DULANG LE PHAKGAME!
Borasaense ba Šuthišetša Sešupanako sa go Fela ga Lefase Pele—Beibele e Re’ng?
Ka di-24 tša January 2023 borasaense ba ile ba šuthišetša nako ya Sešupanako sa go Fela ga Lefase, a ba e šuthišetša kgaufsi le bošegogare bjoo bo emelago bofelo bja lefase.
AFP International Text Wire e re: “Ka Labobedi ‘Sešupanako sa Bofelo bja Lefase’ se šuthetše kudu kgaufsi le bošegogare go feta le ge e le neng pele ka baka la ntwa yeo e lego gona kua Ukraine, ditšhošetšo tša dintwa tša nuclear le maemo a hlobaetšago a leratadima.”
ABC News e re: “Ka Labobedi borasaense ba boletše gore ‘Sešupanako sa go Fela ga Lefase’ se šuthišeditšwe go metsotswana e 90 pele ga bošegogare; kgaufsiufsi kudu le haramagedone go feta le ge e le neng pele.”
The Guardian e re: “Sehlopha sa borasaense ba ditšhabatšhaba se lemošitše gore bophelo bja batho bo kotsing go feta le ge e le neng pele.”
Na bofelo bja batho le bja lefase la rena bo kgaufsi? Na re swanetše go tšhoga gore bokamoso bo re swaretše’ng? Beibele e re’ng?
Seo bokamoso bo se swerego
Go ya ka Beibele, “lefase le [tla] dula le le gona go iša mehleng ya neng le neng” gomme go tla ba le batho bao “ba [tlago] dula mo go lona ka mo go sa felego.” (Mmoledi 1:4; Psalme 37:29) Ka gona batho ba ka se kgone go fediša lefase goba ba dira gore mo go lona go se phelege.
Lega go le bjalo, Beibele e a bolela ka bofelo. Ka mohlala, e re “lefase le a feta.”—1 Johane 2:17.
E le gore o tsebe seo Beibele e se bolelago ge e bolela ka bofelo bja lefase, bala sehlogo seo se rego “Is the World Coming to an End? What Is the Apocalypse?”
E le gore o ithute ka seo Beibele e se bolelago mabapi le nako yeo ditiragalo tšeo di tlago go direga mo lefaseng di tlago go direga ka yona, bala sehlogo seo se rego, “When Will the World End?”
Dula o na le tebelelo e botse
Beibele e ka re thuša gore re dule re na le tebelelo e botse go sa šetšwe mathata ao a lego gona mo lefaseng. E ka re thuša bjang?
Beibele e re nea keletšo e ka re holago. (2 Timotheo 3:16, 17) Ka mohlala, bala sehlogo seo se rego, “How to Control Worry” go bona ka tsela yeo Beibele e ka go thušago ka yona go dula o na le kholofelo go sa šetšwe mathata a bophelo.
Beibele e re nea kholofelo e botse ka bokamoso. (Baroma 15:4) E re hlalosetša ka dilo tšeo re ka letelago gore di direge gona bjale le nakong e tlago e lego seo se re thušago gore re dule re išitše maswafo fase go sa šetšwe dilo tšeo di diregago mo lefaseng.
E le gore o hwetše ka mo go oketšegilego go tšwa ka Beibeleng re go laletša gore o leke thuto ya rena ya mahala ya Beibele.
a “Sešupanako sa go Fela ga Lefase’ ke sedirišwa seo se diretšwego go lemoša batho kamoo re lego kgaufsi kudu ka gona le go senya lefase la rena ka dithekinolotši tše kotsi tšeo re itlhametšego tšona. Ke seswantšhetšo, goba kgopotšo ya dilo tšeo re swanetšego go di lokiša ge e ba re sa nyaka go phela mo lefaseng.”—Bulletin of the Atomic Scientists.