Ka Sontaga sa di-20, November 2022, khomferense ya COP27 ya United Nations Climate Change e ile ya fihla mafelelong. Gaešita le ge go ile gwa fihlelelwa phetho e kgolo yeo e bego e tla thuša dinaga tšeo di diilago gore di kgone go rarolla mathata a maemo a leratadima, ba bantši ba ile ba lemoga gore se ga se sa fihla modung wa bothata.

•    Ka di-19 tša November 2022, mongwaledi wa Ditšhaba tše Kopanego goba UN, e lego António Guterres, o ile a re: “Ke thabišwa ke gore re dirile phetho ya go beela tšhelete ka thoko ya go thuša bao ba tlaišwago ke diphetogo tša maemo a leratadima. Eupša go molaleng gore ga se gwa lekana . . . Lefase la rena le swana le molwetši yoo a hlokago thušo ka pelapela.”

•    Ka di-20 tša November 2022, Mary Robinson, yoo e kilego ya ba mopresidente wa Ireland e bile a kile a ba Mokomišenare yo Mogolo wa Ditshwanelo tša Batho wa UN, o itše: “Lefase le kotsing e kgolo kudu ya go fetoga ga maemo a leratadima yeo e ka amago motho yo mongwe le yo mongwe.”

 Bafsa ke bona ba tshwenyegilego kudu ka seo se ka diregago ka polanete ya rena. Eupša na batho ba ka kgona go šoma gotee go lokiša bothata bja go fetoga ga maemo a leratadima? Beibele yona e reng ka taba ye?

 Beibele e re botša gore le ge mebušo e ka šoma ka thata gore e rarolle bothata bjo, e ka se kgone go bo fediša. Ke ka baka la’ng e ka se kgone go bo fediša? Ekwa mabaka a mabedi:

•    Mmoledi 1:15 e re: “Tšeo di kgopamišitšwego di ka se otlollwe.”

   Seo temana ye e se bolelago: Mebušo ga e kgone go dira dilo ka moka tšeo e nyakago go di dira ka gobane batho ga se ba bopelwa gore ba ipuše. (Jeremia 10:23) Le ge ditšhaba di be di ka kgona go ipopa ngatana e tee, di ka se kgone go rarolla mathata a lefase, le ge di ka leka ka thata.

•    2 Timotheo 3:2, 3 e re: “Gobane batho e tla ba baithati, barati ba tšhelete, . . . ba ba sa ikemišetšago go amogela tumelelano le ge e le efe.”

   Seo ditemana tše di se bolelago: Beibele e boletše e sa le pele gore batho e be e tla ba ba ithatago e bile e le ba sa ikemišetšago go šoma gotee e le gore ba thuše batho ba bangwe.

 Bothata bja polanete bo ka se rarollwe ke dilo tšeo babuši ba di tshepišago. Modimo o kgethile Mmuši yo a nago le bokgoni, e lego Jesu Kriste. Ge Beibele e bolela ka yena e re:

•    “Pušo e tla ba legetleng la gagwe. O tla bitšwa Moeletši yo a Makatšago, Modimo yo Matla, Tate wa ka mo go sa Felego le Kgošana ya Khutšo.”—Jesaya 9:6.

 Jesu ke Kgoši ya Mmušo wa Modimo goba mmušo wa legodimong. (Mateo 6:10) O na le matla le bohlale e bile o nyaka go hlokomela polanete ye le bao ba dulago go yona. (Psalme 72:12, 16) Ge a tla be a buša, o tlo diriša mmušo wo wa legodimong go fediša “bao ba senyago lefase” gomme a dira gore lefase le boele sekeng.—Kutollo 11:18, Jesaya 35:1, 7.

 E le gore o kwe ka seo se ka fedišago bothata bja go fetoga ga leratadima, bala sehlogo seo se rego, “Climate Change and Our Future—What the Bible Says.”