‘E be e le ba Lapološago Gakaakang!’

MORAGO bjale molaodi-pharephare wa hotele yeo e agilwego kgaufsi le bjo bongwe bja maema-fofane a ditšhaba-tšhaba kua Japane o ile a etela ofisi ya lekala ya Dihlatse tša Jehofa ya Ebina. O be a bonala a thabile kudu. Ka baka la’ng?

Ka 1998, Dihlatse tše fetago 200 di ile tša dula hoteleng ya molaodi yoo tseleng ya tšona ya go ya le go boa dikopanong tša tšona tša ditšhaba-tšhaba Afrika, Australia, Korea le Amerika Leboa. Nakong ya ge bahlankedi ba hotele ba be ba na le seboka bakeng sa go hlahloba mediro ya ngwaga o fetilego, ba ile ba hlalosa gore gare ga baeng ba 30 000 ba ngwaga le ngwaga, bao ba bego ba tlile kopanong ke bona ba bego ba kgahliša kudu go feta bontši bja bao ba ba diretšego.

Ka gona, molaodi wa hotele o ile a etela Ebina bakeng sa go yo bolela mantšu a tebogo. O itše: ‘Baeng bao ba be ba na le botho e bile ba tlogetše diphapoši tša bona di hlwekile le ka bothakga. Ka mehla ba be ba bontšha tebogo. Go feta moo, ba be ba nea mantšu a kgothatšo go tšwa Beibeleng. E be e le ba lapološago gakaakang!’

Molaodi o ile a tšwela pele ka gore: ‘Re bona baeng ba bantši bao ba tshwenyegilego. Ka gona re be re dutše re ba nyakela tsebišo e holago. Re be re ka rata gore ba holwe ke thuto ya Beibele ka gore e diriša tutuetšo e botse maphelong a batho.’

Ka baka leo, molaodi o ile a kgopela dikopi tše 80 tša dikgatišo tša Dihlatse tša Jehofa e le gore a di bee ka diphapošing tša hotele. Gare ga dikgatišo tšeo a di kgopetšego ke puku ya matlakala a 192 ya Sephiri sa Lethabo la Lapa. Ge e ba o tla rata go hwetša kopi, hle tlatša le go romela setlankana seo se sepelago le sehlogo se atereseng e bontšhitšwego setlankaneng goba atereseng e swanetšego e lokeleditšwego go letlakala 5 la makasine wo.

□ Nthomeleng puku ya Sephiri sa Lethabo la Lapa.

Bontšha gore ka leleme lefe

□ Hle ikopanyeng le nna mabapi le thuto e sa lefelelwego ya legae ya Beibele.