Bahlami go tša Kalafo

A E-NA le nywaga e 61, José wa Belgium yo a tšwago torotswaneng ya Oupeye, o ile a botšwa gore o be a tla swanelwa ke go bjalollwa sebete. O re: “E bile letšhogo leo ke sa kago ka ba le lona bophelong bja-ka.” Nywaga-someng e mene feela e fetilego, go bjalollwa sebete e be e le selo seo se sa naganwego. Gaešita le ka bo-1970, tekanyo ya go ka phologa e be e le feela mo e ka bago 30 lekgolong. Lega go le bjalo, lehono go bjalollwa sebete ke selo seo se dirwago ka mehla, seo se nago le tekanyo e phagamego kudu ya katlego.

Eupša go sa dutše go na le lepheko le legolo. Ka ge go bjalollwa ga sebete gantši go akaretša go tšwa madi ka go fetišiša, dingaka gantši di diriša ditšhelo tša madi nakong ya go bua. Ka baka la ditumelo tša gagwe tša bodumedi, José o be a sa nyake madi. Eupša o be a nyaka go bjalollwa sebete. Na ga go kgonege? Ba bangwe ba ka nagana bjalo. Eupša ngaka e kgolo ya go bua e ile ya nagana gore yona le bašomi-gotee ba be ba e-na le sebaka se sebotse sa go bua ka katlego ka ntle le madi. E lego seo ba ilego ba se dira e le ka kgonthe! Matšatši a 25 feela ka morago ga go buiwa, José o be a boetše gae a e-na le mosadi wa gagwe le morwedi. *

Ka thušo ya bokgoni bja bao makasine wa Time o ba bitšago “bagale ba tša kalafo,” go alafa le go bua mo go sa dirišego madi bjale go tlwaelegile kudu go feta le ge e le neng. Eupša ke ka baka la’ng go nyakega gakaakaa? Gore re arabe potšišo yeo, a re hlahlobeng histori e nyamišago ya ditšhelo tša madi.

[Mongwalo wa ka tlase]

[Seswantšho go letlakala 3]

Lefaseng ka bophara, gona bjale go na le dingaka tše fetago 90 000 tšeo di ilego tša tsebiša gore di ikemišeditše go alafa Dihlatse tša Jehofa ka ntle le madi