Moragonyana bjale, baetapele ba lefase le bo rasaense, ba boletše kamoo ba ikwago ka gona ka matla ao metšhene ya dikhomphutha yeo e kgonago go ekiša batho e nago le ona. Le ge ba dumela gore e na le mehola, eupša ba tshwenyega ka gore e ka dirišwa gampe.

•    Motlatša mopresitente wa naga ya United State e lego Kamala Harris, o boletše ka di 4 tša May 2023 gore:  “Metšhene ye e matla ya thekinolotši e ka dira gore maphelo a batho a kaonefale . . . Eupša ka nako e swanago, metšhene ye e ka feleletša e dirile gore maphelo a batho a be kotsing, ka gore ba se ke ba bolokega e bile e ka gatelela le ditokelo tša bona le polokego, ya ba ya dira gore batho ba setšhaba ba se ke ba tshepa tsela yeo mmušo o dirago dilo ka yona.

•   Mokgatlo wa lefase ka moka wa dingaka le ditsebi tša tša maphelo woo o eteletšwego pele ke Dr. Frederik Federspiel o ngwadile ka go BMJ Global Health ka di 9 tša May 2023 gore:  “Le ge metšhene ye ya dikhomphutha e ka kaonefatša maphelo, eupša e ka dira le gore maphelo a batho ba bangwe a be kotsing.” a

•   Ka di 1 tša May 2023, kuranta ya The New York Times e ngwadile gore: “Batho ba ka diriša metšhene ye go fetiša boitsebišo bja maaka. Metšhene ye e ka dira gore batho ba felelwe ke mešomo. Ditsebi tša thekinolotši di tshwenyegile ka gore ge nako e dutše e eya, metšhene ye e ka dira gore maphelo a batho a be kotsing.”

 Ge nako e dutše e eya, re tlo bona kamoo metšhene ye e ka dirišwago gampe goba gabotse ka gona. Beibele e re’ng?

 Beibele e bontšha gore ke ka baka la’ng batho ba se ba kgodišega gore dilo tšeo ba di dirago, di ka feleletša di dirišwa gabotse feela.

1.  1. Le ge batho ba ka ba le maikemišetšo a mabotse, ba ka se kgone go bona gore go ka ba le ditlamorago tše kotsi.

   •   “Go na le tsela yeo motho a e bonago e lokile, eupša e feleletša ka ditsela tša lehu.”—Diema 14:12.

2.  2. Motho a ka se kgone go tseba gore batho ba bangwe ba tla diriša bjang dilo tšeo a di hlamilego.

   •   “ Ke be ke tla di šiela motho yo a bego a tla ntlhatlama. Ke mang yo a tsebago ge e ba e tla ba yo bohlale goba lešilo? Lega go le bjalo, o tla laola dilo ka moka tšeo ke itapišeditšego tšona le tšeo ke di dirilego ka bohlale ka tlase ga letšatši.”—Mmoledi 2:18, 19.

 Go se kgodišege mo go bjalo go dira gore re bone gore ke ka baka la’ng re hloka tlhahlo e tšwago go Mmopi wa rena.

 Mmopi wa rena o tshepiša gore a ka se dumelele motho goba selo le ge e le sefe seo batho ba se dirago se senya lefase goba batho bao ba lego mo lefaseng.

•   “Lefase le dula le le gona go iša mehleng ya neng le neng.”—Mmoledi 1:4.

•   “Baloki bona e tla ba beng ba lefase, Ba tla dula mo go lona ka mo go sa felego.”—Psalme 37:29.

 Mmopi wa rena o diriša Beibele go re hlahla le go re thuša go tseba gore nakong e tlago re tlo ba le khutšo e bile ra bolokega. E le gore o ithute ka mo go oketšegilego ka seo Beibele e se bolelago, bala sehlogo seo se rego “Re ka Thušwa ke Eng Gore re be le Bokamoso bjo Bobotse?” le seo se rego “A Real Hope for a Better Tomorrow.”