DULANG LE PHAKGAME!
Ditiragalo tše di Tšhošago Tšeo di Diregago Lefaseng ka Moka tša go Thuntšhwa ga Batho—Beibele e Re’ng ka Taba ye?
Ka July 2022 go bile le ditiragalo tše di tšhošago tša go thuntšhwa ga batho lefaseng ka moka:
“Go bolawa ga radipolitiki yo a tumilego wa Japane [Tonakgolo ya pele Shinzo Abe] go tšhošitše naga ya Japane gotee le lefase ka moka, kudukudu ka ge ditiro tša mohuta wo di se tša tlwaelega Japane, e bile e le naga yeo e nago le melao e thata ya go laola go dirišwa ga dithunya.”—July 10, 2022, The Japan Times.
“Batho ba Denmark ba tšhošitšwe ke monna yo a thuntšhitšego batho ba bararo mabenkeleng a Copenhagen.”—July 4, 2022, Reuters.
“Afrika Borwa: Sehlopha sa banna se bolaile batho ba 15 ka go ba thuntšha lefelong le lengwe la go rekiša bjala Soweto.”—July 10, 2022, The Guardian.
“Batho ba ka godimo ga 220 ba ile ba bolawa ka go thuntšhwa mafelobekeng a July 4 kua United States.”—July 5, 2022, CBS News.
Na bošoro bjo bo tla ka bja fela? Beibele e re’ng ka se?
Bošoro bo tla Fela
Beibele e hlalosa nako yeo re phelago go yona e le ‘mehla ya bofelo,’ e lego nako yeo batho e lego ba bogale, ba šoro le ba sehlogo. (2 Timotheo 3:1, 3) Dilo tše di dira gore batho ba phele ba tšhogile. (Luka 21:11) Eupša Beibele e tshepiša gore e se kgale bošoro bo tla be bo fedile, gomme ‘batho ba tla dula lefelong la bodulo la khutšo le madulong a bolokegilego gotee le mafelong a boiketlo a khutšo.’ (Jesaya 32:18) Bošoro bo tla fela bjang?
Modimo o tlo fediša batho ba babe gomme a fediša le dibetša ka moka.
“Ge e le ba kgopo ba tla fedišwa lefaseng.”—Diema 2:22.
“[Modimo] o fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.”—Psalme 46:9.
Modimo o tlo ruta batho go phedišana ka khutšo, ka go dira bjalo a fediša dilo ka moka tšeo di dirago gore go be le bošoro.
“Di ka se gobatše goba tša senya thabeng ka moka ya ka e kgethwa; ka gobane lefase le tla tlala tsebo ya Jehofa go etša ge meetse a khurumeditše lewatle.”—Jesaya 11:9.
Modimo le gona bjale o ruta batho lefaseng ka moka gore ba tlogele bošoro le go diriša dibetša, e bile o re ba ‘rule ditšhoša tša bona ba di dire megoma gomme marumo a bona ba a dire disekela.’—Mika 4:3.
E le gore o ithute ka mo go oketšegilego ka tshepišo ya Beibele ya mabapi lefase leo go lona go tla bego go se na dilo tše di tšhošago, bala sehlogo seo se rego: “Freedom From Fear—Is It Possible?”
E le gore o ithute ka mo go oketšegilego kamoo bošoro bo tlago go fedišetšwa sa ruri, bala sehlogo seo se rego: “Peace on Earth at Last!”