Ka di-24 tša February 2022, Russia e ile ya thoma go hlasela naga ya Ukraine. Tlhaselo ye e bakile tlhakatlhakano e kgolo yeo e dirilego gore maphelo a batho ba dimilione a be kotsing moo ba gapeletšegago go tšhaba nageng ka pela ka mo ba ka kgonago. a

 Nataliia, yo a tšwago Kharkiv, Ukraine o re: “Go be go kwala dipomo le methuthupo. Go be go tšhoša ka tsela yeo e sa hlalosegego. Ge re se na go kwa gore go na le diterene tšeo di bego di huduša batho re ile ra phetha ka gore re huduge . Re ile ra tlogela dilo tša rena tše dintši ka gore motho o be a swanetše go no rwala feela mokotlana o monyenyane. Re ile ra tšea feela dipampiri tše bohlokwa, dihlare, meetse le dijonyana tše dinyenyane. Re tlogetše dilo tše dingwe ka moka ka ge re be re swanetše go tsena ka ditereneng ka yona nako yeo dipomo di bego di thunya ka mahlakoreng ka moka.”

 Nadija, yo a tšwago Kharkiv, Ukraine o re: “Re be re sa nagane gore go ka ba le ntwa. Ke ile ka kwa methuthupo go tšwa karolong e nngwe ya toropo gomme mafastere a šikinyega. Ke ile ka tšea feela dilo tšeo di bego di tloga di le bohlokwa, ka sepela. Ke tlogile gae ka 8:00 mesong ka namela terene ya go ya Lviv, ke moka ka namela pase ya go ya Poland.”

Sehlogong se

•  Ke eng seo se dirago gore go be le mathata a a bafaladi?

•  Bafaladi ba ka holofela eng?

•  Na Beibele e ka thuša bafaladi lehono?

 Ke eng seo se dirago gore go be le mathata a a bafaladi?

 Seo se dirilego gore batho ba tšhabe Ukraine ke ge mašole a Russia a be a hlasela naga ya Ukraine. Lega go le bjalo, Beibele e hlalosa mabaka a kgonthe ao a dirago gore go be le mathata a a bafaladi:

•   Mebušo ya batho lefaseng ka moka ga se ya ka ya kgona go nea batho seo ba se hlokago. Bao ba nago le maatla a go buša gantši ba diriša maatla a bona go laola le go tlaiša batho.—Mmoledi 4:1; 8:9.

•   Sathane Diabolo, “mmuši wa lefase,” o dira gore batho ba dire dilo tše mpe. Ke ka lebaka leo Beibele e rego: “Lefase ka moka le rapaletše matleng a yo kgopo”—Johane 14:30; 1 Johane 5:19.

•   Go oketša go mathata ao a tlaišitšego batho ka mengwaga e mentši, ga bjale re phela nakong yeo Beibele e boletšego ka yona e sa le pele, ya re: “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona.” (2 Timotheo 3:1) Go oketša moo, matšatši a a tlo bonwa ka dintwa, dikotsi tša hlago, tlhaelelo ya dijo le mauba a malwetši, e lego tšona dilo tše di dirago gore batho ba tšhabe magaeng a bona.—Luka 21:10, 11.

 Bafaladi ba ka holofela eng?

 Beibele e hlalosa gore Mmopi wa rena, Jehofa, b ke Modimo yo a ratago bafaladi le batho bao ba se nago magae e bile o ba kwela bohloko. (Doiteronomio 10:18) O tshepiša go tlo fediša mathata ka moka a bafaladi ka pušo ya gagwe ya legodimong yeo e bitšwago Mmušo ya Modimo. Mmušo woo o tlo fediša mebušo ya batho gomme gwa buša wona. (Daniele 2:44; Mateo 6:10) Jehofa o tlo diriša Mmušo wa gagwe go fediša Sathane Diabolo. (Baroma 16:20) Mmušo woo o tlo buša lefase ka moka, wa fediša dikarogano tšeo di bakwago ke mellwane ya dinaga. Batho ka moka e tla ba lapa la lefase ka moka leo le nago le botee. Go ka se sa ba le motho le ge e le ofe yo a tla tšhabago legaeng la gagwe ka gore Beibele e re: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago; ka gobane go boletše molomo wa Jehofa wa madira.”—Mika 4:4.

 Ke Mmušo wa Modimo feela wo o ka kgonago go tliša tharollo ya sa ruri ya mathata ao bafaladi ba lebeletšanago le ona lehono. Jehofa o tlo diriša Mmušo wa gagwe go fediša mathata ka moka ao a gapeletšago batho go ba bafaladi. Bona mehlala e latelago:

•   Ntwa. “[Jehofa] o fediša dintwa.” (Psalme 46:9) Gore o tsebe gore Modimo o tlo fediša ntwa bjang, bala sehlogo seo se rego “Khutšo Lefaseng—E tla ba Gona Bjang?”

•   Kgatelelo le bošoro. “[Jehofa] o tla lopolla moya wa bona kgatelelong le bošorong.” (Psalme 72:14) Gore o kwešiše gore batho ba ka kgona bjang go fetoša mekgwa ya bona e mebe yeo ba bilego le yona ka nako e telele, bala dihlogo tšeo di lego ka tlase ga sehlogo seo se rego “Re ka Fenya Lehloyo.”

•   Bodiidi. “ [Jehofa] o tla hlakodiša modiidi yo a llelago thušo.” (Psalme 72:12) Gore o bone gore Modimo o tlo rarolla bjang dilo tšeo di dirago gore go be le bodiidi, bala sehlogo seo se rego: “Is a Fair Economic System Possible?”

•   Tlhaelelo ya dijo. “Go tla ba le mabele a mantši mo lefaseng.” (Psalme 72:16) Gore o tsebe gore Modimo o tlo kgonthišetša bjang gore ga gona motho yo a tlo bolawago ke tlala, bala sehlogo seo se rego: “A World Without Hunger?”

 Na Beibele e ka thuša bafaladi lehono?

 Ee. Ka ntle le go nea bafaladi kholofelo ya kgonthe ka bokamoso, Beibele e ka thuša ka mathata ao ba lebeletšanago le ona gona bjale.

 Molao wa motheo wa Beibele: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano.”—Bafilipi 4:6, 7.

 Seo o se bolelago: Kgopela Modimo gore a go nee khutšo ya monagano go sa šetšwe maemo ao o ikhwetšago o le ka gare ga ona. Bala sehlogo seo se rego “Philippians 4:6, 7—‘Do Not Be Anxious About Anything.’”