Ka ngwaga wa 2022, tšhelete yeo mebušo e e šomišitšego go tša sešole e fihleletše diranta tše 44 035 040 000 000, e lego tšhelete ya go feta tšhelete ka moka yeo e kilego ya e šomiša, kudukudu e le ka lebaka la tlhaselo ya Russia go Ukraine. Ka April 2023 mokgatlo wa Stockholm International Peace Research Institute (SIPRI) o lokolotše pego yeo go ya ka yona, ka ngwaga wa 2022:

•   Tšhelete yeo e šomišitšwego go tša sešole Yuropa “e rotogile ka diperesente tše 13 mo ngwageng, e lego koketšego e kgolo go feta dikoketšego tša ngwaga le ngwaga ka moka ditšheleteng tšeo di šomišwago ke Yuropa ga e sa le go tloga ka 1991.”

•   “Tšhelete yeo e šomišitšwego ke Russia e hlatlogile ka mo e ka bago ka diperesente tše 9.2, gomme ya tloga maemong a go ba naga ya bohlano go ya go a go ba naga ya boraro yeo e šomišago tšhelete e ntši kudu go tša sešole lefaseng ka moka.”

•   United States e be e sa dutše e le yona ya ka godimodimo go šomišeng tšhelete go tša sešole “gomme diperesente tše 39 tša tšhelete yeo e šomišwago go tša sešole lefaseng ka moka ke ya yona.”

 Dr. Nan Tian, yo le yena a bilego le karolo go ngwaleng pego ye ya SIPRI o itše: “Go oketšega ga go šomišwa ga ditšhelete tša sešole mengwageng ya morago bjale ke leswao la gore re phela lefaseng leo go se nago polokego gomme maemo a mpefala.”

 Beibele e boletše e sa le pele ka dikgohlakgohlano magareng ga mebušo e matla ya lefase lehono gomme e bolela le gore mothopo o nnoši wa khutšo ya kgonthe ke ofe.

•   Beibele e bitša nako yeo re phelago go yona gore ke “nakong ya ... bofelo.”—Daniele 8:19.

•   Puku ya Daniele e boletše e sa le pele gore nakong yeo go be go tla ba le mebušo ya lefase yeo e lwantšhanago. Mebušo ye e be e tlo “kgorometšana” goba ya baka go buša. Twantšhano yeo ya tša madira e be e tla akaretša tirišo ya “matlotlo” a mantši goba ditšhelete.—Daniele 11:40, 42, 43.

 Go kwa ka mo go oketšegilego ka boporofeta bjo bjo bo kgahlišago bja Beibele, bona bidio yeo e rego Boporofeta bja Daniele Kgaolo 11.

•   Beibele e bolela gore Modimo o tlo tšeela mebušo ya batho legato. O “tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.”—Daniele 2:44.

•   Kgauswinyana Jehofa a Modimo o tlo dira seo batho ba palelwago ke go se dira, e lego go tliša khutšo ya kgonthe le ya ka mo go sa felego. Bjang? Mmušo wa gagwe wa legodimong o tla fediša dibetša le bosenyi ka moka.—Psalme 46:8, 9.

 Go tseba ka mo go oketšegilego ka seo Mmušo wa Modimo o tlago go se phetha, bala sehlogo seo se rego, ‘Ge go Buša Mmušo wa Modimo, “Khutšo e tla Ata.”’