Go lwantšhana le go lewa ke bodutu e ile ya ba bothata bjo bogolo bjo bo amago tša maphelo ka 2023. Na bo tla loka?

•   Dr. Vivek Murthy, e lego yo mogolo wa tša maphelo kua U.S. o re: “Go lewa ke bodutu le go phela o nnoši go ka re tšeela lethabo la rena le go dira gore re se ke ra phela gabotse mmeleng.” O oketša ka gore: “Re ka kgona go dira se sengwe ka taba ye.” Re ka dira’ng? “Re ka tšea megato ganyenyane-ganyenyane letšatši le letšatši gore re tiiše segwera sa rena.” a

 Go lewa ke bodutu ga se tšona feela ditlamorago tša go phela o nnoši. Ba bangwe ba ka no ikwa ba lewa ke bodutu le ge ba na le batho ba bangwe. Go sa šetšwe gore go lewa ke bodutu go bakwa ke eng, Beibele e ka thuša. E na le keletšo e šomago yeo e ka re thušago go lwantšhana le bodutu ka go tiiša segwera sa rena.

 Eba le bokgoni bja go boledišana le ba bangwe. Se se akaretša go se bolele ka tsela yeo o ikwago ka yona feela, eupša le go kgona go theetša ba bangwe. Ge o leka go kgahlegela ba bangwe, seo se tla dira gore segwera sa lena se gole.

•   Molao wa motheo wa Beibele: “Le se ke la tshwenyega ka lena le nnoši eupša le tshwenyege le ka batho ba bangwe.”—Bafilipi 2:4.

 Eba le bagwera ba bangwe. Ikemišetše go dira bagwera le batho bao ba go ba fetago ka mengwaga goba bao wena o ba fetago, goba bao ba tšwago merafong le ditšong tšeo di fapanego le tša gago.

•   Molao wa motheo wa Beibele: “Le katološeng lerato leo le lego dipelong tša lena.”—2 Bakorinthe 6:13.

 Go hwetša ka mo go oketšegilego kamoo o ka bago le segwera se se tiilego le ba bangwe, bala sehlogo seo se rego “Go Kgotsofatša Kganyogo ya Rena e Matla ya go Nyaka Bogwera.”