dintwa le bošoro.

•   “O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutullo 21:4.

 E se kgale, Mmušo wa Modimo o tlo tliša diphetogo tše dibotse mo lefaseng. Beibele e boletše e sa le pele ka “dintwa le dipego tša dintwa” tšeo re di bonago di direga lehono. (Mateo 24:6) Dintwa tše le dilo tše dingwe di bontšha gore re phela “mehleng ya bofelo” ya go buša ga batho.—2 Timotheo 3:1.