Ka Labohlano la di 24 tša February 2023, go be go fela ngwaga ge e sa le ntwa ya kua Ukraine e thomile. Go ya ka dipego go kwagala gore mašole a 300 000 a Ukraine le a Russia a šetše a bolailwe goba ba gobaditšwe, mola badudi ba dinaga tše tše pedi ba eka bago ba 30 000 ba bolailwe ka lebaka la ntwa ye. Lega go le bjalo palo ye e ka no feta moo.

 Sa go nyamiša ke gore ga go bonagale e le kgauswi le go fela.

•    Ka di 19 tša February 2023, seteišene sa NPR (National Public Radio) se begile gore: “Ge e sa le mašole a Russia a tsene nageng ya Ukraine, ga go bonale ntwa ye e le kgauswi le go fela. Go bonagala dinaga tše di se tša ikemišetša go tlogela ntwa, le gona, okare ga se tša ikemišetša go boledišana ka seo se ka dirwago gore ntwa ye e fele.”

 Batho ba bantši lefaseng ka moka, ba nyamišwa ke go bona dintwa tša mohuta wo le dilo tše dingwe tšeo di diregago, di kweša batho ba se nago molato bohloko le go dira gore ba tlaišege. Beibele e tshepiša eng? Na ntwa e tla ka ya fela?

 Beibele e bolela ka ntwa yeo e tlago go phološa maphelo a batho, e sego go a fediša. Ntwa yeo e bitšwa Haramagedone, le gona e hlaloswa e le “[ntwa] ya letšatši le legolo la Modimo Ramatlaohle.” (Kutollo 16:14, 16) Modimo o tlo diriša ntwa yeo go fediša mebušo ya batho yeo e bakago dintwa tše dintši tšeo di senyago lefase. Bala dihlogo tše di latelago gore o kwe kamoo ntwa ya Haramagedone e tlo dirago gore go be le khutšo ya ka mo go sa felego ka gona:

•    “Ntwa ya Haramagedone ke Eng?”

•    “Ruri re Fela Pelo ya gore Haramagedone e tla Neng!”