GO TŠWA BOBOLOKELONG BJA RENA
Go Ruta Batho Lefaseng ka Moka go Bala le go Ngwala
Agostinho yo a dulago Brazil o re: “Ke goletše dipolaseng. Ka gae re be diila kudu. Ke ile ka swanelwa ke go tlogela sekolo gore ke šome gomme ke thuše go hlokomela lapa la gešo.” Agostinho o ile a ithuta go bala le go ngwala ge a be a na le mengwaga e 33. O re: “Go ithuta go bala le go ngwala go nthušitše gore ke ikwe ke itshepa e bile ke na le seriti.”
Agostinho ke yo mongwe wa batho ba ka godimo ga ba 250 000 bao Dihlatse tša Jehofa di ilego tša ba ruta go bala le go ngwala, go tloga mengwageng e 70 e fetilego. Ke ka baka la’ng Dihlatse tša Jehofa di ruta batho go bala le go ngwala? Seo se hotše batho bjang?
Go se Tsebe go Bala le go Ngwala go Dira Gore go Ithuta Dilo go be Thata
Ka 1935 Dihlatse tša Jehofa di be di šetše di ithuta Beibele le batho dinageng tše 115. Baromiwa ba be ba bapalela batho dipolelo tše di fetoletšwego tša Beibele ka maleme a gabo bona le go ba fa dikgatišo ka maleme a moo e le gore ba kgone go fihlelela batho bao ba bolelago maleme a fapafapanego. Le ge batho ba bantši ba be ba thabela go ithuta Beibele, eupša ka baka la go se tsebe go bala le go ngwala ba ile ba se kgone go dira tšwelopele.
Ge batho ba sa kgone go ipalela Beibele ka bobona, ba thatafalelwa ke go diriša melao ya motheo ya Beibele. (Joshua 1:8; Psalme 1:2, 3) Le gona ga ba kgone go phetha boikarabelo bjoo Modimo a ba neilego bjona. Ka mohlala, ge batswadi ba sa kgone go bala go ba thata kudu gore ba rute bana ba bona Beibele. (Doiteronomio 6:6, 7) Le gona batho bao e sa tšwago go ba Dihlatse tša Jehofa bao ba sa kgonego go bala, ba thatafalelwa ke go diriša Beibele ge ba leka go ruta ba bangwe.
Lesolo la go Ruta Batho go Bala le go Ngwala
Ka bo-1940 le ka bo-1950, Nathan H. Knorr le Milton G. Henschel, bao e bego e le ba bangwe ba batho bao ba bego ba eteletše pele modiro wa Dihlatse tša Jehofa ba ile ba etela dinaga tše dintši gore ba rulaganye modiro wa go botša batho ditaba tše dibotse. Bana babo rena ba ba ile ba kgothaletša bana babo rena bao ba lego diofising tša makala gore ba rulaganye gore go be le diklase tša go ithuta go bala le go ngwala diphuthegong.
Kgatišo ya go ithuta go bala ya Cinyanja yeo e lokolotšwego kopanong kua Chingola, Zambia ka 1954
Bana babo rena ba diofising tša makala ba ile ba romela diphuthego ditaelo tša gore diklase tšeo di swarwe bjang. Dinageng tše dingwe, mmušo o be o šetše o na le mananeo ao a ka dirišwago. Ka mohlala, kua Brazil mmušo o ile wa romela ofisi ya lekala dilo tšeo di bego di tla dirišwa go ithuta go bala le go ngwala ke moka tša romelwa diphuthegong. Dinageng tše dingwe, Dihlatse tša Jehofa di ile tša swanelwa ke go itirela mananeo a tšona a go ruta batho go bala le go ngwala.
Diklase tša go ithuta go bala le ngwala di be di diretšwe banna, basadi, batho ba bagolo le bana. Morero o mogolo e be e le gore batho ba ka moka ba rutwe go bala ka leleme la gabo bona. Se se be se era gore le ge ba be ba bolela maleme a go fapafapana, ba be ba tlo rutwa phuthegong e tee.
Lenaneo leo le Thušago Batho
Batho ba hotšwe bjang ke lenaneo le la go ba ruta go bala le go ngwala? Mosadi yo mongwe yo e lego Hlatse ya Jehofa yo a tšwago kua Mexico o re: “Gona bjale ke kgona go kwešiša Beibele e bile e nkgoma pelo. Go ithuta go bala go nthušitše gore ke se ke ka tšhaba go boledišana le baagišani ba ka le batho ba bangwe ba bantši ka molaetša wo o lego ka Beibeleng.”
Lenaneo la go ithuta go bala le go ngwala le thušitše batho go kwešiša Beibele le go ba thuša ka dilo tše dingwe tše dintši. Isaac wa kua Burundi o re: “Go ithuta go bala le go ngwala go nthušitše gore ke ithute go aga. Gona bjale ke šoma go aga e bile ke hlokomela modiro wa moo go agwago meago e megolo.”
Batho bao ba bolelago Chichewa ba rutwa go bala le go ngwala Holong ya Mmušo kua Lilongwe, Malawi ka 2014
Jesusa wa kua Peru o be a na le mengwaga e 49 ge a be a thoma go ithuta go bala le go ngwala. O re: “Ka ge ke le mma yo a hlokometšego lapa, ge ke eya go reka dijo ke swanetše go bona gore ke bokae le gore maina a tšona ke eng. Pele ke ithuta go bala le go ngwala, go be go le thata go dira seo. Ke leboga gore ke ile ka tsena klase ya go ithuta go bala le go ngwala, ka gobane gona bjale ga ke na bothata ge ke eya go rekela ba lapa la ka dilo.”
Ke go tloga kgale mebušo ya dinaga tša go fapafapana e reta Dihlatse tša Jehofa ka mošomo o mobotse woo di o dirago wa gore di rute batho go bala le go ngwala. Le lehono Dihlatse tša Jehofa di sa tšwela pele di ruta batho go bala le go ngwala di diriša mananeo ao a dulago a kaonefatšwa. Di phrinthile diporoutšha tše e ka bago tše 224 milione ka maleme a 720 go thuša batho go bala le go ngwala goba go thuša bao ba sa rutegago. *
^ ser. 11 Ka mohlala, poroutšha ya Apply Yourself to Reading and Writing e hwetšagala ka maleme a 123, gomme poroutšha ya Theetša Modimo e hwetšagala ka maleme a 610.
You May Also Like
PHAFOGA!
Thuto ya Beibele e Thuša Batho go Bala le go Ngwala
Ge Josefina a na le nywaga e 101 o ile a tsenela lenaneo la go ithuta go bala le go ngwala leo le bego le swarwa ke Dihlatse tša Jehofa. O ile a šoma bjang?
GO THUŠA SETŠHABA
Batho ba Diketekete ba Ithuta go Bala le go Ngwala
Bala diphihlelo tša batho lefaseng ka bophara bao ba hotšwego ke diklase tša go ithuta go bala le go ngwala tšeo di rulagantšwego ke Dihlatse tša Jehofa.
